Ledian Memushaj është kthyer përsëri në grumbullim me kombëtaren shqiptare të futbollit, duke u vënë nën urdhrat e trajnerit De Biazi. Por duket se mesfushori do të kthehet përsëri në Itali për t'iu bashkuar ekipit të Peskarës në ditët në vazhdim.
Memushaj nuk do të marrë pjesë në ndeshjen e dytë gjysmëfinale të play-off të Serisë B, pasi Peskara ka fituar 2-0 takimin e parë ndaj Novarës dhe duket e sigurt drejt finales kundër fitueses së çiftit Trapani-Specia.
Sipas gazetës "Il Centro", mesfushori do të kthehet përsëri në Itali për të luajtur takimin e parë final, më datë 5 qershor falë një akordi me FSHF-në. Kjo e fundit mund të refuzojë kërkesat e klubeve për futbollistë pas datës 31 maj, siç parashikon rregullorja e UEFA-s, por në rastin konkret pritet të plotësojë dëshirën e klubit italian.
