Mentor Mazrekaj duket gjithmonë e më shumë larg Partizanit. Mesfushori i krahut të majtë, i cili sezonin e shkuar ka treguar një formë të shkëlqyer me të kuqtë, ka realizuar pak muaj më parë një operacion dhe nga ai moment nuk është kthyer më në ekip.
Aludimet në lidhje me të ardhmen e tij te të kuqtë kanë qenë të shumta, duke qenë se mesfushori është një nga lojtarët e preferuar të presidentit Demi, por me sa duket jo i trajnerit italian Sormani. Burime pranë të kuqve kanë bërë me dije se trajneri është informuar në lidhje me aftësitë e futbollistit dhe nuk ka shprehur dëshirën për ta pasur në ekip për sezonin e ardhshëm.
Madje një gjë të tillë, por pa përmendur emra, tekniku, i cili njihet tashmë për disiplinën e lartë, e ka bërë edhe publikisht duke thënë se nuk kërkon lider në ekip, por një grup. Duke qenë se Mazrekaj gjithmonë ka qenë një nga "të përkëdhelurit", por në skuadrën e Sormanit nuk ka vend, kështu që zërat për një rikthim të mundshëm të tij po zbehen gjithmonë e më shumë te "demat".
Fiziku
Por, një nga arsyet dhe më kryesorja pse lojtari nuk është në planet e trajnerit, ka të bëjë me formën e mesfushorit. Herën e fundit që është shfaqur në kampin e kuq, Mazrekaj dukej se kishte shtuar ndjeshëm në peshë pas operacionit dhe do t'i duhej pak kohë që të rifitonte formën optimale. Një fakt i tillë bie ndesh edhe me idetë që ka trajneri italian për lojtarët që aktivizon. Sormani kërkon futbollistë që vrapojnë gjatë gjithë 90 minutave dhe e bëjnë të njëjtën gjë edhe në procesin stërvitor.
ARMAND HALILI
