|
|
Politikanët, diplomatët
dhe qytetarët, të dielën në rrugë. Asnjë
makinë nuk do të qarkullojë në qendrat e 15 qyteteve,
që kanë pranuar nismën "Një ditë pa makinën
time"
Asnjë makinë, të dielën, në rrugët e 15 qyteteve Ditës
pa makina do t'i bashkohen 15 qytete të vendit dhe mjaft aktivitete
të tjera sportive dhe kulturore. Nisma evropiane, e iniciuar nga
Komuniteti Evropian "Një ditë pa makinën time",
e cila do të aplikohet ditën e diel, është përkrahur
dje nga 15 kryetarë bashkish, të cilët kanë vendosur
që atë ditë asnjë makinë të mos lëvizë
në rrugët kryesore të këtyre qyteteve. Iniciativa
e re, e cila aplikohet për herë të parë në vendin
tonë, ka si qëllim ndërgjegjësimin e qytetarëve
për rolin e ndotësve kimikë që shkarkohen në
mjedis nga automjetet. Nga të dhënat e Ministrisë së
Mjedisit, 50 për qind e ajrit në metropolet e vendeve të
zhvilluara ndotet nga automjetet, ndërsa, për vendin tonë,
mbetet problem numri i madh i makinave të amortizuara, që shkarkojnë
përqindje të larta bloze dhe karboni në mjedis. Zëdhënësja
e dikasterit të gjelbër, Edlira Myrtaj, thekson se ndër
detajet e ditës pa makina mbetet për t'u përshëndetur
krosi masiv, i cili do të startojë në qendër të
Tiranës ditën e shtunë, duke vazhduar më pas me aktivitete
promovuese nëpër shkolla për dëmin ekologjik që
sjellin automjetet. Ndërkohë që ditën pa makina, një
ditë tradicionale kjo në vendet e zhvilluara, do ta përshëndesin
të gjithë ambsadorët e vendeve të akredituara në
vendin tonë. Ministri Xhuveli ka kontaktuar me të gjithë
ambasadorët dhe personalitet e tjera politike dhe publike të
vendit, të cilët kanë rënë dakord që, për
të përshëndetur këtë ditë, të parakalojnë
në mënyrë të lirshme përgjatë bulevardit
kryesor "Dëshmorët e kombit". Punonjësit e Bashkisë
të Tiranës tregojnë se i janë përgjigjur pozitivisht
ditës pa makina dhe kanë rënë dakord që, këtë
ditë, qendra dhe rrugët kryesore të kryeqyetit të
jetë të lirë nga qarkullimi i makinave, me përjashtim
të unazës së madhe. Në të njëjtën kohë,
Ministria e Rendit dhe Drejtoria e Qarkullimit Rrugor kanë pranuar
të merren me mbarëvajtjen e kësaj dite, duke mos lejuar
asnjë automjet të lëvizë në Tiranë, me përjashtim
të rasteve urgjente, siç janë zjarrfikëset, urgjencat
spitalore dhe makinat e dasmave. Ndërsa, disa qytete, ditës
pa makina i janë përgjigjur me rezervë. Zëdhënësja
e Ministrisë së Mjedisit shpjegon se disa qytete kanë vendosur
që orari të jetë i kufizuar në orë të caktuara
të ditës, në mesditë ose në orët e vona
të mbrëmjes.
(marre nga Gazeta Shekull) |
Faqe në rrjetin tonë: |
Copyright © 2008 ShqiperiaCom. Të gjitha te drejtat e rezervuara. Kompania | Konfidenca | Vende Pune | Reklamo tek ne | Adresa |