Para seancës së djeshme stërvitore, zyra për shtyp e klubit nxori para mediave dy mesfushorët Asion Daja e Lorenc Trashi dhe me deklarimet e tyre asnjë lojtar nuk do të fliste deri në përfundim të ndeshjes me Tërbunin.
Të kuqtë kërkojnë impenjim maksimal për këtë sfidë, pasi janë "djegur" një herë nga kundërshtari në fazën e tretë. Vlerësimi maksimal i kundërshtarit u pa edhe gjatë seancës së djeshme, e cila u zhvillua në Kamzë. Trajneri Agostineli i ka "shtrydhur" mirë dje lojtarët si në aspektin fizik, edhe në atë tekniko-taktik.
Për këtë sfidë stafi është i detyruar që të bëjë disa ndërhyrje në formacion, pasi Batha dhe Fejzullahu kanë plotësuar numrin tre të kartonëve të verdhë, njëkohësisht mungon edhe kapiteni Alban Hoxha, i cili u ndëshkua me të kuq në Kukës.