|
|
I
bie arë mes për mes
e gjer në brez,
e përmbi brez,
humbas
me gaz
në grurin tim,
të dheut tim,
të babës tim,
të birit tim;
sot e përjetë,
jetë pas jetë!
Dhe
ndie qysh flet,
me zë të qetë,
im atë vetë
nga balta poshtë:
"Ta
mbroni dhenë
ku eshtrat kam,
ku hi e tokë
e pluhur jam.
Ta
mbroni dhenë
që e ushqej
dhe sot si dje,
me kurmin tim.
Ta
mbroni dhenë,
me zjarr ta mbroni,
me gjak ta mbroni!
Të derdhni gjakun
me
grushte plot -
po kurrë lotë,
as sot, as mot!
Se loti është robëri,
gjaku - liri!"
|
Me rastin e 95- vjetorit të lindjes së Mitrush
Kutelit, më 13-15 shtator, do të zhvillohen "Ditët
e vjeshtës poetike" në Pogradec
Kuteli, "Nderi i kombit" në
95- vjetorin e lindjes
Sot ai mbush plot 95 vjet që nga dita e lindjes së tij. Në
përkujtim të kësaj dite, në qytetin e Pogradecit,
për dytën ditë rresht do të mbretërojë poezia.
Buzë liqenit që frymëzoi për aq e aq vite shkrimtarin
Mitrush Kuteli, do të mblidhen shumë emra të letrave. I
titulluar "Ditët e vjeshtës poetike", aktiviteti letrar
do të zhvillohet në qytetin e Pogradecit, në datat 13-15
shtator". Këshut shprehet poeti Zyhdi Morava, i cili është
një nga organizatorët e këtij aktiviteti, që zhvillohet
me rastin e 95- vjetorit të lindjes së Dhimitër Paskos
( Mitrush Kutelit). Aktiviteti organizohet nga Shoqata e Shkrimtarëve
"Mitrush Kuteli", në bashkëpunim me bashkinë
e qytetit të Pogradecit, ndërsa është konceptuar si
një takim mes miqsh, artistësh, studiuesish e kritikësh
që vijnë nga Shqipëria, Kosova, Maqedonia, Greqia, Turqia,
etj. Do të jenë kësisoj rreth 10 shkrimtarë dhe poetë
të cilët do të flasin e debatojnë vetëm për
poezinë, Gjithashtu pjesë e aktivitetit do të jenë
bisedat dhe diskutimet rreth letërsisë, mbi prozën e shkurtër,
poezinë dhe kritikën, ndërsa në odeonin e qytetit
do të jepet një koncert recital, muziko-letrar me aktorë
që do të recitojnë poezi të traditës dhe bashkëkohore,
alternuar me këngëtarë. Gjithashtu ditën e dytë
të këtij aktiviteti do të kujtohet edhe poeti Lasgush Poradeci.
Është menduar që kjo ditë e dytë të nisë
me një vizitë në varrin e Lasgushit, e më vonë
do të pasohet nga kritika letrare e vargjeve për Lasgushin Me
rastin e këtij përvjetori do të organizohet edhe një
konkurs poetik, për të cilin një juri speciale që
do të ngrihet në këto tri ditë të aktivitetit
do të ndajë tre çmime për poezitë më të
mira, përkatësisht çmimin "Mitrush Kuteli",
"Lira e Liqenit" dhe çmimi i "Karrierës".
Shoqata Mitrush Kuteli, ka propozuar me këtë rast që shkrimtarit
t'i jepet titulli "Nderi i Kombit". Sipas poetit Zyhdi Morava,
të enjten e javës së kaluar, Ministria e Kulturës
Rinisë dhe sporteve ka firmosur këtë propozim dhe e ka
dërguar në presidencë. Sipas Moravës, ditën e
lindjes së shkrimtarit do të jepet edhe ky titull nga presidenti
i Shqipërisë Alfred Moisiu.
* * *
Për themeluesin e prozës moderne
Prozatorit, përkthyesit, kritikut dhe ekonomistit të shquar
Mitrush Kuteli, i cili së bashku me Ernest Koliqin themeluan prozën
moderne shqiptare, është cilësuar nga kritika shqiptare
si rrëfimtari i rrëfimeve të njohura në prozë.
Ai i mbaroi studimet ekonomike në Bukuresht (Rumani), u lidh me letrat
shqipe që në vitin 1928 kur filloi të botojë artikuj
kritikë për shkrimtarët shqiptarë dhe tregime në
Shqipërinë e re të Kostancës. Ndërkohë në
galerinë e personazheve të tij dhe në shqipen që e
ruajti me fanatizëm, në fillim përfshiu njerëz dhe
figura që i kishte parë me sytë e tij në shtëpi
si, Dervish Hima, Avdyl Ypi, Mihal Grameno, Telemak Gërmenji, Memdu
Zavalani, Themistokli Gërmenji, ndërmjet të cilëve
ruajti frazeologjinë e gjuhës së gjallë popullore
në çdo vend dhe situatë. I cilësuar njëri ndër
mjeshtrit më të mëdhenj të lakimit të shqipes
së shkruar në prozë". Kur Mitrush Kuteli jetonte jashtë
Shqipërisë, për të ruajtur gjuhën shqipe, lexonte
Kristoforidhin e Spiro Dinen, gjë që e ndihmoi të mbështetej
në gjuhën popullore e të shkruar. Por ajo që bie në
sy më tepër është gjuha e prozës, e cila gërsheton
lirshmërinë e shprehjes artistike, frazeologjinë popullore
dhe depërtimin në thellësi të botës shpirtërore.
Dëshirën e patjetërsueshme për të shkruar, Kuteli
e përmend në Testamentin e tij ku thotë :"Profesionizmi
në letërsi, në vendin tonë, është, hë
për hë, një rrugë vuajtjesh, buka e tij është
e hidhur. E hidhur them për atë që s'di marifete e hipokrizira.
Terreni i letërsisë është një tokë tek gëlojnë
gjarpërinjtë. Të vrasin shokët se u bën hije.
Dhe kur u bën hije do të thotë se nuk je i zoti për
letërsi..."
Biri i një rrobaqepësi shajaku, Pasko lindi në qytetin
e Pogradecit (Kaza e Starovës) në vitin 1907 në familjen
e Paskollarëve ku e pagëzuan me emrin Dhimitër. Mbaroi
shkollën e mesme tregtare në Manastir dhe në vitin 1928
shkoi për studime ekonomike në Bukuresht (Rumani).
Në vitin 1938 boton librin "Netë shqiptare" me rrëfimet
e veta të botuara dhjetë vjet më parë. Pas kthimit
në Shqipëri në vitin 1943 ai boton "Ago Jakupi e të
tjera rrëfime", librin me poema "Sulm e lotë",
tregimet "Kapllan Aga i Shaban Shpatës", "Shënime
letrare" dhe pamfletet satirike-politike "Havadan në havadan".
.Ndërkohë së bashku me Vedat Kokonën, Sterjo Spassen
etj, nis nxjerrjen e "Revistës letrare". Në vitin
1945 merr pjesë në themelimin e Lidhjes së Shkrimtarëve
të Shqipërisë dhe hyn në redaksinë e revistës
"Bota e re". Vepra të tjera të mëvonshme të
tij përmendim, "Pylli i gështenjave", "Xinxifillua",
"Tregime të moçme shqiptare", "Baltë nga
kjo tokë", "Në një cep të Ilirisë së
Poshtme", etj. Gjithashtu lidhur me jetën e tij ai ka lënë
dy tekste autobiografike "Kujtesa" 1965 dhe "Testamenti".
Ai vdiq në Tiranë në vitin 1967
(marre nga Gazeta Shekull)
|
|
|