Për tju shoqëruar nëpër Shqipëri apo për tju sugjeruar një itinerar, është e natyrshme që ta fillojm këtë nga kryeqyteti i saj, Tirana. Eshtë një ndërmarrje e vështirë ta përfshish të gjithë hapësirën e kryeqytetit shqiptar me një udhëtim të vetëm, por me një përzgjedhje të vendeve më të bukura të tij, do të largoheshit vërtet me mbresa të këndshme.

Pasi ju kemi njohur me kryeqyetin e Shqipërisë, do të donim ta nisnim më në fund udhëtimin tonë nëpër bregdet, duke ndjekur itinerarin veri-jug, e duke filluar natyrisht me qytetin me gjeografinë më fantastike në Shqipëri dhe jo vetëm; me Shkodrën. Shkodra është një nga qytetet më të mëdhenj e më të rëndësishëm të Shqipërisë, dhe qyteti më i madh i veriut.

Lezha është një nga qytetet më të lashta të Shqipërisë, e vendosur pranë Detit Adriatik, në veriperëndim, midis fushës së Zadrimës në veri dhe fushës së Bregut të Matit në jug, në një kryqëzim të rëndësishëm rrugësh. U formua në shekullin e IV para Krishtit me emrin Lis dhe ishte një qendër e rëndësishme e sundimtarëve të mbretësrisë ilire.

Durrësi është qyteti i dytë i Shqipërsië, ku ndodhet porti më i madh e më kryesor që është edhe ura lidhëse më e fuqishme me botën. Ndodhet jo shumë larg nga Aeroporti Nënë Tereza dhe nga kryeqyteti i Shqipërisë, Tirana. Është një nga qytetet më të lashtë me një histori që shkon deri në vitet 627 para Krishtit.

Kavaja është një qytet me origjinë mesjetare, që ndodhet në qendër të Ultësirës Perëndimore të Shqipërisë. Pati një zhvillim tregtar në kohën e pushtimit osman dhe në dokumentat e kohës, figuron si një qytet zejtar me emrin Kavalje. E ndodhur 20 km pranë Durrësit, Kavaja ka qenë një nyjë e rëndësihme pasi nëpër të kalonte rruga Egnatia.

Divjaka është një zonë banimi që i përket qytetit të Lushnjes, ku ndodhet një nga parqet kombëtare më të rëndësishme dhe gjithashtu një nga lagunat më të mëdha të Shqipërisë, Parku Kombëtar i Divjakës që shtrihet në një hapësirë prej 1250 ha, ndodhet 5 km larg nga Divjaka, në breg të detit Adriatik. Parku është pjesë e Lagunës së Karavastasë dhe është shpallur zonë e mbrojtur nga Konventa Ndërkombëtare e Ramsarit që në vitin 1994.

Është një nga qytetet më të vjetra të Shqipërisë, themeluar në shekullin e III para Krishtit, dhe atëhere njihej me emrin Aulona. Vlora ishte një pikë e rëndësishme komunikimi midis Ilirisë së atëhershme dhe botës, nëpërmjet portit, i cili sot është gjithashtu një pikë e rëndësishme që lidh Shqipërinë me portet e ndryshme të Italilsë, si Bari, Brindisi, Otranto etj. Gjithashtu një port i vogël jahtesh është ndërtuar tani në Orikum dhe është një mundësi mjaft e mirë për të tërhequr këtë kategori vizitorësh në bregdetin e Vlorës.