|
|
Kjo
ndeshje do te vendoset per transmetim dhe ne Shqiperia.com
E Premte 6 Shtator 2002
Lojë e dobët e kombëtares sonë
në miqësoren e Prishtinës. Trajneri i pakënaqur, problemet
nxjerrin krye
Kuqezinjtë: Kosova, fort pak
për një kombëtare
Në një atmosferë të ndezur festive,
ku ngjyrat kuqezi mbizotëronin tërë stadiumin e Prishtinës,
kombëtarja e Shqipërisë ka fituar me një autogol të
vendasve ndaj përfaqësueses kosovare. Përveç mjedisit
inkadeshent dhe frymës vëllazërore të takimit, spektatorët
e shumtë në stadium nuk arritën të shijonin asgjë
nga loja e kuqezinjve të Shqipërisë. Që në fillim
të pjesës së parë, duket qartë se impenjimi i
të hedhurve në fushë nga italiani Dosena nuk e kalonte
shkallën e një ndeshjeje kontrolli. Nga krahu tjetër, futbollistët
kosovarë luftojnë fort, duke iu afruar disa herë golit
në portën e Beqajt. Në stolin e kuqezinjve duket qartë
dëshpërimi dhe acarimi i trajnerit Dosena, i cili nuk ngurron
të hapë serinë e ndërrimeve. Por më kot, sepse
edhe të futurit e tjerë në lojë janë treguar
tepër apatikë në veprimet e tyre. Pjesa e parë ka
më shumë nerv e përkushtim për kosovarët, të
cilët kanë krijuar edhe tri raste për të kaluar në
avantazh. Mehmet Dragusha, në mesfushë, është truri
i të gjitha aksioneve të kosovarëve. Minutat e kohës
së rregullt të pjesës së parë kanë mbaruar,
por në dy minutat shtesë vjen dhe goli i fitores për kombëtaren
e Dosenës. Gabon mbrojtësi vendas, Arsim Abazi, i cili me një
autogol aksidental u "dhuron" fitoren kuqezinjve. Merita i takon
mbrojtësit energjik Geri Çipi, i cili ka ardhur që nga
radhët e mbrojtjes, për t'u shërbyer shokëve të
sulmit. Atë që nuk e kanë bërë këta të
fundit, e bën gabimisht lojtari kosovar, Arsim Abazi, më i dalluari
deri në ato momente në mbrojtjen e Kosovës. Sulmuesi ynë
Tare, më kot është munduar ta futë në punë
shtatlartësinë e tij në lojën në ajër, sepse
është mbuluar rreptë nga Statovski, duke mos e lejuar në
asnjë moment që të rrezikojë portën e Beselicës.
Pjesa e dytë fillon më mirë për ekipin shqiptar. Duket
se ka më tepër grintë në lojën e kuqezinjve,
por rutina e aksioneve të pjesës së parë shumë
shpejt përsëritet. Edhe ndërrimet e shumta në formacionet
e të dyja skuadrave, përveçse e bënë lojën
të mërzitshme, nuk ndryshuan asgjë në cilësinë
e saj. Përfundimi i takimit të shumëpritur ka fiksuar rezultatin
1-0 për kombëtaren e Dosenës, e cila duhet thënë
se ka qenë antipodi i asaj me Breshian. Kuqezinjtë, në
këtë miqësore-test para takimit me Zvicrën, nuk kanë
treguar asgjë nga vetja e tyre. Trajneri Dosena, tepër i zhgënjyer
nga loja e të tijve, e ka hedhur "dorashkën": "Ky
ekip nuk më ngrohu fare. Ka shumë gjëra që duhen ndryshuar
në të, dhe unë do ta bëj këtë shumë
shpejt". Nga ana tjetër, edhe numri 1 i futbollit shqiptar,
në vlerësimin e tij ka përsëritur shqetësimin
e trajnerit: "Fitorja e sotme i takon organizimit të ndeshjes
në Prishtinë. Shpresoj të jenë kënaqur të
pranishmit në stadium, sepse impenjimi i kombëtares shqiptare
la shumë për të dëshiruar, fakt ky që duhet parë
me kujdes nga stafi teknik. Kështu nuk mund të arrihen suksese
në takimet zyrtare të evropianit," - ka përfunduar
shqetësimin e tij presidenti i FSHF-së, Armando Duka, pas ndeshjes.
Kosovë - Shqipëri 0-1
Kosova:
Beselica
Statovski
A. Abazi
Keçi (Kullovi 22')
Ademi
Dragusha
Selimi
Llumnica (Isufi 66')
Munishi (Duraku 68')
Kollari (Ismajli 88')
Kozniku (Fetahu 14')
Trajner:
B.Sokoli
Shqipëria:
Beqaj (Strakosha 46')
Çipi
Xhumba
Fakaj (Gallo 28') (Sina 41')
Muka (Duro 34') (Skela 71')
Hasi (Cana 80')
Lala
Murati
Bushi
Rraklli (Kola 75')
Tare
Trajner:
Xh.Dosena
Karton i kuq: F. Ademi
Gjyqtar: Bekim Pajuka (Shkup)
Minutat e ndeshjes:
3' - Sulmi i parë i rrezikshëm i kosovarëve në portën
e Beqajt. Sulmuesi Kozniku, pasi shkëputet nga krahu i djathtë
i sulmit të ekipit të tij, gabon në finalizim. Topi i hiqet
në momentin final nga mbrojtësi kuqezi, Çipi. Këndore
për vendasit.
7' - Kundërpërgjigjen kuqezinjtë e Dosenës. Bushi,
pasi ka depërtuar në zonën e rreptësisë së
kosovarëve, gjuan shumë keq, kur kishte mundësi të
rrezikonte seriozisht.
10'- Përsëri është Kozniku që rrezikon për
përfaqësuesen e Kosovës. Gjuan nga distanca, por pret në
pozicion portieri Beqaj.
15' - Rraklli e ka bërë gjithçka bukur deri në momentin
e finalizimit, por aty ka gabuar, duke e kalur topin gabimisht mbi traun
e portës së Beselicës.
20' - Kollari, mesfushori punëtor i Kosovës, ekzekuton mjeshtërisht
një goditje dënimi nga rreth 18 metra. Topi i gjuajtur prej
tij grushtohet në këndore nga Beqaj.
28' - Momenti më i rrezikshmë në portën e kombëtares
shqiptare. Mehmet Dragusha, pasi kalon dy mbrojtës kuqezinj, del
i vetëm me portierin Beqaj. Është ky i fundit, i cili me
një dalje të guximshme shpëton për mrekulli portën
e tij nga pësimi i golit.
33' - Edvin Murati kalon bukur një top për te Tare në zonën
e rreptësisë së vendasve, por ky i fundit nuk është
në gjendje të bëjë asgjë përpara portierit
kosovar, edhe pse i vetëm me të.
34' - Është sërish Tare, i cili ka rrezikuar seriozisht
portën e përfaqësueses kosovare. Gjuan fort përballë
Beselicës, por në momentin e duhur vjen ndërhyrja e Arsim
Abazit, i cili e devijon topin që po shkonte drejt rrjetës në
këndore.
45' - Aksion pa pretendime për kuqezinjtë tanë. Mbrojtësi
energjik Geri Çipi ka lënë mbrojtjen dhe është
hedhur drejt sulmit. Topi i tij, i adresuar në zonën e rreptësisë
së vendasve, kthehet në autogol nga Abazi, duke i dhënë
epërsinë kombëtares së Shqipërisë. 1-0 për
skuadrën e Dosenës.
47' - Kundërsulm i kosovarëve. Kroson nga krahu i majtë
i sulmit të tyre Kollari. Topi gjen kokën e Statovskit, i cili
godet rrufeshëm, por jo saktë.
8' - Goditje dënimi për përfaqësuesen kosovare. Ekzekuton
Munishi, por jo saktë. Topi i goditur nga rreth 18 metra prej tij
kalon mbi traun e portës së Strakoshës.
16' - I sapofuturi në lojë, Klodian Duro, ka shërbyer bukur
për Bushin. Ky i fundit godet fluturimthi, por ka pritur në
pozicion Beselica.
30' - Pas një krosi të marrë nga mesfushorët e krahut,
Tare e ka ulur topi përtokë me kokë për Bushin, i
cili gjuan keq, pa e vënë në rrezik portën e kosovarëve.
39' - Aksion i bukur i kosovarëve. Dragusha, pasi ka kaluar mjeshtërisht
dy mbrojtës kuqezinj, ka pasuar për Kollarin. Ky i fundit nuk
vonon, duke gjuajtur me forcë drejt Strakoshës. Portieri i përfaqësueses
shqiptare pret pa vështirësi në pozicion.
41' - Aliu, i futur në lojë në pjesën e dytë,
gjuan bukur me kokë, por topi nuk i është bindur plotësisht,
duke kaluar mbi tra.
44' - Bledar Kola ka humbur një rast të pastër shënimi
për kuqezinjtë. Tare ka shërbyer bukur për të,
por mesfushori i rikthyer në kombëtare nuk është akorduar
siç duhet në momentin e goditjes së topit. Gjuajtja e
tij me kokë nuk ka pasur rrezik për portën e vendasve.
Thanë pas ndeshjes:
Xhuzepe Dosena, trajner i Shqipërisë:
"Jam i gëzuar vetëm për ambjentin festiv që arritëm
të krijonim në stadium. Nuk e prisja këtë lojë
kaq apatike të ekipit. Duhet pranur se asnjë nga lojtarët
që aktivizova nuk kishte impenjimin e duhur në këtë
takim. Po e shikoj se ka shumë gjëra për të ndryshuar
në skuadër në të ardhmen. Besoj se do ta bëj
këtë gjë shumë shpejt."
Bylbyl Sokoli, trajner i Kosovës:
"Luajtëm një takim dinjitoz ndaj një ekipi që
është më lart se ne cilësisht. Kemi vetëm tre
vjet që kemi dalë nga lufta dhe mendoj se kemi bërë
përparime të mëdha në futbollin kosovar. Kam parasysh
këtu edhe grupin e lojtarëve të përfaqësueses
që luajtën sot. Përveç tre lojtarëve që
luajnë jashtë, të tjerët aktivizohen në kampionatin
kosovar, i cili po rritet dita-ditës. Atmosfera ishte vërtet
festive dhe për këtë duhen falënderuar të dyja
skuadrat që e krijuan këtë spektakël në stadiumin
e Prishtinës. Të them të drejtën, m'u kujtuan kohët
e arta të Fadil Vokrrit me shokë."
Armando Duka, president i FSHF-së:
"Fitorja në këtë ndeshje ishte diçka jo parësore
për ne. Erdhëm në Kosovë për të vendosur
një urë lidhjeje mes futbollit të të dy vendeve. Falënderoj
shumë lojtarët e kombëtares shqiptare për këtë
iniciativë, por shpreh rezervat e mia për lojën që
zhvilluan sot. Duhet thënë se me atë çka dhamë
sot në fushën e lojës ndaj përfaqësueses së
Kosovës, jemi shumë larg synimeve për ndeshjet zyrtare.
Ekipi nuk ishte i impenjuar sa duhet dhe nuk dha atë që prisnim.
Teknikisht nuk mund të them se çfarë duhet ndryshuar
në skuadër, por totalisht ekipi nuk e çoi për asnjë
moment lojën në nivelin e duhur. Me këtë lojë
që bënë futbollistët e kombëtares sot, nuk mund
të arrijmë rezultate pozitive në takimet zyrtare që
na presin. Shpresojmë që gjërat në të ardhmen
të ecin për mirë, duke e treguar këtë që
në ndeshjen e tetorit, me Zvicrën në Tiranë."
Sabri Hashani, president i Federatës Kosovare të Futbollit:
"Ky takim vinte pas më shumë se dy dekadash, ndaj atmosfersa
arriti kulmin e saj, çka e tregoi edhe pjesëmarrja në
stadiumin e Prishtinës. Takimi i sotëm na kujtoi kohët
e mira të futbollit kosovar, kur luante Fadil Vokrri me shokë.
Trajneri i sotëm i përfaqësueses së Kosovës,
Bylbyl Sokoli, ka në dispozicion të tij një gjeneratë
cilësore lojtarësh. Prandaj kemi shumë besim se edhe përfaqësimi
ynë në të ardhmen do të jetë më dinjitoz."
E Enjte 5 Shtator 2002
Kombëtarja shqiptare ka mbërritur në
aeroportin e Prishtinës dje, në orën 14.10. Pritje madhështore
Kombëtarja vesh kuqezi Prishtinën
Nga Prishtina, Driton Latifi
Gjatë daljes së anëtarëve të kombëtares
shqiptare nga terminalet e Aeroportit të Prishtinës, shumica
e punëtorëve kanë ndërprerë punën për
të qenë më afër lojtarëve shqiptarë. Madje
shumica e tyre kanë nxituar të bëjnë edhe foto me
ata. Pas kontrolleve rutinë, në terminalet e arritjes së
pasagjerëve, në aeroportin e Prishtinës, i pari që
ka dalë nga avioni ka qenë mbrojtësi shtatlartë, Ervin
Fakaj. Ishte ora 14.10, momenti kur avioni i linjës Tiranë -
Prishtinë është ulur në pistën e madhë të
aeroportit, duke sjellë për herë të parë në
Kosovë futbollistët më të mirë të Shqipërisë.
Në mesin e futbollistëve që po zbrisnin shkallët e
avionit, fytyrat më të gëzuara dukeshin se ishin ato të
Besnik Hasit dhe ideatorit kryesor të ndeshjes së sotme në
Prishtinë, Igli Tare.
"Shqipëria, Shqipëria! Kosova, Kosova!". Këto
kanë qenë thirrjet e tifozëve të mbledhur në
aeroportin e Prishtinës. Arbeni, një djalosh rreth të 20-tave,
nga Gjakova, anëtar i tifozëve "Djemtë e Jakovës",
të vetmit që kishin ardhur të organizuar për të
pritur futbollistët shqiptarë, ndihej i emocionuar para futbollistëve
shqiptarë. Duke mbajtur një fanelle të ngjashme me atë
të kombëtares shqiptare dhe një shallë në dorë,
është shprehur se ndjen kënaqësinë më të
madhe që kur e ka ndjekur futbollin. "Eshtë një rast
i veçantë. Ata janë futbollistët më të
mirë shqiptarë, ndaj nesër (sot) do të jetë festa
e madhe e futbollit shqiptar në Prishtinë".
I pyetur se për kë do të bëjë tifozllëk,
Arbeni tregon se nuk do të bëjë dallim, pasi aty në
mesin e kombëtares shqiptare është edhe gjakovari Besnik
Hasi. Por shton se emocionet do ta lidhin pak më shumë me përfaqësuesen
e Kosovës.
Pasi kanë zbritur nga avioni, i gjithë delegacioni i kombëtares
shqiptare është transportuar me autobus për në qendër
të kryeqytetit të Kosovës. Një veturë e policisë
u ka ardhur atyre në ndihmë për të kaluar më
lehtë në dendurinë e trafikut të makinave.
Me të mbërritur në ambientet e Hotel Grandit, lojtarët
janë drejtuar drejt restaurantit për të ngrënë
drekën dhe pastaj janë sistemuar nëpër dhomat e hotelit.
Njëri ndër lojtarët kyç të kombëtares
shqiptare, Bledar Kola, i rikthyer sërish në kombëtare
për ndeshjen me Kosovën, pas një lëndimi që kishte
pësuar, shprehet i entuziasmuar: "Ardhja në Prishtinë
është diçka që i mungonte kombëtares, por që
u arrit me iniciativën e lojtarëve dhe të stafit teknik".
Ndërsa qendërmbrojtësi kuqezi, Geri Çipi, më
shumë i koncentruar në fjalët që thotë, shprehet
pro fjalëve të Kolës, duke shtuar vetëm se "ndihem
shumë i gëzuar që do të luajmë një ndeshje
në Prishtinë për Kosovën, tifozët e të cilës
na kanë ndihmuar gjithmonë, duke qenë edhe pranë nesh
në takime të ndryshme në Tiranë. Përballë
meje do të jenë edhe disa ish-lojtarë me mua në ekipe
të huaja si Besnik Kollari, Ismet Munishi dhe Mehmet Dragusha",
kujton Çipi ditët e bashkëpunimit me këta futbollistë
kur luanin me ekipin kampiona të sllovenisë, Maribor.
Në këtë kohë, futbollistët e kombëtares
shqiptare lënë hotel Grandin, dhe shkojnë në një
takim me presidentin e Kosovës, Ibrahim Rugova. Këtu, presidenti
Rugova u ka uruar mirseardhjen duke u shprehur se do të jetë
i pranishëm në takimin e nesërm (sotëm). Pasdite,
në ora 17:30 kombëtarja shqiptare ka zhvilluar një seancë
të lehtë stërvitore në stadiumin buzë Arbërisë
në Prishtinë. Pas tyre, për herë të fundit kanë
prekur fushën e stadiumit ku do zhvillohet takimi i sotëm edhe
futbollistët e përfaqësueses së Kosovës.
Interesim ndërkombëtar për takimin miqësor Kosovë
- Shqipëri
Miqësorja, në "syrin"
e mediave të huaja
Takimi miqësor mes përfaqësueseve të Kosovës
dhe Shqipërisë në futboll i ka tejkaluar përmasat
e një takimi kombëtarë. Kjo, për faktin se qysh dje,
në Prishtinë është vënë re një interesim
i jashtëzakonshëm i mediave të ndryshme sportive, por edhe
i menaxherëve jashtë Kosove.
Kështu, gazeta më e madhe sportive italiane "La Gazzetta
Della Sport" do të ketë në stadium gazetar të
saj, duke dhënë një artikull special lidhur me këtë
ndeshje. Të njejtën gjë janë të gatëshme
ta bëjnë edhe media të tjera të huaja që gjenden
në Kosovë. Nga ana tjetër, menaxherë të ekipeve
të huaja, të cilët mësohet se janë të të
interesuar për shërbimet e futbollistëve shqiptarë,
nuk e kanë patur të vështirë të gjejnë Prishtinën
në itinerarin e tyre drejt zbulimit të talenteve për ekipet
e tyre. Bëhet fjalë për disa menaxherë nga Belgjika,
por ka edhe anglez, të cilët kanë arritur të vijnë
në Kosovë me ndërmjetësinë e menaxherit kosovarë
me licencë të FIFA-së, Elver Raça, klient të
të cilit janë shumë futbollist të kombëtares
shqiptare.
D. L.
Në konferencën për shtyp të dy
trajnerëve të skuadrave duken qartë emocionet e para
Trajnerët, formacionet enigmë
As njëri dhe as tjetri trajner, nuk kanë
qenë të gatshëm për t'i bërë publik 11-at
e parë që do të startojnë në takimin ndërmjet
këtyre dy kombëtareve.
Trajneri Sokoli dhe homologu i tij Dosena, në një konferencë
shtypi të zhvilluar në "Grand", pohuan se u nevojitet
edhe një stërvitje tjetër për të përcaktuar
formacionin e parë.
I pari që e ka marrë fjalën, trajneri i kuqezinjve të
Shqipërisë, Xhuzepe Dosena, ka pohuar se ndeshja me Kosovën
është prova e fundit para takimit me Zvicrën, takim ky
i vlefshëm për eliminatoret e kampionatit Evropian të 2004.
"Ndonëse nuk e njoh shumë kualitetin e futbollit këtu,
ndeshjen me Kosovën e kemi marrë shumë seriozisht, pasi
është shumë e rëndësishme përne në
prag të ndeshjes zyrtare me Zvicrën", - është
shprehur Dosena.
Në dallim nga italiani, në krye të kombëtares shqiptare,
i përkushtuar vetëm për ndeshjen e nesërme, homologu
i tij kosovar Bylbyl Sokoli, ka gjykuar se rezultati i ndeshjes është
për të në plan të dytë.
Të njejtin mendim e kanë ndarë edhe dy presidentët
e Federatave të futbollit në Shqipëri dhe Kosovë,
Armando Duka dhe Sabri Hashani. Ata kanë theksuar se me këtë
ndeshje, do të fillojë një etapë e re e bashkpunimit
të ndërsjelltë.
Pas kësaj konference për shtyp, Ahmet Beselica, njëri ndër
dy futbollistët që kishte mbrojtur ngjyrat e Kosovës, edhe
në vitin 1993 kundër Shqipërisë, nuk ishte në
gjendje të thoshte se cili ekip do të jetë më mirë
kësaj radhe. "Atëherë kemi humbur 3-1 në Tiranë,
pasi kemi qenë mjaft të përgatitur teknikisht, por nga
ajo kohë, futbolli shqiptar ka ecur shumë para nesh".
E mërkurë 4Shtator
2002
Përfaqësuesja e Kosovës në prag
të ndeshjes miqësore të së premtes ndaj asaj të
Shqipërisë
Kosovarët, sfidë kuqezinjve
të Shqipërisë
"Nuk ka asnjë ankesë nga futbollistët
për dëmtime. Të gjithë janë të gatshëm
për lojë, çka është një sinjal i mirë
për trajnerin, që mund t'i llogaritë të gjithë
të përzgjedhurit,"- thotë mjeku i ekipit, Bashkim
Islami
Nga Prishtina, Bekim Devaja
Me stërvitjen e 2 shtatorit, zyrtarisht filluan përgatitjet
e përfaqësueses së Kosovës për takimin miqësor
me Shqipërinë. Trajneri i Kosovës, Bylbyl Sokoli, filloi
punën me mbërritjen e të gjithë lojtarëve në
Prishtinë, emrat e të cilëve kishin figuruar në listën
e tij të publikuar ditë më parë. Nga lojtarët
e thirrur në stërvitjen e parë, e cila u zhvillua në
stadiumin e "Ramiz Sadiku" munguan vetëm sulmuesi Zenun
Selimi dhe mbrojtësi Arsim Abazi, të cilët pritet të
inkuadrohen në përgatitjet e ekipit në Prizren.
"Përfaqësuesja jonë, thuajse e kompletuar, filloi
përgatitjet për ndeshjen e së premtes. Përveç
Abazit dhe Selimit, të cilët munguan me arsye, i pari pritet
të arrijë në çdo çast, pasi tashmë është
nisur nga Turqia, ndërsa të dytit i është dhënë
pushim, pasi kishte zhvilluar një ndeshje kampionati dhe ishte i
lodhur,"- tha trajneri Sokoli. Ai bëri të ditur se nesër
dhe pasnesër stërvitja do të vazhdojë në stadiumin
"Përparim Thaçi" të Prizrenit, pas së
cilës do të mësohen edhe emrat e 18 lojtarëve për
ndeshjen me kombëtaren shqiptare, ndoshta edhe 11-shi i parë.
Në stërvitjen e parë u vërejt edhe sulmuesi i KEK-ut,
Ylber Aliu, me shtetësi maqedonase, përfshirja e të cilit
në ekip ishte me pikëpyetje, për shkak të problemit
me dokumentacionin, i cili e shpall banor të Kosovës. "Tashmë
është rregulluar dokumentacioni i Ylberit dhe ai është
përfshirë në stërvitje. Me dokumentacionet janë
kompletuar të gjitha repartet,"- tha Sokoli.
Gjatë dy ditëve të qëndrimit në Prizren, përfaqësuesja
e Kosovës do të punojë nga dy herë në ditë.
"Ditën e parë, paradite, do të punohet në mënyrë
ekipore, pasdite do të punohet me reparte, ndërsa të enjten
do të shikojmë t'i bashkojmë repartet dhe përafërsisht
të kemi një pasqyrë më reale rreth përbërjes
së parë,"- tha trajneri Sokoli. Ai gjithashtu bëri
të ditur se në përbërjen e parë pritet të
aktivizohet edhe Ardian Kozniku, i cili ka rënë dakort që
të veshë fanellën e ekipit të Kosovës të
premten, më 6 shtator.
Lajm i mirë për Sokolin është se të gjithë
lojtarët e thirrur në përfaqësuesen e Kosovës
janë mirë fizikisht dhe askush nuk ka probleme dëmtimi.
"Nuk ka asnjë ankesë nga futbollistët për sa
u përket lëndimeve. Të gjithë janë të gatshëm
për lojë, një sinjal i mirë ky për trajnerin,
i cili mund t'i llogaritë për lojë që të gjithë,"-
tha mjeku i ekipit, Bashkim Islami.
Në mes të lojtarëve vërehet optimizëm i madh,
edhe pse ishte stërvitja e parë e zhvilluar bashkërisht.
"Kjo ndeshje ka rëndësi të madhe për ne. Jam
optimist dhe mendoj se kemi forcë që të bëjmë
një rezistencë të mjaftueshme. Shpresoj për një
rezultat të favorshëm, nëse të gjithë angazhohemi
maksimalisht,"- deklaroi Enis Fetahu, aktualisht anëtar i ekipit
kroat, Zagreb.
Për lojtarin e ekipit gjerman të Eintrahtit të Trierit,
Mehmet Dragusha, rezulati i kësaj ndeshjeje të rëndësishme
për përfaqësuesen e Kosovës është në
plan të dytë, për vetë faktin se ndeshja është
historike. "Pres angazhim maksimal të të gjithëve
dhe, natyrisht, që të lëmë përshtypje të
mirë. Do të përpiqemi me të gjitha forcat t'i tregojmë
aftësitë tona. Rezultati nuk do të jetë edhe aq i
rëndësishëm,"- theksoi Dragusha.
Ja përfaqësuesja e Kosovës për ndeshjen ndaj Shqipërisë:
Portierë:
Ahmet Beselica (Prishtina)
Besart Bajraktari (Prishtina)
Masar Çosa (Besiana)
Bujar Thaçi (Liria)
Mbrojtës:
Arsim Abazi (Malatiaspor, Turqi)
Faruk Statovci (KEK)
Fadil Ademi (Drita)
Patrik Doçi (Liria)
Ynall Duraku (Besiana)
Adnan Haliti (Prishtina)
Mesfushorë:
Ismet Munishi (Kocaelispor, Turqi)
Besnik Kollari (Prishtina)
Xhevdet Llumnica (Prishtina)
Bekim Isufi (KEK)
Sunaj Keqi (Drita)
Emin Ismajli (Drita)
Mehmet Dragusha (Eintraht Trier, Gjermani)
Ndrec Komani (Besiana)
Naser Jasiqi (Besa)
Sulmues:
Zenun Selimi (Delemont, Zvicër)
Enis Fetahu (Zagreb, Kroaci)
Kushtim Munishi (Besiana)
Ylber Aliu (Besiana)
Ardian Kozniku (Kroaci)
Takimi Kosovë-Shqipëri, rast për sulmuesin gjakovar
që të varë këpucët e përfaqësueses
së Kosovës
Ardian Kozniku: Shqipëria,
ndeshja lamtumirës!
Nga Prishtina, Driton Latifi
Pas disa muaj pushimi nga karriera mjaft e pasur e futbollistit, Ardian
Kozniku ka zgjedhur ndeshjen miqësore Kosovë-Shqipëri për
të përfunduar karrierën e tij me përfaqësuesen
e Kosovës.
Ndonëse jo në top-formë, sikur e kemi parë në
të kaluarën me ekipet evropiane, si Hajduku i Splitit, Kana,
Lë Havrë, Bastia, Apoen Nikosia, Dinamo e Zagrebit dhe Karnteni,
pritet që sulmuesi gjakovar të paraqitet së paku 20 minuta
në takimin e tij të fundit në fanellën kuqezi të
përfaqësueses së Kosovës, të cilën e respektoi
shumë herë, duke luajtur në ato pak ndeshje modeste të
përfaqësueses sonë gjatë viteve '90.
"Pas bisedave me miq dhe shokë të mi, si dhe duke vërejtur
moshën në të cilën jam, vendosa të paraqitem
për herë të fundit me fanellën e përfaqësueses
së Kosovës,"- i deklaroi "Kohës ditore"
Ardian Kozniku, i cili me familjen kishte ardhur në Gjakovë
për të kaluar pushimet. "Tërë jetën kam
qenë në futboll i angazhuar dhe aty do të mbetem edhe më
tutje. Por ka ardhur koha që Kosova të mbështetet te forcat
e reja, te talentet e reja, të cilat pa dyshim janë mjaft. Ndeshja
me Shqipërinë është rasti më i mirë për
të përshëndetur ndonjë futbollist nga përfaqësuesja
e Kosovës, ndonëse futbollin ekipor, në rast se e ruaj
formën dhe nëse do të kem oferta, ndoshta edhe do ta vazhdoj,"-
shtoi futbollisti 35-vjeçar më tutje.
Kozniku është paraqitur në 7 ndeshje të përfaqësueses
së Kroacisë dhe ka shënuar dy gola. Gjithashtu ka arritur
me të zgjedhurit e Çirës edhe në Botërorin
1998, ku fituan medaljen e artë, ndonëse futbollisti ynë
nuk arriti ta tregonte plotësisht formën e tij në fushë.
Sidoqoftë, Kozniku është paraqitur në ndeshjen e parë
me përfaqësuesen e Kosovës ndaj asaj të Shqipërisë,
të zhvilluar më 14 shkurt 1993 në Tiranë, kur përfaqësuesja
jonë humbi 3-1.
E martë 3 Shtator 2002
Në seancën stërvitore të ditës
së djeshme, Dosena ka pasur 14 futbollistë në dispozicion
Kombëtarja, fillojnë
përgatitjet për Kosovën
Trajneri i kombëtares shqiptare, italiani Xhuzepe Dosena,
ka nisur dje pasdite fushatën përgatitore për takimin miqësor
me Kosovën. Ashtu si në ditët e stërvitjes dhe grumbullimit
për ndeshjen me Breshian, bashkë me kuqezinjtë që
ka pasur në dispozicion, trajneri ka zbarkuar në kompleksin
sportiv "Partizani". Stërvitja e parë ka nisur në
orën 17.30 minuta dhe të pranishëm në të kanë
qenë këta futbollistë: Lika, Nallbani, Fakaj, Lala, Klodian
Duro, Hasi, Muka, Gallo, Sina, Bushi, Tare, Rraklli, Bogdani dhe kosovari
Lorik Cana. Në seancën stërvitore të ditës së
djeshme, bashkë me Dosenën kanë qenë edhe ndihmësi
i tij Daniele Pilexhi dhe përgatitësi i portierëve. Numri
i lojtarëve që kanë marrë pjesë në këtë
stërvitje të lehtë ka qenë 14 veta. Nga këta,
katër i përkasin kampionatit shqiptar, ndërsa të tjerët
luajnë jashtë vendit. Mes të mbërriturve të ditës
së djeshme ka rënë në sy edhe kosovari 20-vjeçar,
Lorik Cana, i cili luan për ngjyrat e Paris SG. Ai i është
bashkuar grupit tjetër të lojtarëve dhe ka kryer stërvitjen
e parë me kuqezinjtë e Shqipërisë. Ndërkohë,
burime pranë stafit të kombëtares kanë konfirmuar
se legjionarët e tjerë priten të vijnë sot në
Tiranë. Po ashtu, është mësuar përfundimisht
se mesfushori kuqezi, Fatmir Vata dhe vlonjati Ervin Skela, nuk do të
jenë të gatshëm për miqësoren e 6 shtatorit në
Prishtinë. I pari është i dëmtuar që në
takimin me Breshian dhe nuk është aktivizuar as me ekipin ku
luan në Gjermani, Arminian, ndërsa Skela nuk është
lënë i lirë nga skuadra e tij. Të njejtat burime pranë
stafit të ekipit kombëtar kanë pohuar dje se takimi i planifikuar
për t'u luajtur sot në "Selman Stërmasi" mes
kombëtares dhe ekipit të Shpresave nuk do të realizohet.
Shkak për këtë është bërë zhvillimi
i një kupe simbolike mes katër skuadrave më të mira
të kampionatit shqiptar. Kështu që Dosena do të vijojë
intinerarin e tij të stërvitjes në kompleksin "Partizani",
duke zhvilluar nga dy stërvitje në ditë, njërën
paradite dhe tjetrën pasdite. Sistemimi i futbollistëve të
kombëtares vazhdon të bëhet në hotel Linza.
A. LL
Sulmuesi kuqezi gjykon dy ndeshjet miqësore para
Zvicrës dhe shprehet optimist për kualifikimin në grup
Rraklli: Kualifikimi mundësi,
jo dëshirë
Kavajasi i kombëtares shqiptare, Altin Rraklli, shprehet optimist
për atë çka mund të arrijnë kuqezinjtë
tanë në eliminatoret e Kampionatit Evropian të 2004-ës.
Nuk e fsheh se i ka lënë njëfarë shije të keqe
mosaktivizimi në miqësoren ndaj Breshias, por pretendon se në
Kosovë do të luajë që nga fillimi. Ka mbërritur
i pari nga "legjionarët" që luajnë jashtë,
për t'u vënë nën urdhrat e trajnerit Dosena në
kohën e duhur. Bashkë me synimet e tij personale në ndeshjet
me fanellën kuqezi, Rraklli flet edhe për ekipin e tij të
ri turk, Diabakirsporin. Në një intervistë për "Sportin
shqiptar", sulmuesi i kombëtares zbulon gjithçka në
këtë drejtim.
- Rraklli, keni ardhur i pari në grumbullimin për miqësoren
me Kosovën. Çfarë prisni nga ky takim?
- Kam ardhur në Tiranë që të dielën për
t'iu përgjigjur në kohë ftesës së trajnerit Dosena.
Ndërsa për atë se çfarë pres nga takimi i Prishtinës,
ajo dihet. Dëshira e çdo futbollisti që vesh fanellën
kuqezi është që të luajë. Këtë gjë
e dëshiroj edhe unë në takimin që do të luajmë
me vëllezëri tanë kosovarë.
- Jeni grumbulluar edhe për takimin me Breshian, por nuk jeni aktivizuar.
Si jeni ndier?
- Këtë nuk mund ta fsheh. Deri diku kam mbetur i mërzitur
për mosaktivizimin tim në atë ndeshje. Këtë e
them duke u nisur nga fakti që ishte një ndeshje miqësore
dhe kishte vend për t'u aktivizuar të gjithë. Në këtë
pikë i jap të drejtë trajnerit për të eksperimentuar
edhe me lojtarë të rinj, por, meqë ishte ndeshja e tij
e parë, prisja të më fuste në lojë edhe mua.
Ishte diçka e vështirë për momentin, por në
ditët pas ndeshjes ka kaluar gjithçka. Në ndonjë
rast, kur i jam rikthyer këtij momenti dhe e kam analizuar me veten
time, kam gjykuar: më mirë që nuk u aktivizova fare, sesa
5 minuta, ku nuk mund të jepja asgjë nga forma ime. Pra, e kam
harruar atë çast dhe i kam hedhur sytë përpara,
në takimet që na presin.
- Cili është mendimi juaj për stërvitjen dhe frymën
që ka sjellë Dosena në kombëtaren shqiptare?
- Dosena është një profesionist i vërtetë si
trajner dhe si lojtar, një ish-kampion bote. Duke qenë kështu,
edhe "menyja" e stërvitjes që ka sjellë ai në
kombëtaren tonë është e tillë. Trajneri i ri
italian po i kushton më shumë rëndësi aspektit taktik
të lojës, duke dashur të fusë idetë e tij edhe
në rreshtimin në fushë. Në takimin me Breshian, mendoj
se ia ka arritur pak a shumë kësaj. Sistemi që po përdor
Dosena nuk është i ndërlikuar, ndaj duhet adoptuar shumë
shpejt nga të gjithë ne.
- Dy takime miqësore përpara ndeshjes me Zvicrën. Mund
t'i quajmë ato një test i vërtetë për kombëtaren
tonë dhe trajnerin Dosena?
- Jo, kurrsesi. Takimet miqësore quhen të tilla sepse në
to eksperimentohet. Duke qenë kështu, asnjë ekip nuk jep
maksimumin e tij. Për këtë le t'i rikthehemi ndeshjes me
Breshian. Unë, që e kam parë lojën nga stoli, kam
vënë re se lojtarët italianë nuk kishin impenjimin
e duhur. Pra, fare mirë mund të thuhet se përballë
nesh nuk ishte ajo Breshia e kampionatit italian. Tani do të luajmë
me Kosovën. Nuk e njoh fare formacionin e tyre, por prapëseprapë
mendoj se edhe në këtë takim nuk do të jenë "nervat"
e tendosura në maksimum, siç mund të jenë ndaj Zvicrës
më 12 tetor.
- Të kthehemi te skuadra juaj e re. Jeni titullar me Diabakirsporin,
por nuk e keni gjetur ende golin. Komenti juaj për këtë?
- Mund të them se jam ambientuar shumë mirë në kampionatin
turk. Madje te Diabakirspori e kam gjetur veten plotësisht. Tani
për tani më mungon vetëm goli, dhe kjo më shumë
për fat sesa për dobësinë time. Dy javët e para
të kampionatit nuk u aktivizova, pasi nuk më kishin ardhur ende
letrat nga Gjermania. Ndërsa në dy ndeshjet e tjera kam luajtur
si titullar. Në takimin e së shtunës, ndaj Beshiktashit,
kam paraqitur një formë të jashtëzakonshme sportive.
Vetëm fati nuk më ka ndihmuar të arrij te goli, pasi rastet
i kam pasur të shumta.
- Së fundi, me këta lojtarë që ka kombëtarja
jonë aktualisht, cilat do të ishin synimet për Evropianin
e 2004-ës?
- Duhet pranuar nga të gjithë se, që në kohën
e Hafizit, kombëtarja shqiptare ka ardhur gjithnjë në ngritje.
Kjo, falë punës së trajnerëve tanë dhe vetë
futbollistëve. Shumica e lojtarëve aktivizohen në kampionate
të ndryshme të Evropës, ndaj kanë përfituar shumë
nga ana profesionale. Tani, edhe me ardhjen e trajnerit Dosena, kam shpresë
se do të jemi një ndër pretendentët seriozë në
grupin tonë për t'u kualifikuar.
Alfred LLESHI
Skela, mungesa e radhës në
kombëtare
Futbollisti i kombëtares sonë, Ervin Skela, do të jetë
i munguari i radhës në miqësoren ndaj kosovarëve.
Kësisoj, vlonjati do ta çojë në dy, numrin e legjionarëve
që luajnë jashtë, por që nuk do të jenë
të gatshëm për italianin Dosena në këtë
provë të dytë para ndeshjes me Zvicrën. Nëse
Fatmir Vata do të mungojë për shkak dëmtimi, Skela
nuk është lënë i lirë nga klubi i tij për
të ardhur në Tiranë. Skuadra ku aktivizohet, Eintrahti
i Frankfurtit, luajti të shtunën e kaluar ndeshjen e Kupës
së Gjermanisë ndaj Erfurtit dhe u kualifikua në minutën
e 118-të, falë golit të shënuar prej shqiptarit, kur
koha e rregullt kishte përfunduar 2-2. Ndaj, drejtuesit e klubit
të tij, duke e konsideruar shqiptarin si një forcë të
madhe për takimin e radhës në kampionat, nuk i kanë
dhënë leje për t'u grumbulluar me kombëtaren e vendit
të tij. Goli i artë i kualifikimit të Eintrahtit të
Frankfurtit në kupë, duket se ia ka rritur më tepër
vlerat vlonjatit kuqezi, ndaj është "gozhduar" prej
klubit gjerman të Ligës së dytë.
A. Ll
(marre nga Gazeta Sporti Shqiptar)
|
|
|