Turi i tretë i Kupës përvijon ballafaqime interesante, prej të cilave edhe gjigandë të futbollit shqiptar

Vllaznia-Partizani, finalja e parakohshme

Turi i tretë i Kupës së 51-të të Shqipërisë:
(22 shkurt dhe 9 prill)
Vllaznia - Partizani
Flamurtari - Teuta
Shkumbini - Tirana
Lushnja - Dinamo

Turi i tretë i Kupës së Shqipërisë ka përvijuar ballafaqime shumë interesante të skuadrave që vazhdojnë luftën sportive për ta fituar këtë trofe. Gjithçka është kristalizuar pas hedhjes së shortit të ditës së djeshme në mjediset e Federatës Shqiptare të Futbollit. Tetë skuadrat e mbetura në garë, pas përfundimit të turit të dytë të kësaj veprimtarie, janë ndarë në dy grupe sipas renditjes së vjetshme në kampionat dhe kanë formuar katër çiftet që do të përbëjnë turin e tretë të Kupës. Shorti ka vënë përballë edhe dy skuadrat me traditë të madhe në futbollin shqiptar: Vllazninë dhe Partizanin. Madje, nga të gjithë specialistët e pranishëm në hedhjen e shortit, kjo përplasje është konsideruar si finalja e parakohshme e Kupës. Sektori i garave në FSHF, përpara se të fillonte procedurën e hedhjes së shortit, i ka mbledhur në një bashkëbisedim të gjithë përfaqësuesit e klubeve të mbetura në këtë garë, me të cilët është diskutuar për ndryshimin e datave të zhvillimit të ndeshjeve të mbetura të Kupës. Pas disa mendimesh të ndryshme, përfundimisht është rënë dakord që ndeshjet e para të turit të tretë të Kupës të luhen më datën 22 shkurt, në fushën e skuadrave të konsideruara më të dobëta (sipas renditjes së vjetshme në kampionat), ndërsa takimet e kthimit të luhen gati 2 muaj më pas e pikërisht më 9 prill të këtij viti. Ndryshime e spostime datash në zhvillimin e ndeshjeve të mëtejshme të kësaj veprimtarie ka pasur edhe për turin e katërt, për të cilin dje janë fiksuar datat 23 prill dhe 7 maj. E pandryshueshme ka mbetur data e finales së Kupës, e cila do të luhet sipas parashikimit të fillim sezonit, më 31 maj. Gjithsesi, që dje, skuadrat që do të vazhdojnë konkurrimin në këtë garë i kanë marrë vesh kundërshtarët e tyre dhe do të fillojnë përgatitjet për t'u paraqitur sa më denjësisht në të, pasi secila skuadër kërkon të kualifikohet për më tej dhe ta shohë veten në finale. Në krye të ndeshjeve të turit të tretë të Kupës qëndron çifti Vllaznia-Partizani, ndërkohë që nuk mbeten prapa as çiftet Flamurtari-Teuta, Shkumbini-Tirana dhe Lushnja-Dinamo.

Thanë pas hedhjes së shortit
Vllaznia-Partizani
Astrit Hafizi (Vllaznia): "Për ne shorti ishte i vështirë në të gjitha drejtimet, që përpara se të hidhej. I njëjti vlerësim ekziston edhe tani, pasi e kemi mësuar kundërshtarin tonë. Nuk e mbështes këtë gjykim te përballja me një skuadër të tillë si Partizani, i cili është shumë ambicioz në këtë kampionat, por te specifika e zhvillimit të ndeshjeve të Kupës dhe renditja e kampionatit të kaluar. Të dyja skuadrat kanë pretendime dhe janë të denja për t'u kualifikuar për më tej. Kam mendimin se të dyja ndeshjet do të jenë shumë interesante, pasi është çifti më i fortë i kësaj veprimtarie, në këtë tur. Vlerësimi ynë për këtë veprimtari është maksimal, duke ditur që Vllaznia i synon të dyja trofetë, si kampionatin, ashtu edhe Kupën".
Gjergji Thaka (Partizani): "Shorti bën çudira dhe një gjë të tillë e bëri sot (dje) me përplasjen e Partizanit me Vllazninë. Është një ndeshje që nuk i lë gjë mangut një finaleje. Duke qenë se është çifti më i fortë, e kam shumë të vështirë të parashikoj skuadrën që mund ta kalojë këtë tur, sepse skuadrat kanë ambicje të njëjta dhe i synojnë të dyja trofetë. Nuk kemi rrugë tjetër, përveçse të synojmë suksesin, sepse, siç kemi thënë që nga fillimi i sezonit, Partizani lufton në të dyja frontet: si për kampionat, ashtu edhe për Kupë. Shpresojmë të jemi ne të kualifikuarit e këtij çifti".

Lushnja-Dinamo
Agim Mone (Lushnja): "Të gjitha këto ekipe, që u hodhën në shortin e sotëm (djeshëm), e kanë merituar të vijnë deri këtu. Pra, të gjitha janë ekipe të vështira për t'i pasur kundërshtarë. Shorti na vuri përballë Dinamon, një kundërshtar që na bën të mbledhim forcat e ta vlerësojmë maksimalisht. Duke qenë se ndeshjen e parë e kemi në Lushnjë, do të kërkojmë që gjithçka ta zgjidhim në fushën tonë".
Gani Xhafa (Dinamo): "Nuk mund të themi se shorti na favorizoi, sepse përballë do të kemi skuadrën e Lushnjës, e cila është paraqitur gjithmonë mirë në ndeshjet e Kupës, në vitet e fundit. Pra, duke vlerësuar në këtë mënyrë, nuk mund të gjykoj se ne jemi më të privilegjuar. Kupa ka specifikë të veçantë dhe shumë të papritura. Megjithatë, Dinamoja pretendon ta kalojë këtë tur, për të vazhduar synimet e saj për fitimin e këtij trofeu. Asgjë nuk është e garantuar, pasi të gjitha çiftet janë të forta dhe të paparashikueshme".

Shkumbini-Tirana
Naim Lluca (Shkumbini): "Shorti u tregua disi i egër ndaj nesh, pasi përballë do të kemi kampionen e dimrit, Tiranën. Megjithatë, të gjitha skuadrat që kanë ardhur deri në këtë tur janë pak a shumë të denja për njëra-tjetrën. Në këtë valle bëjmë pjesë edhe ne, duke qenë se kemi pretendime serioze për këtë aktivitet. Ndeshjen e parë do ta luajmë në fushën tonë, prandaj do të përpiqemi të bëjmë më të mirën që në Peqin, për të shkuar më të qetë në ndeshjen e kthimit në kryeqytet".
Florian Riza (Tirana): "Që përpara shortit e kishim mendjen të mbledhur se përpara do të kishim një kundërshtar të fortë. Për mendimin tim, të gjitha skuadrat që e kaluan turin e dytë të Kupës janë të denja për të rivalizuar deri në fund të Kupës. Një nga këto është edhe Shkumbini i Peqinit. E vlerësojmë si skuadër, megjithatë besoj se do të arrijmë ne të kualifikohemi".

Flamurtari-Teuta
Latif Gjondeda (Flamurtari): "I rëndësishëm për ne është fakti që u shpëtuam kundërshtarëve të kryeqytetit. Përballë do të kemi Teutën e Durrësit, me pretendime për më tej. Është një përplasje bregdetarësh dhe kam besim se skuadra që do të kualifikohet për më tej do të jemi ne. Kam një parandjenjë se këtë herë do të kujtojmë Flamurtarin e dikurshëm, pasi synimet tona janë për të arritur deri në finale e për ta fituar këtë trofe".
Hasan Lika (Teuta): "Nuk kishim ndonjë parapëlqim për kundërshtarin përpara hedhjes së shortit. Të gjitha skuadrat janë vërtet të forta. Përballë do të kemi Flamurtarin, i cili ka bërë një figurë të mirë në fazën e parë të këtij kampionati. Mendoj se është një çift shumë interesant dhe kualifikimi do të mbetet enigmë deri në minutën e fundit të të dyja ndeshjeve si në Vlorë, ashtu edhe në Durrës".

Sulejman Mema (shefi i sektorit të garave, FSHF):
"U uroj suksese të gjitha skuadrave dhe shpresoj të bëjnë një luftë të ndershme sportive në turet e mbetura të Kupës. Menduam t'i ndryshojmë datat e parashikuara për zhvillimin e tureve vijuese të këtij aktiviteti, për shkak të mungesës së terreneve të duhura sportive, sidomos në kryeqytet ku luajnë tri skuadra. U kërkuam klubeve që turi i tretë i Kupës të fillojë me datën 22 shkurt, meqë edhe futbollistët e disa skuadrave kryesore janë në aktivitet ndërkombëtar. Po të njëjtën marrëveshje arritëm edhe për zhvillimin e ndeshjeve të kthimit, në muajin prill. Këtë ndryshim e bëmë për arsye se në kryeqytet do të luajnë tri skuadra. Duke pasur parasysh se në 9 prill do të jetë hapur edhe stadiumi kombëtar "Qemal Stafa", ndeshjet mund të shpërndahen në dy stadiumet e kryeqytetit. Më datën 9 prill u la që ndeshja e Partizanit me Vllazninë të luhet në "Qemal Stafa", ndërsa ndeshja e Dinamos me Lushnjën dhe ajo e Tiranës me Shkumbinin do të zhvillohen më datën 8 dhe 10 prill, në stadiumin "Selman Stërmasi".
A. LLESHI

Trajneri i Partizanit thotë se ekipi i tij është i lodhur nga ndeshjet me terrene të vështira

Bajko: Me Vllazninë luhet futboll

Dje, në mjediset e FSHF-së, është hedhur shorti i turit të tretë të Kupës së Shqipërisë. Çifti Partizani-Vllaznia ka qenë edhe më interesanti nga ndeshjet që do të luhen për çerekfinalet e kupës. Pas hedhjes së shortit, drejtuesit e kuq theksuan se Partizani do të ketë përballë një nga ekipet më të forta të vendit, por kjo nuk do të thotë që ekipi i tyre është i frikësuar.
Trajneri Bajko, pas hedhjes së shortit të kupës, në një deklaratë për "Sportin shqiptar" u shpreh: "Sot kisha seancën e fundit stërvitore me ekipin; lajmin se përballë na kanë rënë Vllaznia e mësova nëpërmjet telefonit, gjatë kohës që po kthehesha me autobus në klubin tonë, së bashku me lojtarët. Kur lojtarët e dëgjuan se nga shorti i hedhur ka rënë pikërisht Vllaznia, u gëzuan jashtë mase, madje edhe brohoritën. Ata nuk e bënë këtë sepse Vllaznia është një ekip që kalohet lehtë, por gëzimi i tyre ka të bëjë me terrenet sportive ku do të luhen ndeshjet. Ka disa takime radhazi, të cilat Partizani i luan në fusha ku vetëm futboll nuk mund të luhet, prandaj të gjithë kemi mbetur të zhgënjyer dhe na ka marrë malli të luajmë në një fushë të vërtetë futbolli. "Loro Boriçi" është shembull për terrenet sportive, prandaj me Vllazninë, të paktën, e dimë që do të luajmë në një fushë futbolli. Kjo më kënaq edhe mua personalisht. Gjithashtu, edhe interesi i tifozëve, përsa i përket kësaj ndeshjeje do të jetë më i madh", - tha trajneri i të kuqve.
Më pas Bajko foli edhe për gjendjen e ekipit të tij, pas kualifikimit të turit të dytë të Kupës së Shqipërisë. "Ekipi ka punuar këto ditë dhe, siç e kam thënë, gjendja fizike e lojtarëve më kënaq më shumë se çdo aspekt tjetër. Deri tani, përsa u përket ndeshjeve të Kupës, kemi luajtur me ekipe, që nuk kanë synime serioze në kampionat apo edhe në Kupë. Prandaj ndeshja me Vllazninë është edhe një moment mjaft domethënës për të treguar forcën tonë në prag të fazës së dytë. Përballë skuadrave të tilla, si Bylisi, e kishim disi të lehtë kalimin e turit, por e kemi pasur njëkohësisht të vështirë të luajmë futboll. Ndërsa me Vllazninë është e kundërta e ndeshjes me ballshiotët. Për ekipin që unë drejtoj, mendoj se është një ndeshje kyçe dhe mjaft domethënese për ecurinë e mëtejshme në kampionat. Ndeshja e kthimit me shkodranët për kupën do të luhet në muajin prill, pas ndeshjes së fazës së dytë të kampionatit, që i bie të jetë zhvilluar në muajin mars. Një rezultat negativ apo i padëshiruar në ndeshjen e parë kam mendimin se do të ndikojë në psikologjinë e ekipit tonë dhe mund të ketë pasoja në ndeshjet e para të kampionatit. Prandaj ndeshja e parë e kupës është mjaft e rëndësishme për skuadrën tonë. Do të përpiqemi që gjatë këtyre ditëve të ndryshojmë diçka nga anët negative, me qëllim që të prezantohemi sa më mirë në Shkodër", - e përfundoi fjalën e tij trajneri Bajko.
Të kuqtë kanë kaluar në çerekfinalen e Kupës pa humbur asnjë ndeshje. Ata kanë fituar dy takimet me Pogradecin, me rezultatin e përgjithshëm 7-2. Ndërsa në turin e dytë, të luajtur para pak ditësh, Partizani i ka fituar sërish të dyja ndeshjet, me rezultatin e përgjithshëm, 6-1. Synimi i skuadrës së Bajkos, përsa i përket Kupës, është i qartë: fitimi i saj. Por tani ata do të tregohen më të matur, pasi përballë do të kenë Vllazninë, e cila, ashtu si edhe Partizani, ka të njëjtat synime si në Kupë, edhe në kampionat.
Aranit MURAÇI

Beqiri, i gatshëm me Vllazninë
Ardit Beqiri, lojtari energjik i Partizanit, i cili ka qenë i dëmtuar në ndeshjet e fundit, është kthyer në gjendjen e tij të përshtatshme. Beqiri i ka munguar Partizanit në takimet e Kupës, për shkak se ka pësuar një dëmtim (jo shumë të rëndë) në stërvitjen me ekipin e tij. Ai ka disa ditë që është kthyer në stërvitje me shokët e tjerë të skuadrës. Pas stërvitjes së djeshme, Beqiri tha se nuk ndien më dhimbje, ndaj është i gatshëm t'i shërbejë ekipit në takimin e radhës me Vllazninë. Mbrojtësi i të kuqve, Beqiri, ishte edhe një nga lojtarët e thirrur nga Brigeli, por dëmtimi i tij ia hoqi këtë privilegj, duke u lënë hapësirë disa prej lojtarëve të tjerë të kampionatit tonë.

Grizha, stërvitje me të kuqtë
Sulmuesi i Partizanit, i huazuar te Besa e Kavajës, ka dalë dje në stërvitje së bashku me lojtarët e tjerë të klubit të kuq. Siç dihet, lezhiani i Partizanit është huazuar së bashku me një lojtar tjetër të ri të këtij ekipi, Lushajn, deri në fund të këtij sezoni te ekipi i Besës. Në takimin me Tiranën, Grizha luajti me ngjyrat e kavajasve disa minuta në fund të ndeshjes. Praninë e tij në stërvitje me të kuqtë drejtori Thaka e quajti normale, duke e argumentuar atë me faktin se lojtari është i Partizanit dhe nuk mund të ndalohet të bëjë stërvitje me ekipin. Sipas drejtorit të Partizanit, Lushaj nuk është më i huazuar te Besa, ndaj do të qëndrojë për t'u stërvitur këtu, ndërsa Grizha është akoma lojtar i huazuar te kavajasit.

Brakini, me familje në Tiranë
Edhe braziliani Brakini do të marrë familjen e tij në Tiranë. Pas Kariokës dhe Zheraldinjos, të cilët jetojnë për momentin në kryeqytet, së bashku me familjet e tyre, braziliani i tretë, mbrojtësi Brakini, pritet të bëjë të njëjtën gjë. Brakini tha dje se po kërkon një apartament me qira, me qëllim që të marrë në Shqipëri bashkëshorten dhe fëmijën e tij katërvjeçar.
Abilio (i përjashtuar tashmë nga ekipi) ka qenë i pari nga brazilianët që ka marrë familjen në Tiranë. Ai është pasuar nga Karioka dhe, para pak muajsh, edhe nga Zheraldinjo. Brakini kishte mbetur lojtari i fundit dhe i vetëm pa familjen në Shqipëri.
A.MURAÇI