Sot (17 Qershor 2010) kishte dale nje artikull qe thote qe hiqet afati i skadimit te pashaportave te vjetra
ADI SHKEMBI
Qeveria vendos të heqë datën për nxjerrjen të pavlefshme të pasaportave aktuale. Megjithëse zyrtarët e lartë të Qeverisë kanë deklaruar se në vitin 2011 do të hiqen pasaportat e vjetra dhe do të zëvendësohen me ato biometrike, në projektligjin e miratuar nga Qeveria ky afat nuk ekziston. Kështu në paragrafin e fundit të këtij projektligji është propozuar një dispozitë kalimtare sipas të cilës "pasaportat e vlefshme, të zakonshme, do të jenë në qarkullim deri në përcaktimin e një afati përfundimtar. Tarifat për pajisjen dhe ripajisjen me pasaportë biometrike janë të përcaktuara në kontratën koncensionare, ratifikuar me ligjin nr.9972, datë 28.7.2008. Me përfundimin e kësaj kontrate, këto tarifa do të përcaktohen me akte ligjore dhe nënligjore". Afatin për të hequr nga qarkullimi pasaportat e vjetra e bëri të ditur katër muaj më parë Kryeministri Berisha gjatë një mbledhje të Komitetit Ndërministror të Liberalizimit të Vizave. "Për sa i përket afatit të vlefshmërisë së pasaportave të vjetra, viti 2011 është përcaktuar si viti i fundit për përdorimin e këtyre pasaportave", tha kreu i ekzekutivit. Pasaportat biometrike ishin një nga kushtet, e plotësuara tashmë nga Qeveria shqiptare, për heqjen e vizave me Bashkimin Europian. Në projektligjin e miratuar dje është përcaktuar që pasaportat biometrike do të tërhiqen pranë drejtorive dhe komisariateve të policisë. "Tërheqja e pasaportës biometrike kryhet nga shtetasi ose i ngarkuari me prokurë të posaçme, ose një pjesëtar i afërt i familjes (bashkëshortja/prindi, fëmija madhor) ose kujdestari ligjor për të miturit dhe për shtetasit pa zotësi për të vepruar", thuhet më tej në këtë projektligj. Ndërsa pasaporta e shërbimit dhe ajo diplomatike do të tërhiqen pranë zyrës përkatëse në Ministrinë e Punëve të Jashtme. Termi "pasaportë" nga hyrja në fuqi e këtyre ndryshimeve do të zëvendësohet me "pasaportë biometrike", ndërsa "Ministria e Rendit" është zëvendësuar me "Ministria e Brendshme". Megjithëse drafti i miratuar nga Qeveria nuk vendos një afat për nxjerrjen si të pavlefshme të pasaportave aktuale, kjo nuk ndryshon asgjë në vendimin që do të marrë Këshilli i Ministrave të Bashkimit Europian për heqjen e vizave me Shqipërinë. Kështu kushti i parë për të lëvizur pa vizë në vendet e Unionit është pikërisht pajisja e qytetarëve me pasaportat e reja.
Pasaportat e “vjetra”, hiqet afati i tërheqjes nga shteti /Gazeta Shqiptare
përgjigjur nga
mandi
me
Jun 17, 2010 11:17 PM
