Trajneri i kombëtares të japë shpjegime më serioze se sa fjalët e bukura që ai fabrikon zakonisht

Kush është më larg: Miqësorja apo trajneri Dosena?

Shqiptarët ëndërrojnë Milanin, ose Italinë në Tiranë dhe nuk kujtohen që kanë "humbur" trajnerin e shumëpaguar...

Nga Gëzim Sinemati
Milani i Berluskonit apo Italia e Trapatonit? Nigeria e madhe, apo Nigeria e vogël? Shumë pikëpyetje për ndeshjen e ardhshme miqësore të kombëtares sonë. Episodi i fundit e zbeh më shumë perspektivën. Në Federatë kanë marrë vesh me vonesë se ftesa e ardhur nga Nigeria nuk është për ekipin përfaqësues, kampionët e Afrikës, por për ekipin e të rinjve. "Ka qënë një keqkuptim,"- kërkon të çdramatizojë Starova, sipas ritualit të tij. Duket larg ndeshja miqësore me ekipet e reklamuara, por edhe më larg duket vetë trajneri Dosena.
Në fakt, italiani, në vizitat e pakëta që ka bërë në vendin ku drejton me imagjinatë një kombëtare, ka shprehur opinionin se "ndeshjet miqësore janë shumë të rëndësishme". Madje Bepe përdor dy lloj klasifikimesh: në 2 ndeshje zyrtare ka vetëm 1 pikë me Zvicrën, kurse në dy ndeshje miqësore, me Breshian dhe Kosovën, ka 6 pikë!? Mirëpo Dosena nuk është i humbur kudo: brenda një kohe të shkurtër, ku i numërohen me lehtësi orët në Tiranë, ka arritur të marrë dy këstet e para të kontratës së bujshme...
Flitet se presidenti Duka e ka qortuar për indiferencën e treguar ndaj futbollit shqiptar. Tani, pas lajmit se ka firmosur edhe për një ekip tjetër, "Al Jittihad"-in e Gedafit, që renditet e dyta në Libi, do të ketë më shumë arsye që të udhëtojë drejt vendit të kësteve. Këtë herë duhet të japë shpjegime më serioze se sa fjalët e bukura që ai fabrikon zakonisht. Si ka mundësi që Dosena-trajner paska ndryshuar kaq shumë nga Dosena-futbollist? Diçka nga të gjitha. Dosena, në Itali, me probleme dhe gjyqe me Sampdorian. Dosena me polemika në Paraguai. Dosena i përcjellë pa lule edhe nga Gana. Dosena i reklamuar me bujë në Shqipëri, por nëse vërtëtohen ato çka shkruan gazeta "Il Messagero", atëherë ai do të mbahet mend për një arsye të thjeshtë: se e kemi respektuar më tepër se sa e meritonte!

Kanë mbetur vetëm 12 ditë nga data e lirë për miqësore dhe kombëtarja jonë nuk ka ende kundërshtar
Kuqezinjve s'ka kush t'u përgjigjet
Ja kalendari i miqësoreve të 20 nëntorit
Spanjë-Bullgari
Luksemburg-Ishujt K.Gjelbërt
Rumani- Kroaci
Estoni-Islandë
Greqi-Irlandë
Hungari-Moldavi
Gjermani-Holandë
Austri-Norvegji
Danimarkë-Poloni
Portugali-Skoci
Itali-Turqi
Sllovaki-Ukrainë
Francë-Jugosllavi
Kanë mbetur edhe 12 ditë nga data zyrtare e UEFA-s për ndeshje miqësore të kombëtareve të ndryshme, në prag të takimeve kualifikuese të radhës për Euro 2004-n, dhe në Federatën Shqiptare të Futbollit askush nuk mund të flasë për një kundërshtar të mundshëm të kuqezinjve tanë. Lajmi i dalë jo pa shumë bujë e mburrje nga ky institucion, i publikuar edhe në gazetën tonë, se nigerianët janë gati të vijnë në Tiranë, madje me shpenzimet e tyre, u venit shumë shpejt. Pa zgjatur shumë lumturia e sekretarit të përgjithshëm të FSHF-së, Sulejman Starovës, nga goja e të cilit e morëm vesh faktin e mësipërm, versioni tjetër ishte gati. Ndërrimi i mendjes së afrikanëve për të ardhur në kryeqytetin shqiptar ka qenë i njëhershëm, pa e mësuar dot shkakun e një "metamorfoze" të tillë të premtimit zyrtar të tyre. Krerët e futbollit shqiptar më kot janë munduar të "përgënjeshtrojnë" vetveten dy ditë më pas, kur kanë dalë me një tezë tjetër, se bëhej fjalë për kombëtaren e 17-vjeçarëve të Nigerisë e jo për ekipin e parë. E vërteta është se në FSHF ka mbërritur një përgjigje e dytë nga homologia e saj afrikane, pas të parës, e cila i ka bërë fëshëfistët të shqyejnë sytë të habitur. "Ne nuk arrijmë dot t'i mbledhim futbollistët e kombëtares së parë për të ardhur në Tiranë, për të luajtur një takim miqësor me ju, por në vend të tyre do të sjellim 17-vjeçarët." Kjo frazë ka qenë thelbi i përgjigjes kompensuese të Federatës Nigeriane të Futbollit, e cila i ka shuar shpresat e drejtuesve të Federatës sonë, të cilët thuajse e kishin fjetur mendjen për miqësoren e 20 nëntorit. Që nga kjo ditë, u bë pothuaj një javë dhe në institucionin qendror të futbollit shqiptar, askush nuk mundet të thotë se kjo miqësore do të luhet apo jo. Në sektorin e ekipeve kombëtare kanë filluar të ndërtojnë grafikë të ndryshëm për një takim të mundshëm miqësor të 17-vjeçarëve nigerianë me homologët tanë të kësaj grup-moshe, më datën 25 të këtij muaji. Gjithsesi, edhe për këtë miqësore "të vegjlish", thuhet se ende nuk ka asgjë zyrtare, por bisedimet vazhdojnë.
Dy krerët e futbollit tonë kanë qenë jashtë shtetit për shërbime të ndryshme zyrtare, ndërsa vartësit e tyre vetëm sa arrijnë të gjerbin kafen në lokalin poshtë zyrave të tyre, pa qenë në gjendje të tregojnë se ç'do të bëhet për miqësoren e 20 nëntorit. Gjithsesi, një gjë e sigurt po përvijohet dalëngadalë: ditët po kalojnë dhe, sipas të gjitha gjasave, kombëtarja jonë e futbollit nuk do të ketë kundërshtar për këtë miqësore. Trajneri Dosena vazhdon të mos bëhet i gjallë, duke i ngatërruar më keq punët në tentativat e dëshpëruara për sigurimin e një kundërshtari. Në këtë mënyrë, është krijuar një hallakatje e tillë, sa që Federata e Futbollit nuk është në gjendje të nisë ftesat zyrtare për klubet e huaja ku luajnë futbollistët tanë. Sidoqoftë, kohë ka ende për të fituar një kundërshtar, madje ka plot skuadra të lira, pa dashur të shkojmë deri në Afrikë. Po të shikosh kalendarin e çifteve të përballjeve në datën e mësipërme, vetëm gjysma e numrit të përgjithshëm të përfaqësueseve të Evropës në futboll (26 përfaqësuese) kanë prenotuar miqësore. Për këtë flasin ndeshjet miqësore, të programuara për t'u luajtur më 20 nëntor, ku Shqipëria dhe shumë homologe të saj mbeten jashtë.
A. LLESHI