Ish-trajneri i kombëtares italiane të futbollit, Cezare Prandeli, pritet të drejtojë stolin e Lacios.
Lajmi është publikuar mbrëmjen e së hënës nga disa media prestigjioze në Itali si: "Corriere dello Sport", "La Reppublica" etj.
Konfirmimi vjen pak ditë pasi drejtori sporti i Lacios, Igli Tare, premtoi se do njoftonte emrin e ri të trajnerit. Prandeli nuk ka firmosur ende dhe pritet që zyrtarizimi të bëhet në ditët në vijim.
"Kontaktet telefonike kishin ekzistuar prej muajsh, por tani do të jetë takimi final. Tekniku i pëlqen prej kohësh Lotitos (presidentit të Lacios) në raportet njerëzore dhe problemet ekonomike që u hasën me argjentinasin Sampaoli, kanë përshpejtuar tratativat me Prandelin që ngjitet në krye të listës për sezonin e ardhshëm",-shkruan "La Repubblica".
Më herët, Tare ka folur për një revolucion në klubin kryeqytetas me prurjet e shumë emrave të rinj.