|
|
include ("http://www.shqiperia.com/reklama460.php");
?>
Tedi Papavrami vjen sërish në Shqipëri.
Do ta nisë në Korçë koncertin e tij për të
vijuar më 7 prill në Akademinë e Arteve. Mjeshtri i violinës
vjen nga Franca edhe me petkun e aktorit. Sapo ka përfunduar xhirimet
e një seriali televiziv
Papavrami, sërish në Shqipëri
Admirina Peçi
Tingujt
e violinës së tij së shpejti do të mbushin sallën
e Akademisë së Arteve. Kanë kaluar kohë që ato
tinguj nuk janë dëgjuar këndej Shqipërisë, ndoshta
që nga koha kur Tedi Papavrami u rishfaq në Pallatin e Kongreseve
si i ftuar ndër të ardhurit nga larg për të thënë
“Dua më shumë Shqipërinë”.
Së shpejti, ai do të jetë sërish i ftuar në Tiranë,
këtë herë për një koncert në Akademinë
e Arteve.
Pikërisht ditën e hënë, më 7 prill, në orën
19:00, ai do të luajë në atë sallë krahas pianistit
grek Janis Vakerelis. Lajmi është bërë i ditur nga
Instituti Italian i Kulturës në Tiranë. Ky koncert është
pjesë e stinës koncertore “Allegreto Albania”, e
cila parashikon në të vërtetë dy koncerte të
Tedi Papavramit në Shqipëri. Koncerti i parë i tij do të
jetë në qytetin e Korçës ditën e diel më
6 prill, e të nesërmen “Allegreto Albania” do ta
sjellë Papavramin në Tiranë. Ky është edicioni
i tretë i kësaj stine Koncertore në Tiranë. Ndërsa
ardhjen me një koncert të tillë të violinistit shqiptar
Tedi Papavrami në Shqipëri e ka bërë të mundur
Komiteti organizues i “Allegreto Albania” i quajur CIDIM.
Ky komitet italian i muzikës i seleksionon të gjithë artitët
e njohur të Evropës të cilët marrin pjesë në
këtë stinë koncertore. Nga një përzgjedhje e
tillë është futur në këtë stinë koncertore
edhe violinisti Tedi Papavrami. Në koncertin që ai do të
luajë në Shqipëri do të luhen Sonata.5 in fa maggiore
op.24 “La primavera” nga Bethoven, “Seconda sonata per
violinë e pianoforte in re maggiore op.94” nga Prokofiev dhe
“Sonata n.3 in re minore op.108” e Bramsit.
Jeta e një talenti të lindur
Lindur në Tiranë ai u lidh me violinën që në
moshën katërvjeçare. Studioi violinë me të
atin, profesorin e njohur Robert Papavrami, i cili ka ndikuar mjaft në
të ardhmen e tij artistike. Në moshën 8- vjeçare,
interpreton “Arie Bohemienne të Sarasate me orkestrën
Filarmonike të Tiranës dhe tre vjet më vonë Koncertin
e parë për violinë të Paganini-t. Në shtator
1982, falë flautistit Alain Marion , qeveria franceze i ofron një
bursë studimi në Francë ku studion pranë Conservatoire
National Superieur de Musique në Paris, nën drejtimin e Pierre
Amoyal. Në vitin 1985 fiton konkursin “Rodolfo Lipitzer”
në Gorizia, në 1986 fiton me unanimitet “Çmimin
e parë të Konservatorit të Parisit, në vitin 1987
merr diplomën e Konservatorit të Losanës. Më pas ndjek
studimet muzikore nën drejtimin e Zino Francescati e Viktori Mullova
. Në vitin 1992 vlerësohet nga Sacem me çmimin “George
Enescu” dhe në 1993 fiton çmimin e parë dhe çmimin
special të publikut në konkursin ndërkombëtar “Sarasate
“ në Pamplona. Tedi Papavrami ka interpretuar në Evropë,
Afrikën e Jugut, Turqi, Japoni, Izrael, me orkestra të njohura
si Orchestra di Bologna, Bamberger Symphoniker, Orchestre de Paris, etj.
Ka interpretuar nën drejtmin e dirigjentëve të njohur si
K.Sanderling, C.Hogëood, A. Pappano, L.Langree, G. Varga, Z.Macal,
J.C.Casadesus, etj. Në stinët 2000-2001 ka interpretuar me Orchestre
Philarmonique de Nice, Orquesta Sinfonica de Galica, Orchestre Philarmonique
de Liege, etj si dhe ka zhvilluar disa turne në Japoni me “24
capricci” të Paganinit dhe është ndër të
paktët violinistë që interpreton integrale. Artisti i gjithanshëm
Tedi Papavrami interpreton rregullisht repertorin e muzikës së
dhomës së bashku me P.Bianconi, H.Sermet, M.Rubackyte, P.Meyer,
E.Lesage, R.Oleg, G.Hoffman,etj.
Përtej muzikës, Tedi Papavrami ka shfaqur edhe mjaft prirje
te tjera në art. Kësisoj një interes të madh për
Tedi Papavramin paraqet letërsia. Madje në vitin 2000 shtëpia
botuese franceze “Fayard” e emëron përkthyes zyrtar
të shkrimtarit shqiptar Ismail Kadare.
Tedi mes Shqipërisë dhe Francës
Ishin vitet ’80, kur në Tiranë kishte nisur të flitej
shumë për një djalosh me talent të jashtëzakonshëm
dhe i pasionuar pas violinës. Ishte djali i Robert Papavramit, mësues
muzike në liceun Jordan Misja, i quajtur Tedi Papavrami. Ai doli
për herë të parë jashtë kufijve të Shqipërisë
në moshën 8 vjeç, gjatë një turneu të
Ansamblit Popullor të Këngëve e Valleve në Kosovë.
Djaloshi i talentuar shkëlqeu për teknikën e lartë
të interpretimit, sidomos në sonetat e Paganinit. Më 1982,
në Tiranë kishte ardhur për të dhënë një
koncert flautisti i njohur francez, Alain Marion. Në këtë
vizitë në Tiranë ai pati rastin të dëgjonte interpretimin
e violinistit 11- vjeçar Tedi Papavramit, i cili i bëri mjaft
përshtypje. E pak muaj pas kësaj, djaloshi i talentuar fitoi
një bursë nga qeveria franceze, me pikësynim ndjekjen e
studimeve në Konservatorin e Parisit. Vetëm tre vjet më
pas, nën kujdesin e profesorit të shquar Pierre Amoyal, Tedi
Papavrami arriti të fitojë çmimin e parë në
konservator duke interpretuar Kapriçiot e Paganinit. Veç,
jeta në Paris nuk i dukej aq e lehtë djaloshit shqiptar të
apasionuar pas muzikës. Në apartamentin ku banonte, ngjitur
me atë të atasheut kulturor të Ambasadës Shqiptare,
ai vuante shumë nga vetmia. Gjatë pushimeve të verës,
Tedi u kthye në Shqipëri pranë prindërve. E në
ato ditë pushimesh ai merr edhe një ftesë për në
shtëpinë e Enver Hoxhës, për të luajtur me nipin
e tij. E megjithatë kjo vizitë u shndërrua në një
koncert të improvizuar nga djaloshi violinist. Fill pas këtij
koncerti, ai mori edhe përgëzimet e rastit nga Enver Hoxha si
edhe premtimin për të bërë diçka më tepër
për atë djalosh të talentuar. Por megjithë këtë,
Tedi Papavrami jetonte krejt i vetëm në Francë, e vetëm
kohë më vonë, me ndërhyrjen e Nexhmije Hoxhës,
e ëma e tij mundi të shkojë e të bashkohet me të
në Paris, më 1983. Ndërsa babai i tij, Roberti, nuk mundi
të shkonte të jetonte në Paris, të paktën për
rreth dy vjet. Në vitin 1985 çuditërisht edhe atij iu
dha viza për një vizitë në kryeqytetin francez. Tashmë
e gjithë familja e tij u vendos në Francë ku kërkoi
edhe strehim politik. Sidoqoftë në Shqipëri kjo nuk mund
të kalohej në heshtje. Ndaj njerëzve të tjerë
të mbetur në Shqipëri u morën masa të rrepta
e shtëpia e tyre, një vilë e bollshme në një
nga lagjet e kryeqytetit, u rrafshua me pretekstin se, aty do të
ndërtohej një pallat banimi me kontribut vullnetar. Dhe vetëm
vite më vonë, Tedi Papavrami mundi të vinte në Shqipëri.
Ishte viti 1993, kur Tedi Papavrami erdhi në Shqipëri për
të dhënë disa koncerte. Ai është shprehur se
për Shqipërinë ruan kujtime të mjegullta. Në
fillim janë kujtimet e një fëminie plot studime por edhe
të lumtur, sidomos gjatë pushimeve të verës kur shkonte
në një fshat të Himarës. Ishin po ashtu mjaft tërheqëse
edhe daljet në gjah ditëve të dielave, si edhe shëtitjet
me motoçikletë me të atin. Por Tedi ruan edhe kujtimet
e një shoqërie ku, njerëzit bëheshin ziliqarë
për një arritje të fqinjit, të një sistemi politik
ku, askush nuk e ndiente vehten të sigurt po qe se binte tepër
në sy. E megjithë këto ai tani e ndien veten francez edhe
pse vazhdimisht qëndron i ndieshëm ndaj ngjarjeve në vendin
e tij të lindjes. Dhe me kalimin e kohës, distanca dhe hendeku
midis tyre, nuk pushojnë së rrituri ...Ndërkohë, aktualisht,
prindërit e Tedit jetojnë në Gradinjan. Është
një qytezë e gjelbërt dhe e qetë në perëndim
të Bordosë. Aty, i ati, Roberti, drejton një shkollë
violine për fëmijë.
box
Papavrami, edhe aktor
Kishte kohë që merrej me xhirimet e një filmi francez.
Pa u ndarë për asnjë çast nga violina, Tedi Papavrami
edhe këtu shfaqet si violinist. Xhirimet e filmit “Les Liaisons
Dangereuses” tashmë sapo kanë përfunduar. Mësohet
se në të vërtetë “Les Liaisons Dangereuses”
është një serial televiziv, ku Tedi Papavrami luan në
një nga seritë e tij, dhe ku përveç aktorit është
edhe violinist. Në “Les Liaisons Dangereuses” Papavrami
luan rolin e danceny, përkrah Catherine Deneuve, Nastassja Kinski,
e Ruppert Everett. Ky film do të shfaqet në Francë në
muajin nëntor të këtij viti. Kjo seri ku luan violinisti
shqiptar Tedi Papavrami është e përbërë prej
tre filmash seicili nga një orë e tridhjetë minuta dhe
do të shfaqet në kanalin “TF1”.
include ("http://www.shqiperia.com/reklama460.php");
?>
|
|
|