Shkumbini "mbyt" Partizanin e lodhur

Tirana ka ndalur vrullin fierak, kampionia barazon në Elbasan, në një ndeshje të tensionuar

Partizani - Shkumbini 0-2 Foto ALNA

Dje në mesditë kanë nisur ndeshjet e javës së parë të Kampionatit të 64-t Kombëtar të Futbollit, ndërsa, në mbrëmje, sfida Vllaznia - Teuta ka mbyllur kuadrin e kësaj jave, që bëri startin e ri të kampionatit. Dhe në këtë javë duhet thënë se skuadrat e Besëlidhjes, Shkumbini dhe Tirana janë në "pole position", sepse ato dhanë edhe rezultatet më të bukura e të befasishme. Por do të jetë skuadra peqinase e Shkumbinit, e cila me fitoren 2 : 0 ndaj skuadrës së Partizanit në Stadiumin Kombëtar "Qemal Stafa", i dha një shuplakë të mirë skuadrës, e cila pretendon të fitojë kampionatin. Me një ndeshje që 66 minutat e para i zotëroi plotësisht, Partizani, më pas, tregoi shthurje në lojën e tij, një vetëkënaqësi e çoroditje për shënimin e golit, por edhe humbi shumë raste, aq sa edhe duhet të kishte dalë i fituar nga ky takim. Ndoshta skuadra e Partizanit nuk i ka besuar përfundimit të këtij takimi, por që urgjentisht duhet të mbledhë mendjen, sepse, ashtu si luajti kundër Shkumbinit, me të tjera skuadra mund të ndëshkohet edhe më rëndë. U ndalëm te skuadra e Partizanit, jo për të ulur vlerat e kësaj skuadre, por as edhe për të mohuar meritën e plotë të Shkumbinit për fitoren e tij. Dy kundërsulme të shpejta e dy gola tregojnë pjekurinë e skuadrës peqinase dhe përvojën e saj në kampionatin shqiptar. Në Fier, skuadra e Apolonisë nuk mundi të marrë të paktën edhe barazimin ndaj Tiranës, e cila i ka mundur me rezultatin e pastër 2 : 0. Kjo humbje e fierakëve nuk mund të quhet befasi apo një rezultat i pamerituar, sepse ka luajtur ndaj skuadrës e cila, në këtë sezon, për nga përbërja, vlerësohet si më cilësorja në kampionatin shqiptar. Gjithsesi, për fierakët duhet edhe një "tërheqje e veshit", sepse, me një përkujdesje të madhe të presidentit të ri Koço Kokëdhima dhe me blerje të fuqishme të merkatos, të bëra nga ai, nuk mund të kalohet kaq lehtë në humbje në fushën e tij, qoftë nga Tirana, qoftë nga skuadra të tjera. Besëlidhja ka treguar se, këtë kampionat, largimet e shumta të vitit të kaluar i ka zëvendësuar cilësisht. Duke shënuar 5 gola në portën e Erzenit, e cila mbrohet nga një portier i shquar i kampionatit shqiptar, Xhevair Kapllani, lezhianët bëjnë një nisje serioze në këtë kampionat, por marrin edhe më shumë besim për të vazhduar synimin e qëndrimit në 10 skuadrat e para të kampionatit. Në Elbasan, kampionia Dinamo ka arritur t'i marrë një pikë skuadrës portokalli, e cila rikthehej në këtë kampionat me më shumë ambicie. Por kjo ndeshje ka përfunduar edhe me momente tensioni në fushën e lojës, ku janë dhënë edhe shumë kartona të kuq. Transferta në stadiumin e Gjirokastrës nuk i ka dhënë fatin e kërkuar skuadrës së Bylisit, e cila ndaj debutueses Besa, me vështirësi ka marrë barazimin. Duket se kavajasit, si një nga skuadrat më të vjetra të futbollit shqiptar, i kanë bërë një sfidë reale një prej skuadrave më të reja, por që, në kampionatet e fundit, ka qenë nga më cilësoret. Kështu i ka ndodhur edhe Lushnjës në fushën e saj, ku nuk ka arritur të realizojë epërsinë e rasteve, por që është ndëshkuar nga zgjuarsia e kundërsulmit, në lojën e vlonjatëve. Të gjitha këto ishin sfidat e mesditës së djeshme, të cilat, parë në aspektin e ndeshjeve të para, nuk duhet të sjellin eufori apo edhe pështjellime te të gjitha skuadrat, sepse kampionati dje nisi për të parë më qartë punën e bërë, por edhe për të gjetur ato mangësi, të cilat trajnerët nuk kanë arritur t'i kapin më parë. Në vlera të tilla duhet parë vazhdimësia e kampionatit, i cili dje, pas një pushimi tremujor, "thirri" në shkallët e stadiumeve tifozët e shumtë.
Agron Kaja

Thanë pas ndeshjes Partizani - Shkumbini
Neptun Bajko, trajner i Partizanit : "E nisëm keq kampionatin me një humbje, por kjo nuk do të thotë se skuadra luajti keq. Unë jam i kënaqur prej saj dhe besoj se, më tej, skuadra do të jetë më mirë. Kundërshtari i shfrytëzoi mirë dy rastet e vetme që krijoi dhe dihet ai rregull i futbollit që, po nuk shënove, do të pësosh".
Astrit Sejdini, trajner i Shkumbinit : "Ne kishim ardhur në këtë ndeshje për një rezultat pozitiv, por, duke marrë fitoren, unë do të thosha se skuadra tregoi më shumë vlera në lojën e saj. Ne e mundëm Partizanin taktikisht, por edhe fizikisht. Me këtë fitore, skuadra jonë hyn që në nisje të kampionatit në zonën e pretendentëve".

Vllaznia përuron prozhektorët me fitore
Në ndeshjen e saj të parë me drita në stadiumin "Loro Boriçi", skuadra shkodrane e Vllaznisë ka arritur të fitojë ndaj skuadrës durrsake Teuta, e cila vitin e kaluar ua prishi festën e përurimit të rikonstruksionit të stadiumit. Por që, në fillim, kanë qenë durrsakët, të cilët në pjesën e parë kanë kaluar në avantazh me anë të korçarit Memelli në minutën e 29-të. Por, në pjesën e dytë, Vllaznia i ka bërë një përmirësim të madh lojës dhe rezultatit, duke arritur të shënojë dy gola në portën e Shehit. Në minutën e 51-të, ishte kapiteni Sinani që barazoi rezultatin, por që i dha skuadrës së tij më shumë besim për të kërkuar fitoren. Dhe ky gol erdhi nga Bejzade, i cili edhe këtë herë bëhet përcaktues i fitoreve të Vllaznisë, ashtu sikundër bëri edhe ne disa ndeshje të tjera në kampionatin e kaluar. Dhe me këtë fitore shkodranët marrin një siguri reale për të pretenduar kreun e renditjes, pasi kanë fituar ndaj një skuadre të fortë, edhe ajo pretendente në këtë kampionat.

Renditja
1. Besëlidhja 3 pikë
2. Shkumbini 3 pikë
3. Tirana 3 pikë
4. Vllaznia 3 pikë
5. Besa 1 pikë
6. Bylis 1 pikë
7. Lushnja 1 pikë
8. Flamurtari 1 pikë
9. Dinamo 1 pikë
10. Elbasani 1 pikë
11. Teuta 0 pikë
12. Partizani 0 pikë
13. Apolonia 0 pikë
14. Erzeni 0 pikë