Turizmi malor në Shqipëri prej vitesh ka mbetur në vendnumëro. Asnjë ofertë nuk vjen për turistët e huaj apo vizitorët vendas në ato pika turistike që dikur klasifikoheshin në listën e vendeve me borë, ku sportet e dimrit ofronin pafund argëtim. Voskopoja, mali i Dajtit, Thethi, Dardha apo Vithkuqi, vendet më të larta ku dikur mund të gjejë stacione të vogla skish apo streha akomodimi, heshtin prej vitesh. Përveç një promocioni të thatë, si e fundit alternativë që vjen nga agjencitë shqiptare turistike, në këto pika turistike nuk shkel askush.
Mali i Dajtit ka rrëpira të buta, ku mund të ushtrohet ski dhe sporte të ngjashme, por prej kohësh vendet e destinuara për turizmin malor, nuk janë ridimensionuar për ushtrimin e tyre. ç’ka ka sjellë edhe zhdukjen e pistave të dikurshme të skive. Voskopoja është konsideruar prej vitesh, pika turistike dimërore më e preferuar, kjo edhe për shkak të menusë së pasur kulturore që ofron. Dhjetra kisha me afreske dhe një terren mëse i përshtatshëm për sportet e dimrit. Dardha, një tjetër pikë turistikë në kreshtat e Moravës, ofron një peisazh perfekt dimëror, por edhe disa shtëpi, të përshtatura në hotele. Në skajin tjetër të Shqipërisë, në Alpe, parku i Thethit, mbetet ndër të paktat terrene që ofron ushtrimin të sportit të skive, që prej vitesh në këtë zonë është zhdukur.