|
|
include ("http://www.shqiperia.com/reklama460.php");
?>
Si u përfol në gjashtë
shekuj histori ligjëbërësi i parë, princ Lekë
Dukagjini. Abuzimi sot e kësaj dite me kanunin, një “gabim
idelogjik” i princit, meritat e të cilit u eklipsuan nga miti
i Heroit Kombëtar, Skënderbeut. Studiuesi Tonin Çobani,
pas 10 vjet kërkimesh, sjell të parën monografi mbi “Princin
e përfolur Lekë Dukagjini”
Njollat e murrme të Lekë Dukagjinit
Elsa Demo
Ç’ishte ky njeri që jeton sot e kësaj dite në
mendjet e njerëzve, që historiografia nuk e përfill dhe
që në opinionin zyrtar vazhdon të shihet si dreqi i mallkuar.
Kush ishte princi Lekë Dukagjini, më i fuqishmi princ pas Skënderbeut?
Ashtu si është lartuar njëri dhe përfolur tjetri,
vështirë të besosh se historia e shkruar nga shek.XV, paskësh
pasur mision të vërtetën. A thua, heronjtë, qenkëshin
njerëzit më të pambrojtur dhe më të frustruar
për një pjesë historianësh.
Jashtë lojës dhe qorrsokakëve të historisë, po
të pyesësh Tonin Çobanin përse i hyri kërkimeve
për monografinë “Princi i përfolur Lekë Dukagjini”,
të përgjigjet se për herë të parë po takonte
një princ shqiptar, si Lekë Dukagjini, që kishte bërë
duel për një grua. Dhe të mendosh pastaj zërat se
ç’gur e kusur heq gruaja në Kanun të Lekës.
Në hierarkinë e përfoljeve që i bëhen këtij
princi sot e gjashtë shekuj, Kanuni është forma më
moderne e keqkuptimit, keqpërdorimit, mishërimit të fenomenve
të gruas shqiptare, pikërisht në qafë të Kanunit.
“Historiani i fillimit që kishte nisur kërkimet për
një personazh antagonist të Skënderbeut, ishte Biem Tivarasi.
Dhe ishte Leka, një princ i madh, kundër një princi tjetër
të madh, si Skënderbeu”,- thotë Çobani qysh
në krye, duke lënë të kuptojë se fati historik
i Lekës, ishte i lidhur pas hijes së Heroit. Historiografia
shqiptare pas Luftës së Dytë Botërore, energjitë
e të cilës shkuan të përpunim të kulteve dhe
miteve, mbi të gjitha këto rrinte figura e Skënderbeut,
ose e shmang, ose e konteston princin Dukagjin. “Historianët
e kanë përfolur që në krye Lekë Dukagjinin, sepse
kërkonin një personazh antagonist të Skënderbeut për
të intriguar jetëshkrimin e heroit të vetëm kombëtar,
që njohu Evropa në përballjen e suksesshme shqiptaro-turke”,-
shkruan Çobani në monografinë e tij. “Ata nuk guxuan
të gjykonin veçanërisht, Republikën e Venedikut
që jo vetëm nuk u qëndroi aleate shqiptarëve por e
shfrytëzoi rezistencën e tyre për interesa komercialiste.”
Sipas studiuesit ajo që ndodhi në shekullin e 20-të, sidomos
pas ’67-ës, ishte kontestimi i Lekë Dukagjinit, sipas
ideologjisë së kohës, teksa identifikohej me Kanunin, armikun
e emancipimit të njeriut të ri në Shqipërinë
Komuniste. Megjithatë ai vazhdonte të ekzistonte. “Ndërsa
sot, në vitet e trazicionit, kur ligji nuk vepron dot, sërish
fajet i merr Leka. Ndoshta pikërisht në mungesë të
një demokracie të vërtetë, universaliteti i fjalëve
të urta të Lekë Dukagjinit, ka shkaktuar diskutime deri
në vënien në dyshim të përmbajtjes së tyre”,-
shton Çobani.
Monografia “Princi i përfolur Lekë Dukagjini” konteston
disa stampime për periudhën e Skënderbeut, dhe shek.XV
vazhdon të shihet vetëm Skënderbeun.
Ka rreth 170 referenca ky libër dhe disa nga burimet kryesore që
i kanë shërbyer studiuesit janë Dhimitër Frangu, arkëtari
i Skënderbeut, i cili jep të dhëna të sakta dhe gjithë
burimet që flasin për Skënderbeun, aty është
vjelë jetëshkrimi i Lekë Dukagjinit. Por ajo burimi që
i ka shërbyer në veçanti Çobanit është
folklori sllav, i Malit të Zi dhe Bosnjë Hercegovinës.
Heroi i tyre Krajleviç Marku ka kundërshtar Lekë Dukagjinin.
Studiuesit nuk i janë afruar deri tani këtij princi, që
as vdekja nuk dihet nga i erdhi, dhe as varri nuk i gjendet, përfshi
edhe këtu edhe vetë Shtjefën Gjeçovin që veç
kodifikimit të Kanunit të shkruar nuk la asnjë të
dhënë apo jetëshkrim për princin. Tonin Çobani
definon në këtë libër se Lekë Dukagjini përfaqëson
kulturën iluministe në Shqipëri. Kishte studiuar në
shkollën shqiptare të Venecias. Megjithatë studiuesi nuk
pretendon të thotë më shumë hollësira për
shkollimin e brezit të Lekë Dukagjinit në Venecia, Firence
apo Milano. “Por jemi të sigurtë se kultura e tij ishte
e nivelit bashkëkohor me kuptimin e atëhershëm të
fjalës. Aq më tepër kur dimë se në dhjetëvjeçarin
e tretë e të katërt të shek.XV kur mendohet se princ
Leka brumosej me kulturë humaniste në një qytet si Venecia,
ku prezatohej një nga kulmet e Rilindjes Italiane, bijtë e familjeve
fisnike shqiptare, që jetonin apo studionin atje përbënin
rrethe të njohura kulturore dhe kishin statuset e shkollave të
tyre. Bëmat e Lekës dhe vepra që ai na ka lënë
e vërtetojnë më së miri këtë.”
Në këtë kuptim tërë kultura shqiptare paraosmane
merrte frymë në ajrin iluminist të Rilindjes Evropiane.
Kështu Lekë Dukagjini bënte pjesë në grupin e
atyre shqiptarëve që e përfaqësonin atë si Pal
Engjëlli peshkopi i Drishtit e më vonë kryepeshkop i Durrësit,
si Dhimitër Frëngu arkëtari i Skënderbeut, Marin Barleti,
Marin Beçikemi etj
Nëse do të përpiqeshim të krijonim një hierarki
të përfoljeve të këtij princi që rridhte nga
principata më e fuqishme e kohës ajo e Dukagjinëve, të
cilën e gjejmë të përmendet në analet historike
qysh në shekullin 7, studiuesi Çobani përmend disa syresh.
Faktin që princi ishte kundërshtari i vetëm i venecianëve
të cilët kishin zotërimet e tyre në Shqipëri;
fakti që ligjet e tij iu kundërviheshin administratës turke,
apo më vonë duke u afruar në kohë dhe në konflikte
të tjera interesash, edhe pas vdekjes së tij, do të ishin
sllavët që do ta përflisnin me idenë se shqiptarët
s’kanë ligje.
Përflitet gjithashtu për komplotin në Krrabë kundër
Skënderbeut, i cili më vonë është vërtetuar
që komplotisti nuk ishte ai. Ishte shpesh në krah të Skënderbuet,
duke ditur që Pal Dukagjini ishte një nga princat e bindur që
iu gjend heroit në Kuvendin e Besëlidhjes së Lezhës.
Përflitet gjithashtu për lidhjet me turqit, ndërsa Skënderbeu
kishte arritur pajtimin me Venedikun. Ndërsa janë të parët
venecianët ata përflasin ligjëbërjen e princ Lekës,
pas vdekjes së tij në vitin 1481. Dhe si për të mbyllur
historinë e kundërvënieve kthehemi tek përfolja për
vrasjen e Lekë Zaharisë, princit të Danjës, (Vau i
Dejës), burri me të cilin doli në duel për princeshë
Jerinën. Studiuesi Çobani, ka shfrytëzuar burimet historike
të Fan S.Nolit. Hamendja për këtë vrasje sipas gojëdhënës,
merr shkas nga ia duel. Thuhej se Leka do të merrte hak ndaj Zaharisë.
Në të vërtetë këta dy princër përfaqësonin
kultura dhe interesa të ndryshme. Ndërsa Noli kur tregon se
Jerina “hodhi votën” për Zaharinë, shkruan:
“Po ku të lë Lekë Dukagjini të mbarohet puna
me votë sa kohë kishte kordhën në dorë.”
Princi ishte 35 vjeç. Ky duel, që ndodhi në dasmën
e Mamicës, motrës së Skënderbeut, ishte quajtur ndryshe
“beteja homerike e Muzakinës”, e cila përfundoi
me përleshjen e eskortave të dy princërve. Leka u martua
me Teodora Muzakën, motrën e Gjon Muzakës. Sipas dëshmive
që vijnë nga ky i fundit, çifti nuk u nda deri në
fund të jetës dhe nuk patën kurrë fëmijë.
Mbetet ende shumë për të bërë për të
zbardhur të tjera marrëdhënie të panjohura me historinë,
për këtë princ. Sikur të mund të vinte dita kur
të kishte në dorë dokumente nga arkivat Venecias, Raguzës,
Vatikanit, Tonin Çoabni thotë se pjesën tjetër të
jetës do t’ia kushtonte princit të përfolur.
Kush ishte princ Leka
Lekë Dukagjini lindi në vitin 1410 në Ulpiana. Princërit
e dinastisë së Dukagjinëve kanë sunduar në principatën
me të njëjtën emër ose gjysmën e saj që
shtrihej deri në pjesën verilindore të Shqipërisë
deri në hapësirat e sotme të Rrafshit të Dukagjinit
e më tej. Diku në jug të prishtinës është
qytetit i Ulpianës, aty ku mendohet të ketë lindur dhe
të ketë kaluar rininë e vet princ Leka, jetëgjatësia
e këtij qyteti nuk mbushi asnjë shekull kështu që
edhe në përshkrimet e historianëve përfytyrohej një
qytet arbëror përrallor.
Duke ditur se babai i Lekës, Pal Dukagjini ishte një katolik
i mirë që nuk u konvertua asnjëherë në fetë
e fqinjëve apo të turqve, Leka duhet të ketë marrë
mësime dhe kulturë nga priftërinjtë e Ulpianës,
ashtu siç ishte tradita në atë kohë. Por nuk duhet
përjashtuar mundësia edhe e ndonjë shkollimi në qytetet
universitare të gadishullit të Apenineve veçanërisht
në Republikën e Venedikut, lidhjet me të cilën prinicipata
e Dukagjinëve i kishte të kahershme, apo në Raguzë
ku kishte studiuar edhe miku i tij Pal Engjëlli.
Për 40 vjet Lekë Dukagjini krijoi një qytet të lulëzuar,
Ulpianën në mesin e shek. XV. Ndoshta në këtë
urtësi dhe drejtësi të trashëguar që e kosolidon
më tej Leka duhen kërkuar burimet e Kanunit.
Kanuni
Nga libri III “Martesa”
Gruja e vejë flet vetë.
Grueja e vejë i kthen kryshqit m’udhe.
Sheji, mje ke të hjekshin dore ta bam nieriun t’andin.
Krushku-krushk, Miku-mik.
Grueja s’bjen në gjak.
Grueja e ngarkueme (shtatzënë), si maza e tamblit (qumështit).
Shekulli
include ("http://www.shqiperia.com/reklama460.php");
?>
|
|
|