Tiranë: Bardheblutë munden 2-0 në derbi me të kuqtë

Partizani, fitorja që erdhi nga stoli

Nga Tirana, Aurel CELIBASHI
Tirana - Partizani 0-2
Shënues: Princ 62', Zheraldinjo 83'

1. Hidi 6
2. Vata 6
3. Dabulla 6.5
4. Lici 6
5. Sina 5.5 (Fortuzi 66')
6. Patushi 6 (Agolli 82')
7. Jupi 6
8. Muka 6
9. E.Bulku 5.5
10. F.Xhafa 6 (A.Tafaj 77')
11. Merkoçi 6
Trajner: E.Haxhiabdiç

1. Nallbani 6.5
2. Behari 6.5
3. Brakini 6.5
4. F.Tafaj 6 (Muzaka 46')
5. Ndreka 6
6. Beqiri 6.5
7. Dhëmbi 7
8. Zheraldinjo 6.5
9. Prince 6.5 (Marselinjo 70')
10. Karioka 6
11. Soni 6.5 (Allaçi 80')
Trajner: N.Bajko

Gjyqtar: A.Janku, A.Pregja (Tiranë), A.Mali (Patos)
Kartona të verdhë: Ndreka, Soni, Behari, Beqiri, Brakini, E.Bulku, Fortuzi, Patushi
Kartona të kuq: E.Bulku

Radiografia
2' Jupi fiton një goditje dënimi jashtë zone. Gjuan E.Bulku dhe grushton Nallbani.
8' Kundërsulm i Partizanit me Kariokën, por ndërpritet nga Dabulla.
10' Rast i pastër për Tiranën, gjuan Xhafa dhe Brakini largon topin nga vija fatale.
13' Krosim në zonë nga e djathta, gjuan sërish Xhafa dhe topi përfundon në tranversë.
23' Goditje këndi për bardheblutë, kroson Jupi, largon mbrojtja e Partizanit. Më pas topi kthehet sërish në këmbët e Jupit, i cili godet, por grushton Nallbani.
26' Goditje këndi për Partizanin, kroson Zheraldinjo dhe Soni afër me portën nuk godet ashtu siç duhet.
29' Shpërthimi i fuqishëm i Licit në të majtë, por afër me zonën pengohet me faull nga Brakini.
38' Faull i rëndë Beqirit në mesfushë ndaj Vatës, që ndëshkohet me karton të verdhë.
45' Galopim i Ndrekës nga mbrojtja në sulm, por nuk pason siç duhet.
47' Merkoçi futet në zonë, gjuan dhe mbrojtja e largon topin në fundore.
49' Brakini futet në zonën e Tiranës, gjuan dhe E.Bulku largon topin nga vija fatale.
55' Sulm i Tiranës në krahun e djathtë me Mukën, i cili pengohet jashtë zone.
58'Kontroll i tepërt i topit nga Nallbani, i cili rrezikon duke e larguar keq topin.
60' Kombinim spektakolar midis Xhafës dhe Merkoçit, godet ky i fundit dhe topi përfundon sërish në tranversë.
62' Kundërsulm i menjëherëshëm i Partizanit, Beqiri nga e djathta kroson në zonë, aty Princ godet menjëherë dhe 1-0.
66' Shpërthimi i fuqishëm në mesfushë i Princ, që pengohet nga E.Bulku, i cili merr edhe kartonin e dytë të verdhë. Tirana mbetet me 10 lojtarë.
70' Brakini pengon me faull në mesfushë Fortuzin.
77' Kombinim midis Fortuzit dhe Merkoçit, i cili gjuan dhe Nallbani bën mrekulli.
80' Depërtimi i fuqishëm i Merkoçit në të djathtë, gjuan dhe sërish Nallbani nuk lejon prekjen e rrjetës.
83' Kalimi i bukur i Muzakës në të djathtë, kroson dhe gjen të lirë Zheraldinjon, i cili shënon golin e dytë.
88'Kros i Mukës në të djathtë, pret Nallbani, i cili ishte në një formë të mirë.
90' Kalimi i shpejtë i Agollit në të majtë, kroson dhe Fortuzi e shtyn topin në rrjetë me dorë.

Enver Haxhiabdiç, trajner i Tiranës: Nuk u prononcua

Neptun Bajko, trajner i Partizanit: Jam i kënaqur nga fitorja e skuadrës. Ashtu siç e kisha theksuar edhe më parë, kjo ndeshje kishte shumë rëndësi për opinionin sportiv, sepse ishte një derbi. Të dyja skuadrat zhvilluan një ndeshje shumë të mirë, në pjesën e parë të lojës skuadre e Tiranës krijoi më shumë raste të për shënim. Në pjesën e dytë, falë edhe disa lëvizjeve taktike, zhvilluam një lojë më racionale, duke arritur edhe të shënonim dy gola. Kjo fitore në jep edhe më shumë moral në rrugën e gjatë të titullit kampion. Falënderoj tifozerinë e zjarrtë të Partizanit, e cila ishte një mbështetje e madhe për djemtë në fushën e lojës.

Specialisti
Nga Kreshnik Agolli
Mendoj se skuadra e Partizanit e kishte zgjidhur taktikisht më drejt ndeshjen se Tirana. Meqë skuadra e kuqe kishte edhe dy mungesa në formacion, Abilion dhe Roshën, kishte vendosur të luante më e ngjeshur në mbrojtje dhe mesfushë, duke lënë një sulmues të avancuar. Përveç vendosjes së mirë taktike të ndjekur nga trajneri Bajko, Partizani e fitoi ndeshjen edhe falë shpirtit të madh të garës që tregoi në fushën e lojës. Ndërsa për skuadrën bardheblu mund të them se i mungoi shpirti i lartë i garës, çka nuk e ka treguar as në ndeshjet e tjera. Nuk e kuptoj se si Tirana me këtë grup lojtarësh cilësorë në përbërje, lë shumë për të dëshiruar. Besoj se e meta e kësaj skuadre qëndron në mangësitë në drejtim dhe orientimi i lojtarëve në fushë.

Të veçanta
- Presidenti i Tiranës, El Sajed dhe ai Partizanit, Albert Xhani, ishin ulur krah njëri-tjetrit në tribunën VIP. Ky i fundit kishte marrë edhe vajzën e tij për të ndjekur ndeshjen.
- Në tribunën VIP binte në sy prania e madhe e deputetëve dhe ministrave.
- Në tribunë A të stadiumit "Qemal Stafa" ndodhej dhe menaxheri i holandezit Jan Venhof.
- Ndeshja ndaj Partizanit qe e para për goleadorin Indrit Fortuzi në këtë kampionat.
- Gjatë 30 minutëshit të nxehjes, trajnerit boshnjak i është ndërruar mendja dhe e ka zëvendësuar Venhofin me E.Bulkun.
- Ndryshe nga ndeshjet e tjera të këtij kampionati, tifozeria e skuadrës bardheblu e ka mbushur pothuajse tribunën përballë stadiumit.
- Pas përfundimit të ndeshjes, lojtarët e Partizanit kanë shkuar te tribuna e tifozëve dhe u kanë hedhur fanelat e tyre.

Trajneri i të kuqve shprehet i kënaqur për fitoren e arritur ndaj Tiranës në derbi

Bajko: Partizani, ende nuk është në krye

Neptun Bajko është ulur në stolin e kuq këtë sezon dhe ka drejtuar Partizanin në të gjitha takimet e deritanishme. Me të kuqtë Bajko e filloi keq, por, më pas, nga java në javë Partizani filloi të ngjisë shkallët e renditjes, duke mos humbur asnjë ndeshje. Para derbit, Partizani ndodhej i shkëputur nga kryesuesja, Tirana, me tri pikë. Dje Bajko me Partizanin arritën të mposhtin bardheblutë, duke kaluar në vendin e parë. Trajneri i Partizanit në një intervistë për "Sportin shqiptar" shprehet i kënaqur për fitoren e arritur, por thekson se kampionati nuk ka përfunduar këtu:
- A jeni i kënaqur me fitoren e sotme?
- Ashtu siç është komentuar nga opinioni sportiv gjatë ditëve të fundit, ndeshja e derbit do të ishte përcaktuese në luftën për titull dhe ekipi që do të fitonte do t'i gëzohej shumë asaj. Prandaj edhe unë jam i kënaqur me pikët e marra dhe nga fitorja e arritur sot ndaj Tiranës.
- Fituat ndeshjen e derbit me ekipin e Tiranës. Pavarësisht nga fitorja, ç'mund të thoni për lojën e Partizanit?
- E pata theksuar edhe më parë se e rëndësishme për të dy ekipet ishte të zhvillonin një ndeshje të bukur, për të kënaqur sportdashësit e shumtë që kishin mbushur shkallët e stadiumit. Dhe, ashtu siç parashikohej, të dyja ekipet e kryeqytetit luajtën taktikisht mirë dhe në disa momente dhuruan edhe spektakël në fushë. Pjesa e parë u dominua, përgjithësisht, nga ekipi i Tiranës. Ata ishin më të qartë në veprimet e tyre, krijuan më shumë volum loje dhe njëkohësisht patën më shumë raste për shënim. Por dua të theksoj se, megjithëse krijuan raste, nuk ishin shumë të rrezikshëm para portës. Taktikisht në pjesën e parë ne ishim rreshtuar pak gabim dhe kjo ndikoi disi në hapësirat që u krijuan dhe që i dhanë mundësi kundërshtarit të depërtonte më me lehtësi në zonë. Në pjesën e dytë, ne u futëm në fushë për të ndryshuar rrjedhën e lojës dhe mendoj se ia arritëm qëllimit. Lojtarët luajtën përgjithësisht mirë dhe deri në minutën e fundit nuk lëshuan aspak në lojë. Dy golat e shënuar ishin pjesë e lojës së kujdesshme të ekipit, i cili u mbrojt me mjaft kujdes dhe, nëpërmjet kundërsulmit, arriti të bënte atë që kisha planifikuar.
- Po tani që Partizani doli në krye të renditjes, ç'mund të thoni?
- Jo, Partizani ende nuk është në krye të renditjes. Sot ne mundëm ekipin e Tiranës dhe jemi barazuar me pikë. Pra, kampionati ka dy ekipe në krye dhe lufta për titull është shumë më e fortë. Unë e kisha theksuar javën e kaluar se kampionati tani ka filluar. Pas derbit të sotëm e në vazhdim, besoj se do të jetë edhe më ineresant, për faktin se Tirana u ndal dhe ka ka një humbje, ashtu si edhe ne. Unë e pata theksuar këtë dhe e them, jo se po fiton Partizani, por sepse kampionati tani është më i fortë ngaqë, përveç dy ekipeve kryesuese, janë edhe dy-tri ekipe të tjera që kërkojnë të arrijnë kreun e renditjes.
- Po, për të ardhmen çfarë mendoni?
- Fitorja e sotme duhet të mos ndikojë negativsht në takimet e tjera, pasi na pret një kampionat, i vështirë dhe i bukur njëkohësisht. Besoj se me punë të vazhdueshme do të përpiqemi të ecim mirë në të ardhmen.
Aranit MURAÇI

Brazilianët, samba pas fitores
Është kthyer në një atmosferë festive fitorja e Partizanit ndaj Tiranës nga ana e tifozerisë së kuqe. Shumë ultras kanë dalë para stadiumit "Qemal Stafa" dhe kanë filluar të brohorasin në kor fitoren e madhe ndaj Tiranës. Ndërkohë që nga dhomat e zhveshjes dilnin futbollistët e Partizanit, ovacione të shumta drejtoheshin në mbështetje të tyre. Lojtarët brazilianë të Partizanit, para se t'i drejtoheshin autobusit të klubit, kanë dalë në sheshin para stadiumit dhe kanë filluar të kërcejnë samba, duke e ndezur më shumë atmosferën sportive. Me ta janë bashkuar edhe dy nigerianët: Prinsi, që shënoi golin e parë si dhe Soni. Së bashku me qindra tifozë të kuq lojtarët e huaj kanë kërcyer dhe i kanë dhënë më shumë gjallëri fitores së Partizanit. Gëzimi dhe festa e tifozëve të Partizanit kishte arritur kulmin e saj. Për të mbajtur nën kontroll situatën, ishin të pranishëm shumë forca policore, që pas disa minutash e shpërndanë turmën pa krijuar asnjë incident. Ndërkohë, të gjithë lojtarët e kuq u larguan me autobusin e klubit. Partizani, me fitoren e djeshme, është ngjitur në vendin e parë me pikë të barabarta me Tiranën. Golat e shumtë të shënuar në ndeshjet e fundit bëjnë që ekipi i Bajkos, pas javës së nëntë të kampionatit, të kryesojë tabelën e klasifikimit, duke lënë pas Tiranën me golavarazh.
A.MURAÇI

Sporti Shqiptar