Që nga e diela në mbrëmje, grekët mund të lexojnë në internet se kush i ka borxh shtetit shuma të mëdha. Në këtë mënyrë ata do e bëjnë atë përgjegjës për mizerjen ekonomike ku është zhytur vendi. Qeveria në Athinë ka publikuar listën me 170 faqe, ku janë ata që kanë shmangur pagimin e taksave. Në total ata i kanë shkaktuar një dëm shtetit prej 15 miliard euro. Ministri i Financave në Greqi, Evangelos Venizelos, tha se kjo është një ‘listë turpi’. Në të përfshihen këngëtarë, sipërmarrës dhe tregtarë.

Shmangia e taksave është një problem i madh në Greqi. Zgjidhja mund të ndihmonte pjesërisht në shmangien e falimentimit. Ndërkohë kjo javë do jetë vendimtare për Greqinë, e cila ka nevojë të dëshpëruar për fondin e shpëtimit prej 14 miliard euro në mars. Por inspektorët e BE, BQE dhe FMN thonë se janë të tronditur nga ajo që kanë parë atje. Sipas tyre, parlamenti ka marrë masa kursimesh, por nëpunësit nuk i zbatojnë këto masa, ose sepse nuk duan, ose sepse nuk munden.