“WhatsApp” ka bërë të ditur se ka hequr dorë nga regjistrimi me pagesë në shërbimin popullor të mesazheve. Deri tani, përdoruesi i ri pas një viti do t’i duhej të paguante 99 cent si abonim vjetor.
Në një postim në blogun e saj kompania ka shkruar: “Teksa jemi rritur, kemi kuptuar se kjo nuk funksionon mirë. Disa prej përdoruesve të “WhatsApp”-it nuk kanë numrin e kartës së kreditit apo debitit, dhe sigurisht që ishin të shqetësuar nëse pas një viti do të humbnin aksesin të komunikonin me miqtë dhe familjarët e tyre”.
“Kështu që në javët e ardhshme, ne do të heqim të gjitha pagesat në versionet e ndryshme të aplikacionit tonë dhe “WhatsApp” nuk do t’iu tarifojë për shërbimin tonë”, sqaron më tej kompania.
Nëse keni të paktën 6 vite që jeni përdorues i “WhatsApp”-it, ndoshta nuk e keni provuar tarifimin. Por vitet e fundit, përdoruesve të rinj u është kërkuar tarifimi vjetor pas një viti falas.
Gjithashtu, nëse tashmë e keni paguar abonimin vjetor prej 99 cent nuk do të rimbursoheni, por nuk do të tarifoheni më.
Tashmë “WhatsApp” po arrin shifrën e 1 miliardë përdoruesve, kështu që heqja e barrierës së tarifimit, do i shërbente miliona të tjerëve për shërbimin mesazhor.
Shërbimi në pronësi të “Facebook”-ut, planifikon të shfaqet në fushën e gjenerimit të të dhënave nëpërmjet shërbimeve për biznesin. Kjo do të thotë se ju do të keni mundësi t’i dërgoni mesazhe “WhatsApp” bankës apo linjës tuaj ajrore në të ardhmen.