|
|
Panairi V Ndërkombëtar
i Librit "Tirana 2002" është mbyllur dje. Organizatorët
janë të kënaqur me shitjen e librave
Suksesi i panairit
lidhja më e madhe
me lexuesit
Arritja më e madhe e panairit këtë herë është
quajtur numri i madh i vizitorëve që kanë vizituar stendat
e shumta të shtëpive botuese. Një tjetër arritje është
shënuar shitja më e madhe që iu bë librave, krahasuar
me një vit më parë. Si dhe interesi i të rinjve ndaj
librit ka qenë shumë më i madh këtë herë.
Në një konferencë për shtyp të organizatorëve,
mbajtur dje në ditën e fundit të panairit, ky edicion i
pestë i tij u cilësua si më i suksesshmi ndër edicionet
e mëparshme. Drejtoresha e Qendrës Ndërkombëtare të
Kulturës (QNK-së), Vera Isaku, cilësoi si eveniment të
këtij viti në panairin "Tirana 2002, interesin e vizitorëve
të rinj, gjë që sipas saj, "dëshmon kthim e të
rinjve tek libri". Ndërsa kryetari i Lidhjes së Botuesve
Shqiptarë, Fatmir Toçi, renditi të veçantat që
solli panairi "Tirana 2002". Ai pohoi se, "ky panair arriti
numrin më të lartë të ekspozuesve, rreth 100 botues
nga Shqipëria, Kosova, Maqedonia, Mali i Zi dhe vende të ndryshme
të botës si, Gjermania, Kanadaja (të cilat në fakt
u prezantuan nga ambasadat e tyre përkatëse këtu në
Tiranë) dhe Italia ( e cila krahas disa shtëpive botuese u prezantua
dhe me Institutin Italian të Kulturës) "Gjithashtu",
tha ai- "është pozitive prania e madhe e autorëve
shqiptarë, një shitje e konsiderushme e librave deri në
70 mijë libra si dhe e rreth 50 mijë vizitorëve që
ndoqën këtë panair" (ishte kjo një shifër
që në fakt pak a shumë ishte parashikuar edhe kur panairi
ende nuk kishte filluar. Kështuqë parashikimi nuk i gaboi organizatorët).Edhe
drejtori i drejtorisë së librit pranë Ministrisë së
Kulturës, Stefan Çapaliku, e vlerësoi këtë
panair duke u shprehur se "ka një ndryshim të jashtëzakonshëm
midis këtij panairi dhe edicionit të parë të tij".
Ai gjithashtu foli për dy synimet e Ministrisë së Kulturës
në fushën e librit që mund të realizohen brenda vitit
2002, si uljave e taksave mbi librin dhe krijimi i Qendrës Kombëtare
të Librit.
I vendosur në një sipërfaqe prej 2000 metra katrorë
dhe i ndarë në 75 pavione, në këtë panair u ekspozuan
rreth 10 mijë tituj librash, midis të cilëve 1500 botime
të vitit 2002. Përveç ekspozimit të librit, një
vend të rëndësishëm në këtë aktivitet
të madh zunë promovimet e botimeve, debatet e ndryshme ku u
trajtuan probleme që lidhen me botimin, shpërndarjen e librave,
etj. Ndërkohë, ashtu si dhe në edicionet e tjera, në
panairin e librit "Tirana 2002" ishin të ftuar mjaft autorë,
midis të cilëve dhe të huaj si kanadezi Ron Smith, Sabri
Hamiti, Ali Aliu, Ali Podrimja, etj. Organizimi i këtij panairi u
bë i mundur nga Qendra Ndërkombëtare e Kulturës së
bashku me Lidhjen e Botuesve Shqiptarë, me mbështetjen e Ministrisë
së Rinisë Kulturës dhe Sporteve (MKRS-së). Po në
konferencën e djeshme për shtyp është vendosur edhe
për datën e zhvillimit të panairit vitin e ardhshëm,
i cili do të mbahet në data 5-10 Nëntor, të vitit
2003. Kryetari i Lidhjes së Botuesve, Toçi, bëri të
ditur se për herë të parë në datat 29 maj-1 qershor
të vitit që vjen, organizatorët e këtij panairi do
të çelin për fëmijët "Panairin e librit
dhe lodrave".
Opinione
Vath Koreshi
Më është dukur një panair që arriti disa nga
objektivat e tij
arriti të çojë librin tek lexuesi.
Kjo të bën të mendosh se duhet të bëhet një
punë më e mirë me shpërndarjen e librit. Në fakt
është arritur një vëllim i madh botimesh, por sidoqoftë
ende mund të themi se janë pak tituj. Se mungojnë mjaft
autorë e tituj të mëdhenj ndër këta botime. Ndërsa
libri i huaj është një mundësi për ta hapur pak
më tej horizontin e librit dhe të botimeve tona.
Djana Çuli
Në këtë panair kishte një shumëllojshmëri
titujsh që nga fjalorët e ndryshëm, librat e sociologjisë,
filozofisë, historisë, e deri tek titujt e shumtë letrarë.
Kjo është një arritje sepse pak nga pak po vijnë libra
që kanë munguar prej kohësh në botimet tona në
shqip. Kjo ndoshta ka ardhur si një kërkesë e lexuesve
por edhe si një nuhatje e shtëpive të ndryshme botuese,
nisur nga mungesa e gjatë e këtyre titujve në treg. Po
ashtu vihej re një profilizim i shtëpive botuese. E disa prej
tyre kanë zgjedhur të sjellin librin e huaj dhe t'i japin përparësi
atij, disa të tjerë kanë zgjedhur librin shqip, disa librat
e filozofisë, të sociologjisë, etj. Kësisoj pak nga
pak, secila prej këtyre shtëpive botuese po e gjen fytyrën
e vet, duke u nisur që nga zgjedhja e kopertinave, ngjyrat, etj e
deri tek tematikat që ata zgjedhin. Edhe prania e librit ndërkombëtar
në këtë panair, mendoj se është një arritje
tjetër. Është një hapje pak më përtej për
letërsinë. Kështu në panair ishte këtë vit
shtëpia botuese "Besa", e cila prej 10 vitesh boton në
Pulje të Italisë krahas librave të huaj edhe librin shqip.
Kësisoj po bëhet një përqasje mes shtëpive botuese.
Por veç këtyre mund të përmendej në këtë
panair edhe atmosfera e krijuar gjatë këtyre ditëve që
ai ishte i hapur, prania e një numri të madh shkrimtarësh
poetësh e studiuesish, si dhe njerëz të tjerë të
apasionuar pas librit. Një ngjarje e tillë, besoj, është
një moment kulturor i rëndësishëm
Visar Zhiti
Ishte një panair i rëndësishëm që solli librin
tek njerëzit dhe njerëzit i çoi tek libri. Vetë
Papa ka thënë se : "Nuk na duhet një demokraci pa
virtyt". Libri është një virtyt i shoqërisë
dhe i individit njëkohësisht. Ishte më i madhi dhe më
i preferuari panair në Tiranë dhe me qindra tituj librash. Është
një gëzim për botën e letrave, megjithatë duhet
pasur edhe pak kujdes. Vetë inteligjenca duhet t'i kthehet vetëkontrollit,
dhe të kërkojë sa më shumë cilësi, sepse
një libër i madh ( i mirë ) ngërthen në vetvete
shumë libra, por shumë libra nuk mund të jenë një
libër i mirë. E nëse vetë autorët bëjnë
lëshimë e kërkojnë të botojnë pa kriter,
vetë botuesit duhet të ngrenë barriera mes vlerave e mediokritetit
dhe t'i dhurojnë lexuesit librin me vlerë. Unë mendoj se
po mbërrijmë në këtë stad. Megjithatë një
panair libri në kryeqytet, është një sfidë që
i bëhet rrëmujës, aluvionit të fjalëve të
politikanëve dhe mediave që iu bëjnë jehonë.
E them këtë duke u mbështetur në kredon time "një
liqër më shumë, një armë më pak, derisa
të mbërrijmë tek arma e vërtetë, libri".
Luan Pengili, botues
Ishte një panair, ku vëmendja ndaj librit ishte shumë më
e theksuar se herët e tjera. Mendoj se këtë vit jo vetëm
që është ekspozuar libri, por edhe është shitur.
Po ashtu kemi mundur të kthejmë vëmendjen tek libri shqip.
Shtëpia jonë botuese e ka kthyer në qëllim botimin
e këtij libri. Dje në këtë panair është
vënë re se interesi për librin shqip ka qenë më
i madh nga vitet e kaluara. Por edhe vëmendja e botuesve për
të sjellë tek lexuesit librin dhe autorët shqiptarë
po vjen në rritje nga viti në vit.
Librat më të kërkuar në panairin "Tirana
2002"
"Toena" "Fjalori i gjuhës shqipe", "Ilirët
(jeta dhe tradita)" Aleksandër Stipçeviç, "Djalli
dhe zonjusha Prym, "Veronika vendos të vdesë" të
Paolo Koelho, "Fjalori sinonimik", "Eneida" e Virgjilit,
etj
"Onufri" :"Jeta, loja dhe vdekja e Lul Mazrekut" e
Ismail kadaresë, "stinë e mërzitshme në Olimp"
I.Kadare
"Ombra GVG" "Një tragjedi amerikane" e Teodor
Drajzer, "Martin Iden" e Xhek Londonit, "mërgimi dhe
mbretëria" e Albert Kamy
"Ora" " 11 shtatori 2001, Mashtrimi i frikshëm"
i Thierry Meysson
"Albas" "Rruga në të cilën rrallë shkohet"
e Scot Peck, "Letërsia moderne" e Sabri Hamitit"
"Omsca" "Ferri i çarë" i Visar Zhitit,
"Intervistë me vetveten" e Petro Markos, "Një
natë dhe dy agime" Petro Marko, "Al Kapone", etj
"Kokona" "Fjalori frëngjisht- shqip" i Vedat
Kokonës, "Nga Tirana në Stokholm" Vedat Kokona
"Uegen" 'Padurimi i zemrës" Stevan Cvajg, "Idioti"
Dostojevski, "Familjet e mëdha" Maurice Druan
"Argeta LMG" "Novela" Cvajg, "Nastradini"
anektoda, "Lirika" Sergej Esenini
"Fan Noli" Seria e librave të Frojdit, "Fjalët"
e Zhan Pol Sartrit" "I huaji" Kamy
"Dudaj" "Vepra" e Faik Konicës, "Bijë
prostitute" e Kristinë Gren
"Afërdita" "Fan Noli, antologji fotografike"
"Princi Ring" përrallë islandeze
"Bargjini" "Park Avenju" e Harold Robins, "Tregime
të zgjedhura" përkthyer nga Robert Shvarc
"Albin""Nostalgjia" Milan Kundera, "Fjalor ekonomiko
financiar" Aristotel Pano
"Dukagjini" "Ikja nga kompleksi i Rozafës" Artan
Fuga
"Elite" "Baroni rebel" Italo Calvino
"Naim Frashëri" "Një dashuri" Dino Buzzati,
"Diplomacia" Henry Kisinger
"Sejko" "Ditari i Brixhit Xhons" Helen Filldings,
"I love Tom Hanks", "Ditë e bardhë e fyer",
"Yjet nuk vishen kështu", të Elvira Donesit, "Letër
një fëmije që kurrë s'u lind" e "Orjana
Fallacit, etj
Marrë nga Gazeta Shekulli
|
|
|