Edhe pasi pësuam humbjen më të thellë të dekadës së fundit, Dosena shprehet: "Jam i kënaqur me mënyrën sesi luajtëm"

Kombëtarja shpartallohet në "Stalingrad"

Shqipëria humbi ndeshjen e dytë për eliminatoret e Euro 2004-s. Kësaj here ndaj Rusisë, një fuqi e madhe e futbollit kontinental. E megjithatë, shifrat 4-1 të humbjes nuk kanë asnjë justifikim. Në Vollgograd pamë po atë përbërje të kuqezinjve si në ndeshjen me Zvicrën. Pamë po atë skemë loje, pamë po ato zëvendësime. Pra, një klishe ndaj të cilës vetëm trajneri Dosena kishte besim. Nëse ndaj Zvicrës kuqezinjtë tanë arritën një barazim të bukur dhe të merituar në sajë të shpirtit të lartë të garës, në planin taktik të zbërthimit të lojës së kuqezinjve tanë kishte të meta, për të mos thënë që pati edhe zgjidhje të gabuara. U mendua se ato do të ishin analizuar me ekipin dhe do të ishin marrë masa për të ndrequr mangësitë. Por jo. Ndeshja e djeshme ndaj Rusisë e dëshmoi më së miri këtë. Nëse ndaj Zvicrës barazimi u konsiderua lojë e zemrës, humbja ndaj Rusisë duhet konsideruar humbje e paaftësisë dhe e papërgatitjes totale të ekipit. Me sa duket, kuqezinjtë dhe trajnerët e tyre nuk e dinin, apo e kishin harruar, se përballë kishim një skuadër më me përvojë, më të fortë dhe më me ambicie. Shkurt, pretendenten kryesore të grupit për në Euro 2004. Sfida me të nuk kërkonte vetëm zemër, por edhe mend e përgatitje. Në këtë kuptim, deklarata e trajnerit Dosena pas ndeshjes duket plot sarkazëm dhe e pavërtetë. Natyrisht, jemi të ndërgjegjshëm për forcën dhe aftësitë e futbollit shqiptar. Jemi të ndërgjegjshëm se ne nuk jemi kërthiza e Evropës, që të mund të pretendojmë të fitojmë çdo ndeshje. Edhe potencën e Rusisë e njohim, madje duhet ta pranojmë që të mundesh nga ajo nuk është ndonjë turp. Turp është kur shikon rezultatin 4-1 dhe, mbi të, mënyrën sesi u luajt. Duke përjashtuar çastet pas barazimit, që krijuan një lloj stepjeje te kundërshtari dhe një lloj iluzioni tek ekipi ynë, e gjithë pjesa tjetër ishte dhe foli për rusët. Eshtë e vërtetë që golat e kundërshtarit erdhën si pasojë e gabimeve tona, por po kaq e vërtetë është fakti që rusët në fushën e lojës bënin çfarë të donin dhe kur ta donin. Pastaj edhe gabimet që bëmë, po t'i shikosh me kujdes, duhet ta pranojmë që erdhën qoftë si pasojë e presionit të kundërshtarit, por qoftë edhe të pamjaftueshmërisë së përgatitjes si fizike dhe taktike të ekipit. U eksperimentua në ndeshjen ndaj Zvicrës, duke aktivizuar në sulm dy mesfushorë si Vata dhe Haxhi. Gëzimi i rezultatit e fshehu këtë vendosje të gabuar, e cila nuk dha rendimentin e duhur, madje sakrifikoi edhe Taren në lojën sulmuese. E njëjta gjë u përsërit edhe ndaj Rusisë. Madje, edhe pse shihej se loja jonë sulmuese ishte e mefshët, pasi edhe Tare nuk ishte në ditë të mirë, përsëri aty u këmbëngul. Fillimi i pjesës së parë kërkonte medoemos një freskim të këtij reparti, i cili do t'ia lehtësonte punën qoftë mesit të fushës, qoftë edhe mbrojtjes. Pas pësimit të golit të tretë, u bënë zëvendësimet, u ndryshua edhe vendosja e lojtarëve, por ato ishin pa asnjë dobi. Futbollistët tanë ishin të paaftë fizikisht për të përballuar kundërshtarin dhe, për pasojë, gabimet e tyre bëheshin gjithnjë e më trashanike. Pas shifrave 3-1, në fushën e lojës nuk ekzistonte më kombëtarja jonë. Në fushë "vallëzonin" vetëm rusët, të cilët, kur fiksuan shifrat 4-1, mund të shënonin edhe golin e pestë, nëse do të këmbëngulnin sërish. Kuqezinjtë tanë, në fundin e ndeshjes, i përngjanin një ekipi të shpartalluar, ku në fushë ishte vetëm fantazma e një pseudokombëtareje, me të cilën 4 ditë më parë ishim kënaqur. Aventura ruse e Vollgogradit, përveçse humbjes më të thellë në rezultat (duke mos llogaritur atë me Meksikën), në vetvete ka edhe shumë mësime. Por edhe një nevojë për t'i parë e analizuar gjërat me realizëm, pa pasione, me gjakftohtësi, por edhe me efektivitet.

Rusi - Shqipëri 4-1
Rusia
Ovçinikov
Ignasheviç
Nizhegorodov
Sollomatin
Smertin
Semak
Gusev (Evsev 79')
Janovski
Onopko
Lloskov (Aldonin 46')
Kerzhakov (Popov 65')
Trajner: Valeri Gazajev

Shqipëria
Strakosha
Xhumba
Çipi
Fakaj
Murati
Hasi
K. Duro
Lala
Vata (Sina 60')
Haxhi (Bushi 57')
Tare (Myrtaj 70')
Trajner. Xhuzepe Dosena

Gjyqtarë: L. Sundell, M. Nilson, M. Ukaleviç (Suedi)

Shënues: Kerzhakov 3', Semak 41', 54', Onopko 49', K. Duro 13'
Kartonë të verdhë: Onopko, Hasi, Ovçinikov

Minutat e lojës...
3'- Kerzhakov shënon pas një harkimi nga ana e Gusevit në zonë, i cili përfiton nga një gabim i Muratit në mesfushë.
5'- F.Vata pengohet gabimisht, pas një topi të marrë nga Duro, por gjyqtari vazhdon lojën.
11'- Kundërsulm i rusëve, të cilët nuk arrijnë ta konkretizojnë si duhet.
13'- Goditje dënimi për ekipin tonë kombëtar. Klodian Duro godet fuqishëm dhe topi, pasi gjen një të çarë dhe kalon murin rus, përfundon në rrjetë. Barazim 1-1.
15'- Goditje dënimi për tanët. Gjuan përsëri Duro, por topi përfundon jashtë.
18'- Një rast ideal për kombëtaren tonë. Lala pason mrekullisht për Vatën, por ky nuk koordinohet si duhet në zonë dhe gjuan keq.
19'- Rusët përfitojnë nga një gabim i Fakajt, por ndërhyrja e Çipit është vendimtare.
24'- Lloskov fiton dyluftimin me Muratin, por ndërhyrja e Çipit shpëton portën tonë nga pësimi i golit të dytë.
28'- Goditje dënimi për rusët. Provon të godasë portën tonë Gusev, por pa rezultat.
30'- Duro humbet topin në mesfushë dhe përfiton Smertin, i cili lëshon një predhë dhe Strakosha pret me vështirësi.
32'- Goditje këndi për rusët. Semak, i lirë në zonë, ka goditur mbi tra.
34'- Fakaj kap topin me dorë në afërsi të zonës, gjuan Gusev dhe topi kalon ngjitur me shtyllën e majtë pingule të portës sonë.
37'- Gabim i mbrojtjes ruse brenda zonës, ku përfiton Lala, i cili i vetëm me portierin gjuan në portë, por ky i fundit e kap topin rastësisht, para se të përfundonte në rrjetë.
41'- Murati gabon sërish në mesfushë, pas një topi të kthyer prapa. Përfiton Semak, i cili nuk fal dhe shënon golin e dytë për Rusinë.
42'- Tare provon të godasë me gërshërë, pas një daljeje të gabuar të portierit Ofçinikov, por pa rezultat.
47'- Haxhi merr një top nga Tare, por gabon në pasim për Vatën, i cili ndodhej i lirë në zonën ruse.
49'- Murati kalon një top në goditje këndi, duke ndalur vrullin e Gusevit. Ky i fundit kroson në zonë dhe Onopko, i lirë, shënon me kokë golin e tretë.
54'- Nja gabim i mbrojtësit tonë Xhumba. Topi rrëmbehet nga Semak, i cili gjuan bukur në hyrje të zonës dhe shënon golin e katërt për ekipin e tij.
58'- Bushi pason për Duron, por ky i fundit gjuan jashtë portës.
63'- Gusev, pas një kundërsulmi, gjuan jashtë zonës, por Strakosha ndodhet në pozicion dhe pret.
68'- Është përsëri Gusev, i cili ka mundësi të shënojë golin e pestë me kokë.
78'- Popov gjuan pas një rrëmuje në zonën tonë të rreptisë, por pret Strakosha.
85'- Aldonin provon me një gjuajtje fluturimthi dhe porta jonë shpëton sërish për mrekulli.
87'- Myrtaj pason për Bushin, por Onopko ndërhyn dhe e kalon topin në goditje këndi.
90'- Goditje dënimi për Shqipërinë. Çipi, nga larg, kërkon të zërë në befasi portën ruse, por pa rezultat.

(Gazeta Sporti Shqiptar)