Kukesi ne play-off te Europa League

Kukesi ne play-off te Europa League

Kukësi ka shkruar histori në futbollin shqiptar, duke u bërë skuadra e parë shqiptare që kualifikohet në play-off të garave evropiane.

Edhe pse u mposht 1-0 në ndeshjen e kthimit nga skuadra ukrainase Metalurg Donetsk, skuadra shqiptare ka arritur të kualifikohet në rundin e ardhshëm të Europa League.

Kukësjanët eliminojnë ukrainasit me rezultat të përgjithshëm 2-1, falë fitores 2-0 në ndeshjen e parë të zhvilluar në Qemal Stafa të Tiranës javën e kaluar.

Vendasit ishin dominues në takim dhe arritën të thyejnë mbrojtjen shqiptare pas 27 minutash lojë. Skuadra ukrainase ishte shumë sulmuese edhe në pjesën e dytë, duke krijuar shumë raste shënimi, por mysafirët ishin më të kujdesshëm në këtë pjesë duke shmangur të gjitha rastet për pësim.

Fanelebardhët madje krijuan edhe disa raste të rralla shënimi, kryesisht përmes kundërsulmeve, por pa arritur të gjejnë rrjetin.

 

Për ta pasur më të vështirë, Kukësi e përfundoi ndeshjen me 10 lojtarë, për shkak të dy kartonëve të verdhë të Enco Malindi, kur kishin mbetur 15 minuta deri në fund të takimit.

 

Kjo ishte edhe disfata e parë e djelmoshave të trajnerit Armando Cungu në gjashtë ndeshje të Europa League.

Rivalin e radhës në play-off kukësjanët do ta kuptojnë nesër, kur në Nyon të Zvicrës do të hidhet shorti për play-off të Ligës së Kampionëve dhe Ligës së Evropës.

Nënkampioni i Shqipërisë ka lënë kështu gjurmë në historinë e futbollit kombëtar, duke u bërë skuadra e parë shqiptare që arrin në play-off të garave evropiane.

Rastin të shkruajë histori e pati edhe kampioni i Shqipërisë, Skënderbeu, që arriti deri në rundin e tretë të Ligës së Kampionëve, por që u eliminua nga Shakhter Karagandy.

/Telegrafi/


Artikujt e fundit


Reklama

Reklama