Nis aplikimi per bursa studimi ne Poloni ja dokumentet qe duhen

Nis aplikimi per bursa studimi ne Poloni, ja dokumentet qe duhen

Për të gjithë studentët që duan të nisin ose të vazhdojnë studentët jashtë vendit, një mundësi është edhe Polonia. Nis aplikimi për përfitimin e bursave universitare dhe pasuniversitare në universitetet publike të Polonisë për vitin akademik 2015- 2016.

 

“Në kuadër të bashkëpunimit dypalësh midis Ministrisë së Arsimit dhe Sportit të Republikës së Shqipërisë dhe Ministrisë së Shkencës dhe Arsimit të Lartë të Polonisë, Ministria e Shkencës dhe Arsimit të Lartë të Republikës së Polonisë ofron të drejta studimi universitare dhe pasuniversitare në universitetet publike të Polonisë, për vitin akademik 2015-2016”, thuhet në njoftimin e MAS.

 

Të interesuarit për këto të drejta studimi duhet të dërgojnë me postë pranë Drejtorisë së Integrimit dhe Projekteve në Ministrinë e Arsimit dhe Sportit dokumentet që kërkohen. Aplikantët për studime universitare do t’i nënshtrohen vitit përgatitor të gjuhës polake, ndërsa aplikantët për studime pasuniversitare, të cilët nuk i kanë kryer studimet e tyre universitare në Poloni, duhet të jenë të pajisur me certifikatën e njohjes së gjuhës polake. Afati i fundit për pranimin e dokumenteve në Ministrinë e Arsimit dhe Sportit është data 3 korrik 2015.

 

Shpenzimet e udhëtimit për në Poloni, si dhe shpenzimet e ushqimit dhe të akomodimit, të cilat shkojnë afërsisht 350 euro në muaj dhe duhet të mbulohen nga vetë aplikantët. Pala polake merr përsipër tarifën e shkollimit dhe mundësinë për akomodimin dhe ushqimin me pagesë në konviktet dhe mensat e studentëve.

 

Dokumentet

 

Për studime universitare:

 

1.Kërkesën për studime, duke specifikuar degën në të cilën kandidati dëshiron të studiojë;

 

2.Formularin e plotësuar (bashkëlidhur këtij njoftimi) me një fotografi me ngjyra;

 

3.Vërtetimin e notave për tri vitet e shkollës së mesme. Ky vërtetim duhet të jetë i firmosur nga Drejtoria ose Zyra Arsimore e rrethit përkatës;

 

4.Raportin mjekësor për aftësi studimi;

 

5.Fotokopjen e faqes së të dhënave të pasaportës;

 

6.Dëshminë e penalitetit;

 

7.Fotografi dokumenti.

 

 

 

Për studime pasuniversitare:

 

1.Kërkesën për studime pasuniversitare;

 

2.Formularin e plotësuar (bashkëlidhur këtij njoftimi) me një fotografi me ngjyra;

 

3.Fotokopjen e noterizuar të diplomës së shkollës së lartë;

 

4.Listën e notave;

 

5.CV;

 

6.Dy letra rekomandimi;

 

7.Programin e studimit;

 

8.Raportin mjekësor për aftësi studimi;

 

9.Fotokopjen e faqes së të dhënave të pasaportës;

 

10.Dëshminë e penalitetit;

 

11.Fotografi dokumenti.


Artikujt e fundit


Reklama

Reklama