Pamje nga Ndeshja Dajti-Kastrioti Të gjitha të drejtat e rezervuara

Grupi A
Laçi - Kukësi
Korabi - Dajti
Kastrioti - Iliria
Veleçiku - Rrësheni
Burreli - Albania
Ada - pushim

Grupi B
Tomori - Gramozi
Devolli - Pogradeci
Sopoti - Cërriku
Melesini - Maliqi
Gramshi - Domosdova
Skënderbeu - Naftëtari

Grupi C
Butrinti - Luftëtari
Tpelena - Memaliaj
Përmeti - Këlcyra
Albpetrol - Poliçani
Egnatia - Çlirimi
Delvina - Skrapari

Presidenti dhe drejtuesit e klubit kanë mbetur të pakënaqur nga loja e ekipit matjan
Burreli në alarm për humbjen
Ekipi matjan e kishte menduar krejt ndryshe takimin në Laç, por rrjedha e ngjarjeve i diktoi Burrelit humbjen 2-1. Ajo që ra në sy lidhet me fakin se futbollistët e këtij ekipi nuk mundën të shënonin asnjë gol. Për të formuar rezultatin e takimit, ekipi vendas, në të tri rastet, i tundi vetë rrjetat. Takimi Laçi-Burreli, i luajtur në një terren rrëshqitës, nuk e kaloi dot nivelin mesatar të ekipeve të kategorisë së dytë. Megjithatë, fitorja u ka buzëqeshur vendasve, që kanë kaluar në epërsi me anë të Gjinit, në minutën e 10-të. Më pas, epërsia e vendasve nuk ka pushuar deri kur Biba, në minutën e 40-të, ka thelluar rezultatin dhe Laçi e ka parë fitoren "të ligjëruar" 2-0. Në vazhdim, sulmuesit matjanë kërkuan të shfaqin vlerat e lojës së tyre dhe përvojën si ekip me potencë. Ata e sulmuan disa herë portën e portierit Agolli, por sulmuesit Kalthi, Zhuli dhe Kola nuk mundën të shënonin. Në minutën e 77-të, mbrojtësi laçjan Jushi e ka përcjellë topin në rrjetën e portës së tij, duke shkurtuar diferencën e golave.
Ka mjaftuar kjo që, pas ndeshjes dhe me kthimin e ekipit në Burrel, drejtuesit e klubit t'u bien "kambanave" të alarmit. Për takimin Laçi-Burreli, sportdashësit matjanë, në asnjë rast, nuk e kishin menduar se ekipi i tyre do të kthehej me humbje. Humbja e paparashikuar ka diktuar që analizat të bëhen konkrete, për ta ndihmuar ekipin të dalë sa më parë nga gjendja e vështirë. Këtë e ka kërkuar edhe presidenti i klubit, Petrit Skura.
Përpos halleve që kanë matjanët, drejtuesi i klubit, Baftjar Punavia, veçon mungesën e të hollave në menaxhimin e situatave (lëvizjet jashtë rrethit) ku mungojnë paratë. Ai këmbëngul se nga ekipi kërkohet stërvitje intensive. Por Punavija e quan të papranueshme çdo vonesë të bashkisë për të dhënë pagesat përkatëse (është fjala për pagesat e kërkuara nga sektori i FSHF-së, prej 1.5 milionë lekësh) etj. Gjithsesi, duhen bërë llogaritë, madje fondet të racionohen sipas përkatësisë në sportet. Deri më sot, këto llogari nuk janë bërë, ose ka ndonjë anashkalim që mendohet ta analizojnë ata që u përket.
Avni Kërtuka

Trajneri dibran mendon se do ta harrojnë shpejt shijen e humbje së parë
Korabi ngushëllohet me ndihmën e bashkisë
Më në fund, Bashkia e Peshkopisë është kujtuar se edhe në këtë qytet luhet futboll. Me një vendim të posaçëm nga ana e bashkiakëve dibranë, këto ditë ekipit të futbollit Korabi, pjesëmarrës në kampionatin e kategorisë së dytë, i është akorduar një fond prej 5 milionë lekë (të vjetra). Trajneri i dibranëve, Njazi Dani, i cili këtë vit do ta shoqërojë i vetëm skuadrën, sepse Premçi prej kohësh ka dhënë dorëheqjen për motive personale, shprehet kështu për gazetën "Sporti shqiptar": "Fondi i akorduar nga ana e bashkisë sonë do të përqendrohet për të përballuar shpenzimet e aktivitetit. Nga ana e bashkiakëve të qytetit tonë na është premtuar se ndihma do të jetë e vazhdueshme."
Ekipi dibran, ndryshe nga vitet e kaluara, kur është grumbulluar disa ditë para fillimit të kampionatit, këtë vit, përgatitjet për të përballuar sezonin e ri i ka nisur më herët. Sipas trajnerit Dani, ekipi është mbushur me elementë të rinj, me dëshirë për t'u përgatitur e për të përfaqësuar me dinjitet ngjyrat e qytetit të tyre. Këto ditët e fundit, skuadra dibrane ka zhvilluar dy takime miqësore. Takimin e parë e ka zhvilluar me Burrelin (rival edhe këtë vit në grup) si dhe me Korabin e Dibrës së Madhe. Ndonëse takimet e zhvilluara kanë qenë të pakta, tekniku Dani është i kënaqur me elementin që ka në ekip. Por ajo që është më kryesore lidhet me takimin e parë të kampionatit që dibranët luajtën të dielën në Kukës. Humbja me rezultatin 1-0 edhe mund të pritej, sepse dihet që kuksjanët janë mjaft të fortë në fushën e tyre. Gjithsesi, duke ndier mbështetjen e bashkisë, ekipi ka mundësi të bëjë kthesën e kërkuar në takimin e ardhshëm.
Nderim Goci

Skënderbeu: Humbja erdhi nga gjyqtari
Korçarët, edhe pse luanin në një fushë asnjanëse, në javën e parë të kampionatit të kategorisë së dytë, ndaj Tomorit, nuk kanë arritur të marrin qoftë edhe një pikë të vetme, që do të ishte një start i mbarë. Menjëherë pas humbjes 3-1 në Kuçovë, kampi i Skënderbeut nuk është dakort me këtë humbje, që, sipas tyre, ka emrin e gjyqtarit nga Memaliaj, Duraj. Të dy trajnerët e Skënderbeut, Jani Kaçi
dhe Robert Çingo, dje, një ditë pas javës së parë, për "Sportin shqiptar" do të pohonin: "Na vjen vërtet keq për humbjen që pësuam në javën e parë, por nuk na vjen mirë që qysh pas kësaj jave të kemi rezerva për gjykimin. Gjithçka kishte përfunduar pa nisur takimi dhe gjyqtari Duraj nga Memaliaj nuk e pati aspak të
vështirë të na dënonte qysh në fillim. Dy 11-metërsha dhe një gol në pozicion jashtë lojë ishin gjithçka për t'i dhënë fund një humbjeje që ishte e pamundur për ta shmangur. Qysh në minutën e 7-të është dhënë një 11-metërsh i paqenë. E njëjta skemë u përdor edhe në pjesën e dytë, ku u dha një 11-metërsh tjetër. Ndërkohë, goli i dytë i beratasve ishte në pozicion të dukshëm jashtë loje, por qe e pamundur për të ngritur zërin, pasi çdo gjë ishte e përfundur. Këto dhe shumë të tjera na bëjnë të ndihemi keq që në javën e parë, duke filluar me ankesa ndaj gjykimit që në 90 minutat e para. Kjo që i ndodhi Skënderbeut nuk është shenjë e mirë për futbollin shqiptar. Gjithçka ka përfunduar dhe ne e dinim se do ta kishim të vështirë ndaj Tomorit, i cili u ndihmua të fitonte edhe nga gjyqtari. Shpresojmë që këto të mos ndodhin në javët e ardhshme. Le të futet në kategorinë e parë ai ekip që vërtet do ta meritojë," - përfundojnë trajnerët e Skënderbeut.
Pra, Skënderbeu e ka nisur me humbje kampionatin e ri, por kjo nuk është shumë për t'u shqetësuar, pasi përballë korçarëve luante një skuadër mjaft e njohur si Tomori. Ky ekip, prej vitesh, i ka dhënë tonin kampionatit shqiptar. Në fund të fundit, ky është futbolli shqiptar, ku Skënderbeu, qysh në ndeshjen e parë, ka provuar dorën e padrejtë të gjyqtarit. Le të shpresojmë që kjo të mos ndodhë në javët e ardhshme.
Leonard TREBICKA

Naftëtari synon kreun
Naftëtari arriti një fitore të lehtë në transfertën e Përrenjasit.
Edhe pse kishin përballë një skuadër debutuese, kuçovarët nuk e nënvlerësuan aspak. Përkundrazi, e kishin vlerësuar së tepërmi takimin-premierë të kampionatit. Skuadra e ka gjetur shpejt golin dhe kjo falë sulmuesit të njohur Sajmir Maloku, i cili, me dygolëshin e tij, konfirmon se do të jetë një nga pikat e forta të sulmit në këtë kampionat, së bashku me Tepelenën e Rodin. Fitorja e Naftëtarit është përcjellë me entuziazëm në Kuçovë dhe shihet si një shenjë e mirë për ecurinë e kuçovarëve në këtë sezon. Portieri i Naftëtarit Vashaku pohon: "Përballë patëm një formacion relativisht të lehtë, por, pavarësisht nga ky fakt, Naftëtari do të mbetet rival i fortë i këtij grupi, pasi periudha përgatitore që kemi zhvilluar dhe kontigjenti i lojtarëve që kemi na jep mundësi që pretendimet t'i kemi të mëdha." Naftëtari e ka kaluar me sukses takimin e parë, por ndoshta kampionati i vërtetë fillon javën tjetër në Korçë, me Skënderbeun vendas. Në lidhje me këtë, Vashaku shton: "Synimi ynë është fitorja. E dimë që Skënderbeu është ekip i traditës, por mendoj se do ta kalojmë me sukses këtë provë."
Erion Vrusho