|
|
E Hënë 2 Shtator 2002
Vazhdon sulmi ndaj ish-komandantit
të UÇK-së dhe liderit të BDI-së në prag
të zgjedhjeve të 15 shtatorit
Shpërthim tjetër në
zyrat e Ali Ahmetit
Arbën Xhaferri: Do të
bojkotojmë zgjedhjet, nëse izolohet Ahmeti
Tensionet brenda
një jave
- E hënë, 26 gusht, vrasja e dy policëve maqedonas
në Gostivar
- E mërkurë, 28 gusht, shpërthim në zyrat
e dy partive shqiptare, Bashkimi Demokratik për Integrim
(BDI) të Ali Ahmetit, dhe Partisë Demokratike Kombëtare
(PDK) të Haxhirexhës.
- 29 gusht, Ministria e Brendshme lëshon urdhër arresti
për Ali AHmetin
- 30 gusht, ekstremistë shqiptarë mbajnë peng
5 civilë maqedonas; trupa të jashtëzakonshme,
autoblinda dislokohen në zonën ku mbahen pengjet,
në rrugën Gostivar-Tetovë; vritet një shqiptar
(Agron Behari) nga paramilitarët e Boshkovskit
- 31 gusht, zgjidhet kriza e pengjeve me ndërmjetësimin
ndërkombëtar
- 2 shtator, shpërthimi i dytë në zyrat e Ali
Ahmetit |
|
SHKUP - Një granatë dore shpërtheu dje në mëngjes
në Shkup, përpara selisë së Partisë Demokratike
për Integrim (BDI). Ky është sulmi i dytë që
drejtohet ndaj selisë kësaj partie të udhëhequr nga
ish -komandanti i Ushtrisë Çlirimtare Kombëtare, Ali
Ahmeti dhe sulmi i tretë brenda një jave ndaj partive shqiptare.
Ky incident u shtohet tensioneve të mëdha që janë
krijuar në Maqedoni në prag të zgjedhjeve të përgjithshme
të 15 shtatorit. Udhëheqësit e BDI-së deklaruan se
sulmuesit kanë për qëllim të futin frikë e panik
në mesin e votuesve shqiptarë. Fatmirësisht nuk ka asnjë
të plagosur, thonë zyrtarët e partisë, pasi në
momentin e shpërthimit, në ndërtesë ka qenë vetëm
roja. Megjithatë ne nuk do të frikësohemi", -ka deklaruar
një zyrtar i kësaj partie, Nazif Bushi. Ndërsa zëdhënësi
i policisë maqedonase, Vojisllav Zafirovski, konfirmoi shpërthimin
e djeshëm duke shtuar se dëmet janë shumë të
vogla. "Ne nuk e dimë se kush janë autorët e këtij
atentati",- tha Zafirofski. Por duke folur për "Associated
Press" ai akuzoi shqiptarët. "Nuk ka ende të dyshuar,
por besojmë se shpërthimi ka lidhje me rivalitetet shqiptare
në prag të zgjedhjeve". Në fillim të këtij
viti ndodhën disa përleshje mes grupimeve shqiptare dhe kjo
mjafton për t'u përdorur si tezë nga pala maqedonase edhe
në këtë rast. Por është fakt se që nga java
e kaluar, situata në Maqedoni është shumë e tensionuar
dhe të sulmuar janë vetëm shqiptarët. Ali Ahmeti është
personi që është vënë në shenjestër
nga pala maqedonase, për t'u nxjerrë jashtë loje para datës
së zgjedhjeve. Ministria e Brendshme e Ljube Boshkovskit ka nxjerrë
urdhër për arrestimin e tij dhe po përdor të gjitha
mjetet që ai të tërhiqet nga fushata elektorale, pasi sipas
tyre, ky ish -luftëtar i UÇK-së nuk duhet të hyjë
në Parlamentin e ardhshëm. Kjo ministri e akuzon Ahmetin për
krime dhe genocid të kryer gjatë kohës së luftës.
Ahmeti ishte drejtuesi politik i Ushtrisë Çlirimtare Kombëtare
që vitin e kaluar ndërmori një kryengritje për të
kërkuar më shumë të drejta për shqiptarët
e Maqedonisë. Më pas UÇK-ja u çarmatos dhe u shpërnda,
pas një marrëveshjeje paqeje të arritur me ndërmjetësimin
perëndimor, që i dha fund konfliktit të vitit të kaluar.
Sipas kësaj marrëveshje, ish-luftëtarët e UÇK-së
fituan amnistinë dhe ata me të drejtë u organizuan në
grupime politike. Ali Ahmeti ka krijuar një parti, e njohur me shkurtime
BDI, e cila është regjistruar sipas të gjitha rregullave
për të marrë pjesë në zgjedhjet e javës
që vjen. Por ndërsa Boshkovski po bën të pamundurën
për ta izoluar atë, qarqet e tjera politike në vend dhe
në përgjithësi ndërkombëtarët, që ndodhen
në rajon, kanë deklaruar prerë se të drejtën
për të akuzuar Ahmetin për krime lufte e ka vetëm
Gjykata e Hagës. Ndërkohë ai është amnistuar
dhe nuk është e drejtë të arrestohet.
Xhaferri paralajmëron bojkot në zgjedhje
PDSH e Xhaferrit, paralajmëron se do të bojkotojë zgjedhjet
e 15 shtatorit në Maqedoni, nëse do të vazhdojë izolimi
i partisë Bashkimi Demokrat për Integrim, dhe izolimi i vetë
liderit të partisë Ali Ahmeti. Deklarata paralajmëruese
është bërë nga numri "dy" i partisë,
Mendu Thaci. Një paralajmërim i tillë bëhet për
herë të parë në vigjilje të zgjedhjeve, në
situatën tepër të tensionuar që mbizotëron në
Maqedoni. Jo vetëm partitë shqiptare e kanë konsideruar
absurde arrestimin e Ahmetit, por edhe opozita maqedonase, LSDM e Branko
Cërvenkovskit, kritikoi ashpër urdhër arrestin ndaj Ahmetit,
duke e quajtur atë një veprim të marrë. Sekretari
i përgjithshëm i LSDM-së, Gjorgji Spasov, ka deklaruar
për "Zërin e Amerikës", se kjo bëhet për
të prishur zgjedhjet e 15 shtatorit. Ndërkombëtarët
po bëjnë të pamundurën për të ruajtur qetësinë
në Maqedoni deri në zgjedhje. Sipas zyrtarëve të NATO-s,
nuk ka asnjë shans të rikthehet konflikti i vitit të kaluar
dhe se zgjedhjet do të zhvillohen normalisht. Gjithashtu të
dërguarit amerikanë e evropianë në rajon u kanë
bërë thirrje shqiptarëve të mos ndërmarrin veprime
të dhunshme, ndërsa qeverisë maqedonase të tregojë
vetëpërmbajtje.
Meta: Maqedonia po zien
"Segmente te caktuara jane te interesuara qe zgjedhjet e pergjithshme
ne Maqedoni te dalin nga rrjedha normale dhe kjo po ndodh aktualisht atje"
Nuk e kane filluar shume te qete diten e pare te punes deputetet shqiptare.
Problemet e dala gjate pushimeve te tyre, lidhur me fqinjet greke e maqedonas,
si dhe me Ambasaden Italiane, kane detyruar Kryetarin e Kuvendit Servet
Pellumbi, sipas kerkeses se Burose Parlamentare te therrase ne seance
per te raportuar Ministrin e Jashtem, Ilir Meta.
Ai e ka cilesuar situaten politike ne Maqedoni te futur ne nje rrjedhe
te tensionuar, ku nuk parashikohet se cfare mund te ndodhe. "Segmente
te caktuara jane te interesuara qe zgjedhjet e pergjithshme ne Maqedoni
te dalin nga rrjedha normale dhe kjo po ndodh aktualisht atje. Per fat
te keq edhe nje pjese e shtetit maqedonas eshte ne kete linje. Kerkesa
e Ministrise se Brendshme maqedonase per te arrestuar ish-liderin e Ushtrise
Clirimtare Kombetare, Ali Ahmeti, eshte e papranueshme pasi shkelet marreveshja
e Ohrit qe e ka amnistuar veprimtarine e tij", tha Meta. Nderkaq,
sipas Metes, ai ka kontaktuar me Sekretarin e Pergjithshem te NATO-s,
Havier Solana, dhe me BE-ne duke kerkuar prej tyre nga pozicioni i Ministrit
te Jashtem, per te nderhyre ne menyre qe situata ne Maqedoni te mos perkeqesohet
me tej.
E Dielë
1 Shtator 2002
Forcat e ushtrisë maqedonase
janë shfaqur edhe në kufirin Shqipëri-Maqedoni në
zonën e Kukësit
Tension në kufirin me Maqedoninë
Urdhri i Ministrisë së
Rendit: Rrini 300 metra larg vijës kufitare me Maqedoninë
KUKËS: Forcat e ushtrisë maqedonase janë shfaqur edhe
në kufirin Shqipëri-Maqedoni në zonën e Kukësit.
Komandanti i postës kufitare të Çajës, Izmir Duraku,
thotë se pas më
shumë se një viti janë vërejtur përforcime të
ushtrisë maqedonase në pjesën e saj, të përforcuar
edhe me mjete të blinduara, që patrullojnë kufirin. Ndërkohë
që efektivi i postës kufitare të Çajës është
vënë në gatishmëri për të parandaluar çdo
të papritur, sidomos në drejtim të incedenteve kufitare,
kalimeve të paligjshme e trafikut të armëve etj.
Megjithë përforcimet e ushtrisë maqedonase, situata në
këtë pjesë të kufirit është e qetë,
shpjegon komandanti i postës kufitare të Çajës.
Ndërkaq, Duraku ka bërë të njohur urdhrin e dalë
nga Drejtoria e Kufirit në Ministrinë e Rendit Publik, i cili
ka të bëjë me shmangien e incidenteve në kufirin shqiptaro-maqedon.
Në bazë të këtij urdhri, të gjithë banorëve
tp zonave kufitare me Maqedoninë u ndalohet lëvizja, kositja
e livadheve, prerja e drurëve apo kullotja e bagëtive deri në
300 metra larg vijës së kufirit në brendësi të
territorit të Shqipërisë.
Ky urdhër, i cili është i përkohshëm në
vartësi të situatës në Maqedoni, vjen pas incidenteve
e provokimeve të ushtrisë maqedonase në kufi, të shoqëruara
me plagosje e vrasje të shtetasve shqiptarë. Më 22 gusht
të këtij viti, forcat maqedonase të kufirit, në afërsi
të fshatit Gjoricë të rrethit të Peshkopisë,
kanë vrarë me armë zjarri 100 metër në thellësi
të territorit të Maqedonisë , 38 -vjeçarin Baftiar
Trasha, baba i tre fëmijëve, banues në fshatin Gjoricë
e Poshtme. Ngjarja ka ndodhur pikërisht në kohën kur ish
-ambasadori i OSBE-së në Shqipëri, Gert Ahrens, dhe homologu
i tij në Shkup, Kreig Xhenis, po realizonin një monitorim të
përbashkët të kufirit Shqipëri-Maqedoni në zonën
e Dibrës. Përforcime të kufirit nga pala maqedone vërehen
edhe në kufijtë e saj me Kosovën. Këtë fakt e
ka bërë të ditur dje gjatë një konference për
shtyp, zëdhënësi i Brigadës Shumëkombëshe
të Jugut në Prizren. Sipas zëdhënësit, trupat
gjermane, turke e austriake kanë shtuar praninë e tyre dhe kontrollet
përgjatë kufirit Kosovë-Maqedoni në zonën e Dragashit.
Përqëndrime të forcave maqedonase janë parë gjatë
këtyre ditëve edhe në pjesën tjetër të vijës
kufitare mes dy vendeve. Raporte të ngjashme për përqëndrime
forcash dhe mjetesh luftarake kanë ardhur edhe nga pika të tjera
kufitare. Këto lëvizje janë bërë pas acarimit
të skajshëm të situatës në Maqedoni, në
prag të zgjedhjeve të 15 shtatorit që pritet të mbahen
aty dhe ku partitë shqiptare janë favoritet kryesore për
shkak të përqindjes së lartë, të padeklaruar
kurrë të popullsisë shqiptare. Edhe nga ushtria shqiptare
ka patur lëvizje në drejtim të kufirit. Megjithëse
këto informacione nuk janë konfirmuar zyrtarisht, banorë
të zonave kufitare dhe familjarë të ushtarëve në
shërbim kanë dëshmuar për masat e dyanshme. Autoritetet
maqedonase e kanë justifikuar përforcimin e regjimit kufitar
me frikën e hyrjes nga Shqipëria të armëve, të
cilat sipas tyre "mund të fuqizojnë organizatat terroriste
që duan të shkatërrojnë procesin zgjedhor të
shtatorit".
Bashkim Shala
Fransoa Stam është kryesuesi i Kryqit të Kuq Ndërkombëtar
në Maqedoni, dhe një nga personat e përfshirë në
bisedime me rrëmbyesit, thotë se nuk mund të tregonte identitetin
e tyre: "Ishte e qartë se ata ishin shqipfolës. Por ne
nuk mundoheshim që të hetojmë ose të marrim informacione
sekrete ushtarake. Ne ishim të shqetësuar vetëm për
situatën humanitare", -thotë Stam. Ai shton se nuk mund
të thotë nëse personat ishin anëtar të UÇK-së
ose AKSH-së, siç ishte njoftuar në disa media. Në
një bisedë të bërë dje, një nga rrëmbyesit
i tha BBC-së se grupi ishte pjesëtar i ish -UÇK-së.
Përfaqësues të BDI-së, parti e cila doli nga strukturat
e UÇK-së, dje thanë se nuk i njihnin personat.
Ministra e Punëve të Brendshme dhe autoritetet lokale, thotë
se situata në zonën e Zherovjanit, ku ndodhi kriza e pengjeve
tani është e qetë. Kriza me të rrëmbyerit filloi
të premten, kur grupi i armatosur shqiptar, siç u përshkrua
nga autoritetet maqedonase, rrëmbeu pengjet maqedonas, dhe për
lirimin e tyre kërkoi nxjerrjen nga burgu e disa të burgosurve
shqiptarë. Të gjithë subjektet e dënuan këtë
akt, duke pranuar se ka ndikuar negativisht në situatën e parazgjedhjeve
parlamentare në Maqedoni, të cilat janë të parat pas
konfliktit të vitit që shkoi.
Përfaqësuesit ndërkombëtarë në Maqedoni
dhanë sot një deklaratë të përbashkët, ku
përshëndesin lirimin e pesë maqedonasve të rrëmbyer.
I dërguari i posaçëm i BE-së në Shkup, Alen
Lërua, (Alain Leroy), ambasadori grek Joanis Ekonomu në emër
të kryesisë së BE-së, ambasadori i SHBA-së Lorens
Batler (Lawrence Butler), ambasadori i NATO-s, Nicolas Bigman dhe shefi
i Misionit të OSBE-së Kreg Xhenes (Craig Jeness), shprehën
kënaqësi për epilogun e krizës me të rrëmbyerit,
pa pasoja për ta dhe as për banorët lokalë e për
pjesëtarët e forca "Qeveria dhe gjithë faktorët
që ishin të përfshirë në zgjidhjen e problemit,
vepruan në mënyrë të përmbajtur. I çmojmë
lart përpjekjet e tyre si dhe përpjekjet e popullatës lokale
shqiptare dhe të liderëve të tyre për zgjidhjen e
qetë të problemit", thuhet në deklaratë. Përfaqësuesit
ndërkombëtarë thanë se situata në rajonin e Tetovës
dhe Gostivarit është kthyer në gjendje normale dhe bënë
thirrje për përmbajtje ndaj provokimeve që mund të
sjellin tensionime dhe dhunë të re. Ata shfaqën shpresën
se fushata për zgjedhjet parlamentare të 15 shtatorit do të
vazhdojë në një atmosferë të qetë dhe demokratike.
E Shtunë 31 Gusht 2002
Maqedonia, grahmat e fundit te
nacionalizmit primitiv
Nga Sotiraq Hroni
SHKUP - Një kryq gjigant, 76 metra i lartë, është
inauguruar në malin Vodno, që rrethon Shkupin. I ndriçuar
nga 550 reflektorë, kryqi që është më i madhi
në Ballkan. Ai duket edhe nga 80 km larg. Për të ndërtuar
kryqin, janë përdorur 400 tonë metal dhe 60 mijë
bulona. "Ky kryq,- tha Gjeorgjevski gjatë përurimit,-
është lutja jonë për fitore dhe shpëtim të
Maqedonisë dhe për mbrojtjen e qytetarëve maqedonas,
që po jetojne ditë të vështira". |
Javet e fundit, jo vetem vendi fqinj por i gjithe rajoni dhe diplomacia
nderkombetare po ndjek me shqetesim kunderveniet ekstremiste dhe te deshperuara
te individeve qe pavaresisht nga kombesia perpiqen te mbajne gjalle nje
tension shperthyes ne Republiken fqinje. Kriza e vjetshme ne Maqedoni
dhe mos- konsolidimi i arritjeve demokratike qe buronin nga Marreveshja
e Ohrit perbenin nje terren pothuajse te gatshem per levizjet ekstremiste
nga palet e interesuara. Vonesa ne zbatimin e Marreveshjes se Ohrit ka
pasur si shkak, ne mos si justifikim, situaten parazgjedhore ne te cilen
eshte ndodhur vendi, dhe moshumbjen e popullaritetit ne votuesit e tyre.
Pikerisht, nje Minister i qeverise maqedone eshte bere muajt e fundit
flamurtari per gjallerimin dhe kompaktesimin e sentimenteve anti- shqiptare
ne radhet e votuesve sllavo-maqedon dhe zedhenes llogarive te vogla qe
ne fund te fundit nuk I interesojne, ne nje plan afatgjate, vete Maqedonise
si shtet integruar. Po aq te erreta, duken edhe informacionet nga zonat
e banuara kryesisht nga shqiptaret. Nuk eshte veshtire qe ne situaten
sociale dhe politike ne Maqedoni te gjenden individe te deshperuar dhe
te manipuluar qe mund te ndermarrin cfaredolloj akti ne sherbim te interesave
te qarqeve te erreta brenda Maqedonise apo qofte edhe jashte saj.
Zgjidhja e vetme per mos-acarimin e metejshem te situates mbetet denimi
dhe distancimi i te gjithe kraheve te politikes aty, nga cdo akt dhune
apo veprim anti- demokratik. Ne kete kuader, partite politike kryesore
maqedone duhet t'i bashkohen deklarates se djeshme te kater partive kryesore
shqiptare per te denuar dhunen dhe aktet kriminale ngado qe te vijne ato.
Ne fund te fundit, ngjarjet qe shoqerojne situaten parazgjedhore ne Maqedoni
jane nje shembelltyre tipike e nje Ballkani te vjeter, ku mund te rrezikohet
gjithcka per interesa te pushtetit. Ato jane grahmat e fundit te nje nacionalizmi
primitiv qe ndoshta Maqedonia do ta kaloje me sa me pak dhimbje, duke
shmamgur riciklimin e krizes te nje viti me pare. Situata ne Maqedoni
duhet pare realisht edhe ne aspektin e gjere social. Marreveshja e Ohrit
nuk eshte thjesht nje akt juridik dhe nuk mund te hyje ne force menjehere,
me hedhjen e nje firme. Ajo ka te beje edhe me nje proces edukativ civil
per te pertypur dhe njohur realitetin e ri nga te gjithe qytetaret e atij
vendi.
Por, pare ne nje kendveshtrim vetem shqiptar, dhuna apo informacionet
e pakonfirmuara per sktruktura te reja ushtarake me cfaredolloj emri,
perbejne nje proces kunderproduktiv dhe teper te dyshimte qe vetem shqiptareve
nuk i interesojne, qofte ne Maqedoni qofte ne Kosove.
(kohajone)
Lirohen pesë pengjet
maqedonas, që u kapën një ditë më parë nga
"ekstremistë shqiptarë'.
Ndërkombëtarët shmangën
një konflikt të ri
Ylber LILI
Maqedonia i shpëtoi pragut të luftës. Kriza e pengjeve
u zgjidh pa asnjë krismë dhe gjithë trupat speciale policore
të Ljube Boshkovskit janë tërhequr nga qytetet shqiptare.
Një ditë më parë, opinioni ndërkombëtar
u alarmua, kur Ministria e Brendshme maqedonase dislokoi një numër
të jashtëzakonshëm forcash për të zgjidhur një
krizë pengjesh, kur dihet që në raste të tillë
më tepër vlen dialogu. Kështu, gjithë zyrtarët
e lartë ndërkombëtarë që ndodheshin në Maqedoni
u angazhuan dhe arritën ta zgjidhnin me sukses një nga situatat
më dramatike në këtë vend, që nga lufta e vitit
të kaluar. Drejtuesit e OSBE-së, NATO-s të Kryqit të
Kuq Ndërkombëtar, të BE-së ishin gjatë gjithë
natës në terren për të gjetur mënyrat për
lirimin e pengjeve. U arrit që të pesë maqedonasit, të
cilët pardje në mbrëmje ishin rrëmbyer nga një
grup i "armatosur shqiptar" në autostradën Tetovë-
Gostivar, të liroheshin në orët e hershme të mëngjesit.
Sipas Kryqit të Kuq Ndërkombëtar të liruarit nuk janë
keqtrajtuar. Por zëdhënësi i MPB-së, Vojisllav Zafirofski,
thotë se gjendja shëndetësore e të rrëmbyerve
është e mirë, përveç njërit, i cili është
dëmtuar dhe ndodhet në spital në gjendje të rëndë.
"Me këtë, kriza e pengjeve ka përfunduar pa pasoja
për jetën e të rrëmbyerve dhe pa ndërhyrjen e
policisë, gjë që sigurisht do të kontribuojë
në pakësimin e tensioneve në opinion", -ka theksuar
Zafirovski.
Situata
Tetova në pasditen e së premtes mori pamjet trishtuese dhe rrëqethëse
që të kujtonte ditët e tmerrshme të luftës së
vitit të kaluar. Thuajse i gjithë qyteti ishte lënë
në harresë, njerëzit dhe dyqanet u mbyllën me herët
se ditët e tjera. Askush nuk ishte në gjendje të parashikonte
situatën dhe rrjedhat e mëtejme. Gjendja si në qytet, po
ashtu dhe në fshatrat përreth saj ishte tejet e tensionuar.
Akthi i banorëve dhe qytetarëve u shtua kur disa media maqedonase
në mënyrë cinike publikuan lajmin se njerëzit nuk
duhet të lëvizin nga shtëpitë e tyre, duke nënkuptuar
se forcat speciale mund të ndërmarrin ndonjë reprezalje,
në hakmarrje për të rrëmbyerit. Por pas një nate
të frikshme, dje banorët e qytetit të Tetovës u zgjuan
me lajmin e mirë për lirimin e pengjeve. Forcat speciale maqedonase
me një numër tepër të madh dhe të përforcuar
më mjete të rënda, u larguan dhe morën drejtimin e
Shkupit. "Menjëherë pas lirimit të të rrëmbyerve,
forcat speciale maqedone janë tërhequr thotë për "Shekullin"
drejtori i policisë së Tetovës Zemri Qamili duke shtuar
se tani është policia multietnike që kontrollon terrenin.
Sipas tij, tani autostrada Tetovë-Gostivar është hapur
që në orët e para të mëngjesit, dhe nuk paraqitet
ndonjë shqetësim.
Situata e fundit ka ndikuar edhe te partitë politike, të cilat
i kanë anuluar tubimet e tyre nëpër ato zona elektorale,
ku kanë dashur të promovojnë kandidatët e tyre për
deputetë në Parlamentin e Maqedonisë. Katër partitë
shqiptare i kanë shmangur këto tubime, për shkak të
kësaj situate.
Deklarata
Rrëmbyesi: Nuk i përkasim ndonjë organizate
Një nga rrëmbyesit e pesë civilëve maqedonas të
marrë peng natën e kaluar në jug të Maqedonisë,
i cili u prezantua me emrin "Halili", është kontaktuar
me telefon nga një gazetar i agjencisë italiane të lajmeve
ANSA, dhe ndër të tjerash ka thënë: "Jemi vetëm
një grup miqsh, ish-luftëtarë të UÇK-së,
që kërkojmë lirimin e tre shokëve tanë të
arrestuar padrejtësisht nga policia maqedonase... Pengjet janë
në gjendje të mirë shëndetësore". "Halili"
pohoi se nuk i përket ndonjë organizate paraushtarake dhe se
nuk vepron për llogari të "ndonjë formacioni politik".
"Ne jemi - tha ai ekzaktësisht- vetëm një grup miqsh
dhe që prej mëngjesit të sotëm jemi në kontakt
me Ministrinë e Brendshme dhe me përfaqësuesit ndërkombëtarë.
Tani presim një zgjidhje nga mbledhja e qeverisë",- ka
përfunduar rrëmbyesi pak para se të përfundonte kriza
e pengjeve.
Rrëmbyesit çanë rrethimin?!
Zëdhënësi i Ministrisë së Brendshme maqedonase,
pasi dha lajmin e mirë se pengjet u liruan, deklaroi se rrëmbyesit
arritën të largoheshin. "Rrëmbyesit arritën të
iknin, megjithëse forcat maqedonase të sigurimit e kishin rrethuar
fshatin në luginën e Tetovës, ku mbaheshin pengjet"-
ka thënë për "Associated Press" zëdhënësi
Vojisllav Zafirovski. Kjo mund të konsiderohet si sfidë për
policinë maqedonase. Vendi ku "grupi shqiptar" mbante pengjet
u rrethua në një vijë 25 kilometra nga të gjitha anët.
Po kështu një përqëndrim i jashtëzakonshëm
forcash u diskoluan në qytetet shqiptare Tetovë e Gostivar,
vendet e mundshme nga do të drejtoheshin rrëmbyesit. Lejimi
i tyre i lirë mund të jetë rënë dakord nga ndërmjetësimi
i ndërkombëtarëve, por nëse do të ishte kështu,
zëdhënësi Zafirovski nuk duhej të thoshte që
"rrëmbyesit arritën të largoheshin", por "u
lanë të lirë". Fakti që ata nuk janë kapur
është pak i çuditshëm dhe të gjitha dyshimet
të çojnë tek fshehja e identitetit të pengmarrësve
ose ndonjë skenar tjetër alla-Boshkovski.
Xhaferri paralajmëron: Në rrezik, ekzistenca e Maqedonisë
Kryetari i Partisë Demokratike Shqiptare të Maqedonisë,
paralajmëron se incidentet e dhunshme të ditëve të
fundit në Maqedoni, mund të sjellin edhe zhvillime më të
rrezikshme që mund të vinin në rrezik ekzistencën
e këtij shteti të brishtë. Në një intervistë
për "Zërin e Amerikës", Xhaferri tha se këto
dukuri e dëmtojnë tej mase paqen në Maqedoni dhe stabilitetin
në këtë vend. Kreu i Partisë Demokratike Shqiptare
tha se nuk mund të pretendohet se në Maqedoni ka një qeverisje
normale dhe koalicioni qeveritar ku bën pjesë edhe partia e
tij nuk funksionon normalisht dhe për pasojë partia e tij nuk
ka asnjë ndikim. Ai shtoi se segmente të ndryshme të qeverisë,
synojnë të krijojnë situatë konfuze, duke përmendur
kërcënimet ndaj Partisë Bashkimi Demokratik për Integrim
dhe kreut të saj, ish-drejtorit politik të UÇK-së,
Ali Ahmeti, për të cilat ai tha se e tensionojnë tej mase
situatën parazgjedhore. Xhaferri paralajmëroi se zhvillimet
e dhunshme do t'ja merrnin legjitimitetin demokratik zgjedhjeve të
15 shtatorit. Ai kritikoi vrasjen e dy policëve maqedonas para disa
ditësh dhe për rrëmbimin e djeshëm të disa personave,
dhe tha se akte të tilla e dëmtojnë imazhin e shqiptarëve.
Megjithatë, ai shtoi se elementë të tillë ka në
çdo shoqëri dhe se ata nuk përfaqësojnë shumicën
e shqiptarëve. Sipas Xhaferrit, demokracia e vërtetë vendoset
përmes garës së ndershme. Ai i bëri thirrje komunitetit
ndërkombëtar që të ketë besim tek faktori shqiptar
dhe tha se në çështje kyçe nuk ka munguar kurrë
bashkëpunimi mes partive kryesore shqiptare në Maqedoni.
Intervistë/ Flet për
"Shekullin" zv/ministri i Punëve të Brendshme të
Maqedonisë, Refet Elmazi
Arrestimi i Ahmetit- marketing
politik
Ndërkombëtarët
s'do të lejojnë trazira deri më 15 shtator
Ylber LILI
Situata në rajonin e Tetovës po shkon drejt normalitetit, pas
lirimit të të rrëmbyerve, trupat speciale të policisë
maqedonase janë larguar në drejtim të Shkupit. Kështu
tha dje për "Shekullin" numri dy i Ministrisë së
Punëve të Brendshme, Refet Elmazi. Ai mes të tjerash, thotë
se nuk mund të këtë arrestim për ish-liderin e UÇK-së,
Ali Ahmetin, pasi ai është i amnistuar dhe përfaqëson
një parti politike legjitime. Gjithashtu, kreu i lartë i Ministrisë
së Brendshme mendon se, deri më 15 shtator, gjithçka
do të vijojë mirë.
Z. Elmazi, mësohet se 5 maqedonasit e rrëmbyer janë
liruar. A mund të na konfirmoni që forcat speciale të policisë
maqedonase janë larguar nga Tetova?
Po është e vërtetë që personat e rrëmbyer
janë liruar në orët e para të mëngjesit. Ndërkohë
mund t'ju them se edhe forcat speciale të policisë janë
tërhequr nga aksi rrugor Tetovë -Gostivar, dhe tani rruga është
e hapur. Ne jemi të përgjegjshëm që ardhja e forcave
speciale në zonat e populluara me shqiptarë pengon qarkullimin
e lirë të njerëzve, gjithashtu ata ngjallin panik dhe frikë,
ku mundësia e incidenteve bëhet evidente. Tani forcat speciale
dhe mjetet e blinduara janë larguar nga Tetova.
Po si e vlerësoni situatën e sigurisë në përgjithësi
dhe në veçanti në rajonin e Tetovës, pas një
tensionimi të dukshëm?
Mendoj se situata këtej e tutje do të jetë e qetë,
kam parasysh këtu angazhimin permanent të faktorit ndërkombëtar,
të cilët këmbëngulin që në këtë
vend të mbizotërojë fryma e paqes. Po ashtu edhe subjekti
politik shqiptar po punon gjithnjë në drejtim të zbutjes
së situatës, me qëllim që zgjedhjet të vijojnë
të qeta. Nga ana tjetër, ne si organ policor, duhet të
jemi në fuksion të zbatimit të detyrës kushtetuese,
që t'u sigurojmë qetësi dhe siguri qytetarëve.
Ministri i dikasterit tuaj, Boshkovski, si dhe zyrtarë të
tjerë të lartë maqedonas, kanë thënë se
do të arrestojnë kryetarin e BDI-së Ali Ahmetin, komenti
juaj?
Këto deklarime janë të tipit "spektakolar", që
do të thotë se ka të bëjë me marketing politik
të një individi apo të një partie politike. Unë
si zv/ministër e kam thënë fjalën time, jam kundër
ngritjes së pluhurit pikërisht në prag të zgjedhjeve.
Unë mendoj se Ahmeti - që është lider i një partie
politike të regjistruar - por dhe të tjerëve t'u mundësohet
veprimtaria e tyre në aktivitetet politike gjatë fushatës
parazgjedhore.
Pra ju thoni se nuk do të ndodhë që ndaj Ahmetit të
ndërmerret ndonjë veprim paprecedent nga ana e policisë?
Jo nuk besoj për shkak se ai është person i amnistuar dhe
së dyti, e thashë më lart që është lider
i një partie politike, e cila është konform ligjeve, pra
e regjistruar. Unë nuk besoj se do të ndodhë diçka
e tillë, gjithë kjo zhurmë ka një emër që
quhet marketing politik.
Dhe së fundi, kur kanë mbetur dhe pak kohë deri te dita
e 15 shtatorit, mendoni se policia maqedonase do t'u përmbahet rregullave
ligjore apo?
Ajo që unë kam kërkuar dhe kërkoj është
që Ministria e Punëve të Brendshme të mos ndërmarrë
asnjë hap, i cili konsiderohet i nxituar apo nxitës i ndonjë
provokimi. Ne duhet të jemi realistë se njerëzit tani kanë
nevojë për qetësi dhe siguri, dhe jo për shantazhe
dhe provokime. Me rëndësi është që gjithkush
të mbajë pozicionin që i takon konform ligjeve. Nga ana
tjetër, ne po bëjmë përpjekje maksimale edhe në
kuadër të subjektit që unë përfaqësoj pra
PDSH-së, që fushata parazgjedhore, të jetë e qetë,
pa provokime ndërshqiptare, pra më rëndësi është
që ne si popull të tregojmë maturi dhe pjekuri maksimale
gjatë këtyre ditëve. Besoj se ne do të dimë që
të shkojmë më 15 shtator me një kulturë të
lartë demokratike.
(shekulli)
E Premte 30 Gusht 2002
Dislokim i jashtëzakonshëm trupash rreth vendit ku ndodhen
pengjet.
Kriza e pengjeve mund të risjellë
luftën
Pengmarrësit mund të mos
jenë shqiptarë. Diplomatët dyshojnë në një
inskenim të ri të Boshkovskit
SHKUP - Maqedonia ndodhet në prag të një konflikti të
ri. Dje qindra policë të armatosur janë diskoluar në
një luginë ku mbahen pesë maqedonas të rrëmbyer
nga "shqiptarë të armatosur". Ministria e Brendshme
ka kërkuar lirimin e menjëhershëm të tyre, ndryshe
ka kërcënuar se do të veprojë. Pa ardhur nata, policia
u bëri thirrje gjithë banorëve të zonës përreth,
të qëndrojnë sa më larg shtëpive të tyre,
deri në agimin e ditës tjetër për arsye sigurie. Një
dëshimtare, sipas "Rojterit" kishte parë një
numër të madh policësh me autoblinda, të cilët
kanë rrethuar fshatin Zerovjane, që ndodhet në rrugën
mes qyteteve Tetovë e Gostivar. Bllokimi i rrugëve me autoblinda
është vendosur rreth Tetovës dhe në të gjitha
anët në gjatësinë 25 km në rrugën që
të çon në Gostivar. Gjithashtu është bllokuar
dhe rruga nacionale për në Shkup. "Këto masa janë
totalisht të papërshtatshme
Ju duhet të qetësoni
rrëmbyesit dhe të bisedoni me ta", - ka thënë
një diplomat perëndimor për "Rojterin". Ai shtoi
se këto ngjarje të fundit "përputhen me përshtypjen
e krijuar deri tani se po bëjnë përpjekje të organizuara
për të destabilizuar Maqedoninë në prag të zgjedhjeve
Rezultati i krizës së sotme mund të jetë dramatik",
-ka thënë ky diplomat për "Rojterin".
Rrëmbyesit i kanë marrë viktimat nga autobusi dhe dy makina
private rrugës Tetovë-Gostivar natën e së enjtes dhe
kanë kërcënuar se do të vrasin pengjet e tyre. Një
person që deklaron se është një prej rrëmbyesve,
tha për një stacion radioje lokale se të pesë pengjet
janë në gjendje të mirë shëndetësore. Ai
shtoi se ata do të lirohen, nëse autoritetet lirojnë pesë
shqiptarë që mbahen të arrestuar për vrasjen e dy
policëve maqedonas në Gostivar ditën e hënë.
Ky person gjithashtu deklaroi se rrëmbyesit janë ish-guerilë
nga Ushtria Çlirimtare Kombëtare që nisi dhe rebelimin
e vitit të kaluar, por tani "janë të zemëruar"
që po veprojnë sipas mendjes së tyre. Zëdhënësi
i policisë, Vojislav Zafirovskli, tha se rrëmbyesit ishin shumë
të afërt me Ali Ahmetin, ish -lider i UÇK-së.
Nacionalistët në qeverinë maqedone kërcënuan
këtë javë se do të arrestonin Ahmetin, një hap
që padiskutim do të provokonte trazira. Ahmeti është
i amnistuar në bazë të marrëveshjes së paqes
të ndërmjetësuar nga Perëndimi dhe është
kandidat i regjistruar ligjërisht që drejton një parti
politike gjithashtu të njohur në zgjedhjet e reja.
Burime nga NATO dhe BE thonë se arrestimi i Ahmetit është
një fushatë bllof, ndërsa një burim qeveritar përgënjeshtroi
faktin se indentiteti i pengmarrësve është i njohur. Një
zëdhënës i Ahmetit ka mohuar se pengmarrësit kanë
lidhje me Ahmetin, duke i quajtur ato "banda oportuniste". Gjithë
partitë shqiptare janë distancuar gjithashtu nga ky akt dhe
e kanë dënuar ashpër rrëmbimin e qytetarëve të
pafajshëm. (Rojter)
Nga ana tjetër e kufirit,
prezenca policore dhe ushtarake maqedone është si asnjëherë
në 12 vitet e fundit
Trupat e Mjekësit nisen për
në kufi
Maqedonasit nisin të kthejnë
masivisht emigrantët sezonalë nga Shqipëria
Soni Kurani
Kujtim Borici
ELBASAN - Trupa ushtarake të rrethit të Elbasanit u nisën
dje në drejtim të kufirit shqiptar me ish-Republikën Jugosllave
të Maqedonisë (FYROM). Burime të sigurta bënë
të ditur se nga reparti ushtarak i Mjekësit, një numër
ushtarësh të trupave artiliere u nisën dje në orët
e paradites në drejtim të hapësirës kufitare me FYROM-in.
Burimet nga ky repart konfirmuan lëvizjen e trupave, por u treguan
të rezervuara në dhënien e numrit dhe hollësive të
tjera.
Zyrtarë të Batalionit të Elbasanit nuk pranuan të
konfirmojnë lajmin, duke thënë se nuk ishin të autorizuar
nga qendra për një gjë të tillë. Ndërkohë,
një pjesë e ushtarëve të Mjekësit kanë lajmëruar
të afërm dhe familjarë për një largim të
përkohshëm nga reparti ushtarak i Mjekësit, ku ndodhen
për të kryer shërbimin ushtarak, në drejtim të
kufirit shqiptaro-maqedon, mëngjesin e djeshëm.
Lëvizja e trupave shqiptare drejt kufirit, vjen pas acarimit të
skajshëm të situatës në republikën e vogël
fqinje. Pak ditë më parë, në vijën kufitare që
ndan dy vendet tona janë parë përqëndrime të
mëdha të forcave maqedone. Banorë të Tushemishtit
në Pogradec, fshat turistik kufitar me Maqedoninë, thanë
se përqëndrime në ato përmasa të trupave dhe
mjeteve maqedonase janë parë vetëm gjatë trazirave
të vitit 1997.
Në zona të tjera, prezenca policore dhe ushtarake maqedone pranë
kufirit është si asnjëherë në 12 vjetët
e fundit. Në pikën kufitare maqedonase në Qafë-Thanë
janë instaluar autoblinda dhe tanke luftarakë në regjimin
e gatishmërisë numër një.
Janë vënë re gjithashtu ndërrime e shtim i forcave
aktive në repartin e shërbimit të kufirit në këtë
pikë. Ndërkohë, edhe emigrantët tanët me punë
sezonale në vendin fqinj, me afrimin e datës së zgjedhjeve
në Maqedoni (15 shtator), nga dita në ditë po kthehen nga
policia maqedonase e po dorëzohen në pikat e kalimit kufitar
të Qafë-Thanës, Tushemishtit dhe Bllatës në Dibër,
- "Ne ishim 4 vetë që punonim në rrethinat e Strugës
, jemi me dokumenta të rregullta por papritur erdhën në
banesën ku flinim dhe na përcollën pa asnjë shpjegim
në kufi, - pohon 48 -vjeçari S.Salliu nga zona e Përrenjasit,
një ndër të kthyerit e ditës së djeshme. Emigrantët
tanë që kthehen nga policia, siç pohojnë vetë
të kthyerit, vlerësohen si të tepërt e problematikë
nga policia dhe strukturat e larta shtetërore maqedonase, në
prag të zgjedhjeve dhe zbohen nga frontet e punës për në
vendlindjet e tyre në Shqipëri. Gjithashtu, të kthyerit
e fundit pohojnë për gazetën tonë se jo vetëm
në pikat legale të kalimit kufitar, por dhe në thellësi,
në akset e rrugës drejt Strugës, Ohrit, vecanërisht
në trevat ku shumica e popullsisë është shqiptare,
vërehet ditët e fundit një prezencë e shumtë
e kontrolleve nga patrullat policore të lëvizshme e stacionare,
të dubluara nga forca të ushtrisë së bashku me armatim
e teknikë luftarake
"Ne nga ana jonë vazhdojmë kryerjen e shërbimit me
forca dhe mjete konform shkallës së gatishmërisë luftarake
të vendosur nga eprorët dhe deri tani nuk ka patur asnjë
poblem apo incident kufitar, - pohon për gazetën "Shekulli"
Luan Pashollari, komandant i pikës së kalimit kufitar.
E njëjta situatë, sipas burimeve pranë strukturave të
rendit, është dhe në pikën e kalimit kufitar të
Tushemishtit (Pogradec) dhe atë të Bllatës në Maqellarë
të Peshkopisë.
DEKLARATA
Xhaferri, Ahmeti, Halili dhe Haxhirexha,
me një deklaratë të përbashkët
Liderët e katër partive më të mëdha politike
shqiptare në Maqedoni, të brengosur me zhvillimet e fundit në
vend, vendosën të dalin me këtë deklaratë të
përbashkët :
- Dënojmë ashpër rrëmbimet e qytetarëve të
pafajshëm dhe kërkojmë lirimin sa më të shpejtë
të tyre;
- Dënojmë ashpër vrasjet dhe keqtrajtimin e qytetarëve
që bëhen me motive dhe prapavija të errëta;
- Dënojmë ashpër mosrespektimin e ligjit për amnisti
dhe burgosjet e ish-ushtarëve të UÇK-së;
- Kërkojmë që të ndërpriten menjëherë
lëvizjet dhe pozicionimet e forcave policore- ushtarake nëpër
vendbanime dhe rrugë që bëhen kryesisht në Maqedoninë
Perëndimore;
- Thërrasim popullatën shqiptare të tregojë gjakftohtësi
dhe përmbajtje dhe të bashkëpunojë ngushtë me
subjektet politike dhe komunitetin ndërkombëtar;
- Ftojmë komunitetin ndërkombëtar që të ushtrojë
autoritetin e vet mbi të gjitha palët, me qëllim të
tejkalimit të situatës së tensionuar, që rrezikon
të kalojë në një konflikt me pasoja për paqen
në vend dhe rajon;
- Obligohemi që të krijojmë kushte dhe rrethana të
volitshme për rrjedhën normale të fushatës parazgjedhore.
PPD
Abdurrahman Haliti
PDK
Kastriot
Haxhirexha
PDSH
Arbën Xhaferri
BDI
Ali Ahmeti
Gjendje e tensionuar në Tetovë:
Forcat speciale maqedone bllokojnë magjistralen Tetovë -Gostivar
Vritet nga "Luanët" Agron
Dehari, plagoset një tjetër, pasojnë arrestimet
Nga Ylber Lili
Paqja e brishtë në Tetovë është rrokullisur mbrëmjen
e së enjtes. Persona ende të panjohur pasi janë instaluar
në aksin rrugor Tetovë-Gostivar në afërsi të
fshatit Zherovjan, kanë rrëmbyer tetë persona të cilët
udhëtonin me autobus për në Gostivar, konfirmuan dje për
"Shekullin " burime policore dhe të monitoruesve ndërkombëtarë.
Sipas këtyre burimeve, nga 8 personat e rrëmbyer, 7 prej tyre
janë të nacionalitetit maqedonas, ndërsa tjetri shqiptar.
Duhet theksuar se dy prej maqedonasve dhe shqiptari i rrëmbyer janë
lëshuar, ndërsa të tjerët janë mbajtur peng.
Deri tani organet policore kanë bërë të ditur vetëm
indentitetin e dy pengjeve, Boban Jankovski dhe Sergej Filipovski, që
të dy nga Gostivari. Rrëmbimi i këtyre presonave ka ndodhur
në momentin kur autobusi është ndalur për shkak të
bllokadës në rrugë, të cilën e vendosën
banorët lokalë të Zherovjanit, duke kërkuar lirim
të personave të cilët janë arrestuar për shkak
të vrasjes së dy policëve në Gostivar.
"Sipas asaj që kanë treguar kalimtarët e rastit nëpër
këtë autostrade, rruga është bllokuar nga një
grup i panjohur, të cilët e kanë mbajtur rrugën të
bllokuar prej orës 18:30 deri diku pas orës 21:00 kur edhe thuhet
se janë larguar. Ne nuk jemi në dijeni të tërë
asaj që ka ndodhur, por nga kontaktet që kemi patur me ndërkombëtarët,
ata thonë se grupi në fjalë ka ndaluar dy qytetarë
nga Ohri dhe një nga Gostivari të tre të nacionalitetit
maqedonas, ndërsa nuk ka të dhëna për persona të
tjerë",-tha kreu i komunës së Bogovinës Azbi
Idrizi.
Megjithatë, sipas asaj që tregojnë banorët e fshatrave,
përreth vendit të bllokadës janë stacionuar forca
të mëdha policore, të cilët mbajnë nën kontroll
të rreptë autostradën dhe nuk lejohet lëvizja e lirë
e qytetarëve. Gjithashtu, gjatë natës dhe në orët
e mëngjesit të djeshëm nga Shkupi për në Tetovë
janë parë të vijnë kolona të shumta të motorizuara
me tanke, autoblinda dhe kamionë të njësiteve speciale
"Tigra" dhe "Luanë" të cilët janë
shpërndarë përgjatë autostradës. Gjatë qëndrimit
tonë në rajonin e Bogovinës mësuam se nga ana e policisë
janë ndaluar edhe disa qytetarë shqiptarë, ndërsa
deri më tani dihet saktësisht se policia ka ndaluar dy qytetarë
të Reçicës dhe një nga fshati Bogovinë.
Sipas drejtorit të spitalit të Tetovës, Rahim Thaçi,
dje në orën 4 të mëngjesit në spitalin e Tetovës
është sjellur trupi i pajetë i një banori të
Reçicës së madhe me emrin Agron Dehari 27 vjeç
nga ana e policisë maqedonase. Hazbi Idrizi, kryetar i komunës
së Bogovinës, apelon te qytetarët për ruajtjen e gjakëftohtësisë
dhe ruajtjen nga provokimet e mundshme të policisë, ndërsa
sugjeron që qytetarët të mos lëvizin në drejtim
të autostradës Tetovë -Gostivar. Ndërkaq, policia
rajonale e Gostivarit dje ka bërë të ditur se persona të
paidentifikuar dhe të armatosur dje pas dite nga një veturë
në lëvizje kanë hapur zjar në drejtim të postbllokut
policor, që gjendet në mes të fshatrave Negotinë e
Pollogut dhe Zherovjan. Sipas burimeve policore, policët i janë
kundërpërgjigjur këtij sulmi, është vrarë
një preson, i dyti është lënduar, ndërsa i treti
prej personave që kanë qenë në veturën e tipit
"Golf 3" është arrestuar nga ana e policisë.
Megjithatë, policia nuk bën të ditur ende identitetin e
personave që gjoja kanë sulmuar postbllokun policor në
mes të fshatit Negotinë e Pollogut dhe Zherovjan.Nga ana tjetër,
autoritetet e komunës së Bogovinës nuk na konfirmuan këtë
lajm për shkak se siç u shprehën ato "nuk jemi të
njoftuar me asnjë veprim të policisë maqedonase".
Ndërkohë, burime të MPB-së kanë thënë
se organizatorët e bllokadës në aksin rrugor Tetovë-Gostivar,
kërkojnë nga policia maqedonase që t'i lirojë të
arrestuarit e parmbrëmshëm, Ibrahim Musliu, "Rroki"
nga Zherovjani dhe Daim Mustafin nga fshati Radiovcë.
Kush është viktima e policisë maqedone?
Viktima e "Luanëve" ishte baba i dy fëmijëve
dhe djali i vetëm i familjes Dehari nga Reçica e Madhe. Quhet
Agron Dehari, punëtor në një pompe benzine në periferi
të qytetit të Tetovës. Ai është vrarë në
mënyrë makabre, ku në trupin e tij janë shkrehur një
numër i jashtëzakonshëm plumbash. Sipas një dëshmitari,
mënyra e ekzekutimit ka qenë makabre, aty rreth orës 2
pas mesnate, teksa kthehej për në shtëpi së bashku
me shokun e tij është ndaluar nga policia speciale dhe menjëherë
është goditur për vdekje. Ndërkaq shoku i tij Jetmir
Iseni 25 vjeç, pasi është rrëmbyer nga policia speciale,
sipas të gjitha gjasave ka përfunduar ne burgun e Shutkës.
Nga ana tjetër, banorët thonë se Agroni ishte djalë
shumë i rregullt dhe i sjellshëm, ai ishte familjar thotë
një banor. Fshati ynë kishte respekt, për ndaj ne jemi
shumë të irrituar për vrasjen çnjerëzore të
birit tonë thonë ata. Burimet tona në spitalin e Tetovës
bëjnë të ditur se policia nuk i ka lejuar mjekët që
të bëjnë autopsinë e tij deri në orët e
paradites.
Aktet e tjera të dhunës ndaj shqiptarëve, dje
Policia speciale "Luanët" e krijuar nga Boshkovski ka
plagosur 50 -vjeçarin, Harun Bakiun, në afërsi të
Zherovjanit. Si pasojë e plagëve të rënda, ai është
dërguar menjehërë për mjekim në qendrën
spitalore të Shkupit, ndërsa nuk dihet gjendja e tij momentale.
Banori Xhevat Arifi nga fshati Bogovinë dje herët në mëngjes
është rrëmbyer nga "Luanët" duke udhëtuar
për në Shkup, dhe nuk dihet asgjë për fatin e tij.
Ministria e Punëve të Brendshme e Maqedonisë nëpërmjet
një njoftimi për median e ka shpallur të mbyllur për
çfarëdo lloj komunikacioni magjistralen me të frekuentuar
në Maqedoninë Perëndimore, Tetovë-Gostivar.
Përreth fshatrave të komunës së Bogovinës janë
pozicionuar rreth 17 mjete të blinduara të policisë të
tipit "BTR" dhe një numër i madh i forcave policore.
Kryetari i komunës së Bogovinës, Hazbi Idrizi, tha për
"Shekullin" se situata është mjaft e tensionuar
Ndërkombëtarët
të shqetësuar për situatën në Maqedoni
Kërkohet urgjentisht lirimi
i të rrëmbyerve
Përfaqësuesit e bashkësisë ndërkombëtare
dje zhvilluan takime me autoritetet maqedonase për mënyrat e
mundshme se si të ndihmohet në rastin e të rrëmbyerve-
deklaroi sot pas takimit me kryetarin Boris Trajkovski, ambasadori amerikan
në Shkup Llorens Batler. Përfaqësuesit e bashkësisë
ndërkombëtare do të bisedojnë me liderët e partive
politike shqiptare dhe me popullatën shqiptare që të ndihmojnë,
e gjithë kjo me qëllim që situata të mos keqësohet
edhe më tutje, - deklaroi ambasadori amerikan. Edhe Havier Solana,
përfaqësuesi i lartë i Bashkimit Europian për Politikën
e Jashtme,dënoi dje me anë të një deklarate rrëmbimin
e civilëve. "U kërkoj autorëve të lëshojnë
të gjitha pengjet menjëherë dhe pa kushte", -tha Solana
që ndodhet në Elseneur (veri i Kopenhagenit) për një
takim jozyrtar të ministrave të Jashtëm të BE-së.
"Kjo lloj dhune nuk ka vend gjatë fushatës elektorale në
një vend demokratik", -vlerësoi ai.
Shtatë civilët maqedonas sipas burimeve, janë rrëmbyer
nga një grup shqiptarësh të armatosur që ndaluan një
autobus në linjën Tetovë-Gostivar. Në deklaratën
e përbashkët të të dërguarit të posaçëm
të UE-së Alen Lwroa dhe ambasadori grek Joanis Ekonomu, në
emër të UE-së, ambasadori i SHBA-ve Llorens Batler, ambasadori
i NATO-s, Nikollas Bigman, dhe shefi i Misionit të OSBE-së në
Maqedoni, ambasadori Kreg Xhenes bëhet gjithashtu apel për lirimin
e pengjëve. "Ne u bëjmë thirrje udhëheqësve
shqiptarë që t'i ndihmojnë autoritetet dhe të bëjnë
çmos për gjetjen e zgjidhjes paqësore", thuhet në
komunikatë. Nga ana tjetër, ambasadori i SHBA-ve dje në
orët e vona të pasdites ka shkuar në zyrën e kryetarit
të PDSH-së, Arbën Xhaferrit, ku po diskutohet me dyert
të mbyllura rreth situatës së rënduar.
Edhe sekretari i përgjithshëm i NATO-s, Xhorxh Robertson, i
bëri dje pasdite një apel për qetësi popullit të
Maqedonisë: "Rrëmbimet e fundit të një grupi
civilësh në ish -Republikën jugosllave të Maqedonisë,
konsiderohen një akt dhune, që kërcënon përpjekjet
e të gjithë atyre që po punojnë për një
stabilitet afatgjatë në vend. Provokimet duhet të ndalin.
U bëj thirrje keqbërësve të lirojnë viktimat
menjëherë dhe pa kushte. I bëj thirrje popullit të
ruajë qetësinë dhe t'u rezistojë të gjitha thirrjeve
për hakmarrje, u kërkoj autoriteteve të vetëpërmbahen,
- tha Robertson. "Qytetarët e Republikës jugosllave të
Maqedonisë kanë më 15 shtator një shans historik për
të ruajtur vendin e tyre drejt rrugës së integrimit evropian.
Jam i bindur se përfaqësuesit e tyre demokratë do të
vazhdojnë të marrin vendimet e duhura për të siguruar
një rezultat pozitiv, duke zhvilluar zgjedhje të lira e të
ndershme. Sidoqoftë, e ardhmja demokratike e vendit mund të
sigurohet përfundimisht, vetëm nëse marrëveshjet respektohen.
në frymën e kompromisit dhe bashkëpunimit nga të gjithë
ata që e firmosën atë. Marrëveshjet nuk mund të
përqafohen kur nuk janë bindëse dhe të refuzuara.
Votuesit duhet të jenë të bindur nga argumente logjike
dhe jo nga abuzimi i pushtetit. Kërcënimet dhe provokimet, kufizimet
e lirisë së lëvizjes, dhe bllokimet e rrugëve nuk
janë në përputhje me konceptin e zgjedhjeve të lira
e të ndershme.Përballë gjithë këtij background-i,
unë dënoj fuqishëm rritjen e dhunës në javët
e fundit, -shtoi ai.
E Enjte 31 Gusht 2002
Maqedoni/ Ministria e Brendshme e Boshkovskit, liderit
të Bashkimit Demokratik për Integrim: Të mos rezistojë
Lëshohet urdhërarresti për Ali Ahmetin
Reagojnë partitë shqiptare dhe disa maqedonase: Kjo nuk është
në të mirë të zgjedhjeve
SHKUP - "Lideri i Bashkimit Demokratik për Integrim (BDI), Ali
Ahmeti, do të arrestohet",- thotë Gran Mitevski, drejtor
i zyrës së sigurisë publike në Ministrinë maqedonase
të Punëve të Brendshme. Urdhërarresti, sipas autoriteteve
të Shkupit, synon kufizimin e aktivitetit elektoral, përkatësisht
kreut të ish-UÇK-së, Ali Ahmeti. Sipas Ministrisë
së Brendshme, Ahmeti akuzohet për gjenocid dhe krime lufte kundër
civilëve. Pa marrë parasysh presionin e madh ndërkombëtar,
Mitevski thotë: "Ministria beson se një rrezik edhe më
i madh do të shkaktohej, nëse një kriminel lufte do të
hynte në Parlamentin e ardhshëm". Madje, në deklaratën
e saj, Ministria e Brendshme i kërkon Ahmetit të mos rezistojë
gjatë arrestimit. "Gjatë arrestimit të kryetarit të
Partisë Bashkimi Demokratik për Integrim, ish-udhëheqësi
politik i UÇK-së, Ali Ahmeti, jeta e policëve maqedonas
nuk duhet të kërcënohet. Kështu, ndërsa Ministria
e Boshkovskit e ka bërë fakt të kryer arrestimin e një
lideri politik, që po kandidon në zgjedhjet e 15 shtatorit,
shumë reagime kanë ardhur nga gjithë qarqet politike vendase.
Mbi të gjitha nuk ka argumente që Ali Ahmeti të arrestohet
pikërisht tani, ku gjithçka, çdo veprim i qeverisë,
duhet të kontribuojë vetëm për qetësimin e situatës
parazgjedhore. Në vrasjen e dy policëve maqedonas, Ali Ahmeti
nuk kishte gisht, pasi incidenti u mor përsipër nga një
tjetër grupim i njohur, si AKSH. Pas kësaj, një bombë
shpërtheu dy ditë më parë në selinë e partisë
së Ali Ahmetit dhe, për këtë akt armiqësor në
prag fushate, qeveria maqedonase nuk mori asnjë masë, përkundrazi,
vendosi të arrestojë vetë viktimën. Ministria e Brendshme
akuzoi, gjithashtu, 3 shqiptarët që mbahen në ndalim, në
lidhje me vrasjen e dy policëve maqedonas në Gostivar, Ramazan
Jaoski, Selam Selami dhe Sulejman Sulejmani për organizimin e vrasjes
së tyre dhe tha se tashmë janë bërë akuza ndaj
tyre për mbajtje ilegale armësh. Zëdhënësi i
Ministrisë, Vojsllav Zafirovski, ka thënë se akuzat do
të zgjerohen. Ministria e Brendshme e Maqedonisë thotë
se një nga të arrestuarit, Ramazan Jaovski, nga fshatin Kollare
e Kërçovës, është kushëri i Ali Ahmetit
dhe bashkëpunëtor i ngushtë i tij dhe e akuzojnë atë
për vrasje civilësh. Ministria e Brendshme akuzon persona nga
Kosova, si ekzekutues të vrasjes, pa dhënë emrat e tyre
dhe thotë se ka të dhëna për këta njerëz.
Megjithatë, ende nuk është dhënë ndonjë
informacion për persona të tillë.
Shqiptarët: Duan të na provokojnë
Partitë
shqiptare, opozita maqedonase dhe përfaqësues të komunitetit
ndërkombëtar kritikuan ashpër dje nxjerrjen e urdhërarrestit
nga Ministria e Brendshme e Maqedonisë kundër ish-përfaqësuesit
politik të UÇK-së, Ali Ahmeti. Partia Demokratike Shqiptare,
e kryesuar nga Arbër Xhaferri, theksoi se Ahmeti dhe të gjithë
ish-luftëtarët janë të amnistuar dhe se, me rastet
e krimeve të luftës, merret Gjykata e Hagës. Një zyrtar
i lartë i kësaj partie, Iljaz Halimi, nënkryetar i Parlamentit,
i tha Zërit të Amerikës se kjo vetëm do ta keqësojë
gjendjen politike dhe të sigurisë dhe nuk përjashtohet
mundësia që të arrihet deri tek një konflikt. Halimi
theksoi se kjo ndikon në fushatën zgjedhore të partisë
së Ahmetit dhe shtoi se kjo mund të jetë edhe një
lojë parazgjedhore. Partia për Prosperitet Demokratik e Abdurrahman
Halitit tha se urdhërarresti për Ahmetin është një
ide e marrë, që lëshohet për një udhëheqës
partie në kulmin e fushatës zgjedhore. Zëdhënësi
i kësaj partie, Zahir Bekteshi, i tha Zërit të Amerikës
se ata që e bëjnë këtë nuk synojnë vendosjen
e rendit dhe stabilitetit, por të kundërtën. Bekteshi tha
se kjo mund të ndërlikojë gjendjen politike, të sigurisë
dhe procesin zgjedhor. Ndërsa Partia Demokratike Kombëtare theksoi
se Ministria e Brendshme nuk mund të arrestojë as Ahmetin dhe
as ndonjë nga udhëheqësit shqiptarë. Sekretari i përgjithshëm
i partisë, Xhevat Ademi, tha se këto veprime e tensionojnë
gjendjen dhe kërcënojnë ta keqësojnë edhe më
tej atë.
Një zyrtar i lartë i opozitës maqedonase, LSDM të
Branko Cërvenkovskit, po ashtu kritikoi ashpër këtë
urdhërarresti ndaj Ahmetit, duke e quajtur atë një veprim
të marrë. Sekretari i përgjithshëm i LSDM-së,
Gjorgji Spasov, i tha Zërit të Amerikës se kjo bëhet
për të prishur zgjedhjet e 15 shtatorit. Ndërsa këshilltari
i presidentit, Trajkovski, për siguri kombëtare, Stevo Pendarovski,
i tha Zërit të Amerikës se presidenti nuk dëshiron
të komentojë këtë zhvillim, sepse vendi është
në mes të fushatës zgjedhore dhe ai nuk dëshiron të
përfshihet në debatet për këtë çështje.
Ndërkombëtarët: Besojmë tek amnistia
Një zyrtar i NATO-s i tha Zërit të Amerikës se qeveria
po përpiqet të nxitë njerëzit për të reaguar
dhe për të bërë ndonjë marrëzi, siç
tha ai. Ndërsa zëdhënësi i ambasadës amerikane
në Shkup, Xhon Kacka, tha se nuk do të komentonte në lidhje
me këtë, ndërsa zyrtarë të NATO-s dhe Bashkimit
Evropian theksuan se mbështetin zbatimin e plotë të ligjit
për aministi dhe të marrëveshjes së Ohrit. Një
zyrtare e BE-së tha se organizata ishte e ndërgjegjshme për
kërcënimet që vijnë nga arrestimi i Ahmetit. Zyrtarja,
që nuk dëshironte të identifikohej, i tha Zërit të
Amerikës se, me rastet e krimeve të luftës merret Gjykata
e Hagës dhe autoritetet duhet të konsultohen me të para
se të ndërmarrin ndonjë veprim, siç është
lëshimi i urdhërarrestit për Ali Ahmetin apo dicka tjetër.
Zyrtarja e BE-së theksoi se këto veprime kanë tashmë
ndikim në gjendjen në vend, se ato po kufizojnë lëvizjet
dhe fushatën zgjedhore të BDI-së të Ali Ahmetit. Megjithatë,
ajo shtoi se, nëse autoritetet do ta bëjnë këtë
apo jo (arrestimin e zotit Ahmeti), kjo mbetet për t'u parë.
Ndësa, zëdhënësi i NATO-s në Maqedoni, Kreig
Retklif, thotë se nuk beson që në Maqedoni ekzistojnë
kërcënime të vërteta për sigurinë e shtetit.
Megjithatë, Retklifi thotë se, edhe përkundër njoftimeve
për disa kërcënime që dëgjohen përditë,
realiteti flet se ka njerëz dhe grupe që vazhdojnë ende
dhunën.
(marre
nga Gazeta Shekulli)
|
|
|