Rinis Premier Liga, rinisin konferencat show të Klaudio Ranierit. Dhe starton ashtu siç ishte ulur sipari: duke buzëqeshur. Trajneri kampion me Leiçesterin ëmbëlsoi menjëherë sallën e konferencës për shtyp me një batutë:
"Ne përsëri të parët në klasifikim? Ka më shumë shanse të shohim një UFO të ulet në cirkun Pikadilli..." King Klaudio është gati për mbrojtjen e titullit që do të nisë nesër në transfertën me Hullin.
Me këmbë në tokë
Pas arkivimit të sezonit "dilly ding dilly dong", trajneri i "dhelprave" fluturon ulët për objektivat sezonale: "Shumë punë për të siguruar mbijetesën. Pastaj gjithçka që do të vijë do të jetë fantastike. Bukmejkërsat duhet të na kuotojnë 6000-1. Të bëjmë bis do të jetë praktikisht e pamundur".
E të mendosh që vitin e shkuar bastet i kuotonin 5000 me 1. Kurrë mos thuaj kurrë, por për italianin do të jetë akoma më e vështirë: "Le të luajmë 10 ndeshjet e para dhe pastaj të flasim. Jam kurioz të shoh se ku do të mbërrijnë skuadrat me shanset më të mëdha: Junajtid, Siti, Arsenali, Liverpuli, Çelsi dhe Totenhemi.
Në maj ne bëmë diçka të paimagjinueshme, por këtë vit do të rikthehen në fuqi skuadrat e mëdha. Ato nuk gabojnë dy vite radhazi. Ne jemi gati për ta mbrojtur titullin, por të ndërgjegjshëm se do të jetë shumë e vështirë".
Përgatiti: ANDROKLI DRALO