|
|
Faqja
Zyrtare e Rovena Dilos
Bli
Albumin e saj 'Ante'
Pozimi përpara aparatit fotografi iu duk si ajo loja e vjetër
që luante dikur me babain e saj dhe xhaxhi fotografin. Këtë
herë babai ia la në mes këtë lojë. Ai iku nga
kjo jetë…ndërsa ajo vazhdoi e vetme, bashkë me
fotografin. E realizoi kalendarin për hir të të atit.
Atij ia përkushtoi me gjithë shpirt gjithë stinët
e këtij viti.
Rovena Dilo tret dhimbjen në
një kalendar
Nëpër fotografitë e fëmijërisë prekte me
duar herë pas herë dëshirën për të punuar
me fotografinë, për të pozuar përpara aparatit fotografik
si atëherë kur ishte një lozonjare e vogël, si atëherë
kur babi e mësonte se si duhej të qeshte, se ku duhej të
ngulte vështrimin kur xhaxhi fotografi bëhej gati të shkrepte
aparatin. Në gjithë këto vite që kaluan që nga
ajo kohë, Rovena Dilo nuk e hiqte mendjen nga ajo lojë e bukur
mes saj, babit dhe xhaxhi fotografit. Një ditë prej ditësh,
nisi ta luante sërish atë lojë, edhe pse tashmë ishte
e madhe. U ngul përpara aparatit të fotografit të shquar
Fadil Berishës për të realizuar tre sekuenca fotografish.
Ishin këto të parat fotografi profesionale që iu shtuan
fotografive të bukura të fëmijërisë së saj.
Pak kohë më parë, u fokusua në objektivin e një
tjetër aparati fotografik. Jo më thjesht për të realizuar
një tekë të saj, por një qëllim më të
madh. Shtëpia botuese “Ilar” i kishte propozuar realizimin
e një kalendari me imazhin e saj. Rovena Dilo, nisi kështu një
aventurë të re brenda së cilës ndihej si kurrë
ndonjëherë. Në Bari, u shkrepën të parat fotografi
të këtij kalendari. Ndërsa ajo pozonte, fotografi gjerman
(që jeton në Milano) Ralph Geiling, fokusonte në objektiv
gjithë stinët e vitit kalendarik.
Loja që u përsërit…këtë herë pa babain
Si një
lojë e këndshme i dukej edhe këtë herë pozimi
përpara aparatit…mes saj, babit dhe fotografit. Ishte muaji
tetor kur ajo nisi punën për këtë kalendar. Edhe pse
babain nuk e kishte më afër si atëherë kur ishte fëmijë,
merrte prej telefonit shumë udhëzime. Ndodhi që “loja’
e vjetër mes tyre, këtë herë u la në mes. Babai
i saj iku nga kjo jetë (në muajin nëntor), ndërsa
ajo mbeti e trishtuar përpara fotografit, e pafuqishme për të
vazhduar më tej. Të afërmit e saj i ishin lutur që
të vazhdonte me stinët e mbetura të vitit dhe ajo ishte
bindur. Vendosi ta realizonte atë kalendar për babain e saj.
Dhe kalendari u bë. Kalendari këto ditë ka dalë në
treg me portretet e saj, në të cilat trishtimi nuk shfaqet.
Ndërsa të tjerët zgjasin duart ta shohin atë kalendar
ajo vetë pohon se-“Me shpirt këtë kalendar ia kam
kushtuar tim eti. Pas humbjes së tij sigurisht që unë mbeta
bosh dhe nuk kisha dëshirë të bëja asgjë. Madje
në ato ditë po bëhesha gati të dilja në festivalin
“Kënga magjike” jo për të konkurruar por për
të përshendetur me këngën fituese të një
viti më parë. Por nuk munda të këndoj pas kësaj
humbjeje që pësova. E vetmja gjë që munda të
bëj isha puna me fotografitë. Duke u marrë me kalendarin
gjëndja ime ndryshoi shumë, ndoshta sepse më dukej se im
atë më ndiqte në gjithçka, si më parë”,-tregon
Rovena me zërin që i dridhet. Pastaj për t’i shpëtuar
lotëve ndryshon bisedë-“Përderisa i mungova publikut
në dy festivalet e fundvitit pra në “Kënga magjike”
dhe në festivalin e 41-të të këngës në Radio-Televizion,
mendova të shfaqem me këtë kalendar për t’u
thënë të gjithë adhuruesve të mi:…”Gëzuar
Festat”.
Pas shkollës së Berishës
Propozimin për të realizuar një kalendar, shtëpia
botuese “Ilar” ia kishte bërë dhe një vit më
parë. Por atëherë nuk ishte e gatshme për të
bërë diçka të tillë. Ndërsa këtë
vit, ndërsa propozimi iu përsërit, Dilo nisi kërkimet
për një fotograf të mirë të cilin e gjeti-Në
Milano. Ralph Geiling është i njohur në Milano pasi ka
punuar me shumë fotomodele. Bashkë me stilistin Ardi Asllani
realizuam kostumet që do na duheshin për stinët e ndryshme
të vitit. Pastaj nisëm të bënim fotografitë të
cilat janë realizuar në Bari. Sigurisht që është
punuar shumë dhe gjatë nga i gjithë stafi i punës”.
Dilo tregon se e gjithë kjo nuk ishte aspak një ekperiencë
e re-“Ishte më e bukur se të tjerat, këtë mund
të them. Unë kam punuar me Fadil Berishën në vitet
1999, 2000 dhe 2001. Ky fotograf me bujarinë dhe vullnetin e tij
të mirë, më dha mundësinë që unë të
kap shijen e vërtetë të fotografisë artistike. Puna
me të ishte si të thuash një shkollë e vogël
për mua. Ndaj në punën për këtë kalendar
unë isha e përgatitur.” Rrëfimi i rrjedh sërish
tek e kaluara e saj-“Fotografia ka qenë një pjesë
e bukur e jetës sime që nga fëmijëria. Prindërit
e mi kanë pasur një mik fotograf, Nikolinin, ndaj unë që
fëmijë kam pozuar dhe kam realizuar foto që pak kush i
ka nga fëmijëria. Unë i ruaj me fanatizëm ato. Nga
ato fotografi është mbartur dëshira që unë kam
sot, për të pozuar”. Realizimi i këtij kalendari
është vetëm fillimi. Dilo dëshiron që në
çdo fundvit të realizojë një kalendar…për
ta thënë në këtë mënyrë urimin e saj
“Gëzuar”.
Humbja e përkohshme
Në dhjetorin e vitit që shkoi, Rovena Dilo fitoi bashkë
me Pirro Çakon, çmimin e parë në festivalin “Kënga
magjike”. E fituan këtë çmim me këngën
e tyre të dashurisë. Pak ditë më pas, të po këtij
dhjetori, fitoi çmimin e dytë në festivalin e 40-të
të këngës, me kompozimin e Ardit Gjebresë “Nostradamus”.
Vitin e Ri 2002, Rovena Dilo e nisi me spektaklin “Telebingo”
ku jo vetëm këndoi këngët e saj më të mira
por dhe iu rikthye pasionit të saj të vjetër…prezantimit.
Kishte vite pa drejtuar një spektakël që nga koha (vitit
1990) kur prezantonte bashkë me Adi Krastën “Mbrëmje
kulturore” në ekranin e TVSH-së. Për disa të
diela me radhë, ajo mbeti në ekran bashkë me Bledi Strakoshën
e Ornela Bregun. Pastaj iku, u zhduk. Nuk është shfaqur më
në ekran që atëherë. Në gjithë këto
kohë, më së shumti ka qenë në Itali. Pohon se
nuk ka asgjë nëpër duar, tani për tani. Po qëndron
atje thjesht për të qenë më e qetë-“Nuk
dua të flas shumë për këtë tani”,-shkëputet
ajo nga ky lloj shpjegimi. Ndoshta në fillim të këtij viti
që po vjen do nisë seriozisht punë për albumin e saj
të dytë…ndërsa i pari “Ante” ka kohë
që është shfaqur në vitrina. Deri atëherë
do të lëvizë edhe për ca kohë, mes Tiranës
dhe Barit.
(marre nga Shekulli)
|
|
|