|
|
Ikonës së
shenjtë të këngës shqiptare i është akorduar
dje nga presidenti Moisiu, titulli “Nderi i Kombit”. Ceremonia
e dorëzimit të çmimit do të organizohet më
9 janar në Lidhjen e Shkrimtarëve
Vaçe Zela “Nderi i Kombit”
Merr fund kështu, “odiseja” e akordimit të këtij
titulli.
Admirina Peçi
Vaçe Zelës i është akorduar titullin “Nderi
i kombit”. Urdhri për dekorimin e artistes së njohur është
firmosur dje nga presidenti i republikës së Shqipërisë,
Alfred Moisiu, me motivin “Për vlerat e rralla si Artiste e
Shquar, me popullaritet të jashtëzakonshëm, për interpretimin
mjeshtëror të këngës së muzikës së
lehtë dhe asaj popullore, për pasurinë e vyer që krijoi
në shkollën shqiptare të interpretimit muzikor”.
Burime në presidencë bëjnë të ditur se ceremonia
e dorëzimit të këtij titulli për këngëtaren
Vaçe Zela do të organizohet muajin e ardhshëm në
sallën e madhe të Lidhjes së Shkrimtarëve dhe Artistëve.
Bëhet e ditur se në këtë ceremoni që do të
dalë jashtë normave të zakonshme do të ftohen për
të marrë pjesë një numër i madh artistësh
dhe intelektualësh.
Një shërim për Vaçen
Mjaft i entuziazmuar vëllai i artistes së madhe, Hysni Zela,
e konsideron një lajm të mrekullueshëm dekorimin e motrës
së tij, këngëtares së mirënjohur Vaçe
Zela. “Jam i lumtur që erdhi një president i cili të
kujtohet për artistët dhe t’i nderojë ata ashtu siç
iu takon në të vërtetë. Kishte kohë që ajo
ndihej pak më mirë. Shëndeti i dobësuar nuk po bënte
shumë kapriçio këto kohë.”Hysniu rrëfen
se kishte ditë që e merrte në telefon dhe fliste me të.
“Fliste pak, se aq ia lejonin fuqitë, ndoshta më pak se
dy minuta, por e thoshte edhe vetë se ndihej pak më lehtë.
Por sidoqoftë, gjatë gjithë këtyre ditëve ajo
nuk është ndarë nga mjekimet, kurat e herëpashershme
dhe regjimet e vendosura nga mjekët zviceranë. Mendoj se kur
t’ia komunikojmë këtë lajm do të bëhet
me krahë. Ky nderim që i bëhet Vaçes është
si një shërim për të.”- thotë Hysni Zela,
duke rrëfyer për organizimin e ceremonizë e cila do të
zhvillohet më datën 9 dhjetor në Lidhjen e Shkrimtarëve
dhe Artistëve të Shqipërisë .
Rruga drejt një “Nderit të Kombit”
Kishte ditë që nëpër korridoret e presidencës
pëshpëritej për dhënien e këtij titulli këngëtares
së madhe Vaçe Zela. I diskutuar kaq herë nëpër
ato korridore, duket se më në fund vendimit për ta shpallur
këngëtaren “Nderi i Kombit”, i erdhi koha. Në
adresë të (ish)presidentit të republikës së shqipërisë
ishin dërguar edhe më parë peticione për t’i
akorduar këngëtares së madhe këtë titull nderi,
e megjithatë Mejdani nuk vendosi që ta firmoste një vendim
të tillë. Përgjigja negative e dhënë me këtë
rast bazohej në faktin se artistes së madhe i ishte dhënë
çmimi “Mjeshtre e madhe”, e kësisoj duhej të
kalonte edhe një periudhë e gjatë kohore që asaj t’i
akordohej titulli “Nderi i Kombit”. Por duket se ngulmimi
i artistëve shkoi më së fundi në pikën ku duhej.
Një grup intelektualësh dhe artistësh shqiptarë si,
kompozitorë, dirigjentë, shkrimtarë, kengëtarë,
balerinë e gazetarë shqiptarë me vendbanim në Tiranë,Francë
, New York e vende të tjera, pjesëtarë të një
bashkësie në internet të quajtur "Art-Cafe",
kohët e fundit hartuan një letër të hapur drejtuar
presidentit të ri të Shqipërisë, Alfred Moisiu, ku
ndër të tjera i kërkohej presidentit, që t’i
akordohej titulli i madh “Nderi i Kombit” këngëtares
së njohur Vaçe Zela. Duke e quajtur "Ikona e Shenjtë
e Këngës Shqiptare" ata kanë paraqitur gjendjen e
rëndë shëndetësore që e ka shoqëruar për
një kohë mjaft të gjatë ( disa muaj) këngëtaren,
e cila po kurohet prej muajsh në një spital të Zvicrës.
“Vaçe Zela, ky Simbol i Artit Shqiptar, e cila me zërin
e saj mahnitës e të papërsëritshëm, për
më shumë se 40 vjet, krijoi mitin e saj të pavdekësisë
duke hyrë në zemrat e çdo shqiptari, brenda e jashtë
atdheut, sot ndodhet e larguar, e braktisur, e harruar dhe tepër
e semurë, ndërkohë që me shumë dinjitet dhe stoicizëm
po lufton sëmundjen e saj të rëndë, në trishtimin
dhe vetminë e saj”,- shënohej, ndër të tjera,
në letrën e drejtuar presidentit Moisiu.
E hartuar nga kompozitori i njohur Aleksandër Peçi (Artist
i merituar), Vasil Qesari (Gazetar në Francë 3 Television) -
Bordeaux, France dhe Evis Kokalari (Administratore e Art-Cafes) -New York,
USA, kjo letër ishte e firmosur nga plot 63 artistë dhe intelektualë,
mes të cilëve emra si Aleksandër Peçi, Tish Daija,
Besim Petrela, Ibrahim Madhi, Rifat Teqja, Thoma Gaqi, Fatmir Hysi, Zana
Shuteriqi, Shpetim Kushta, Xhevahir Spahiu, Zhani Ciko, Rudina Ciko, Agron
Xhangolli, Aferdita Jonuzi, Kujtim Laro, Edit Mihali, Dhora Leka, Alqi
Lepuri, Zana Frashëri, Zana Turku, Hajg Zaharian, Ramazan Bogdani,
Gjok Beci, Nexhat Agolli, Eno Koço, Evis Kokalari, Joe Artid Fejzo,
Mariola Fejzo prima balerina në Itali, Kledi Kadiu, Ilir Shaqiri
,Frederik Ndoci, Aida Ndoci, Juli (Ndoci) Woltmer, Rita (Ndoci) Langhammer,
etj.
(marre nga Shekulli)
|
|
|