|
|
Së bashku me regjisorin Pali Kuke
kanë ndërtuar spektaklin që do të shënojë
rikthimin e tij në ekranin televiziv. E kanë titulluar "Ethet
e së premtes mbrëma & Krasta -Shoë" ciklin që
që për 19 javë do të trasmetohet në Televizionin
Shqiptar, në Telesport dhe në TV 21 në Kosovë. Pas
kësaj çifit Kuke-Krasta kanë një tjetër plan
ende të papërcaktuar qartë
Festivalin e 41-të
të Këngës në Radio-Televizion ku Kuke është
regjisor dhe Krasta ndoshta prezantuesi i tij.
Krasta
me ethet e një spektakli
Zefina Hasani
Kishte thënë, në ditët e para të rikthimit të
tij në Tiranë
se do të shfaqej gradualisht në
ekranin televiziv. Vendosi kështu, jo për t'iu shmangur frikës
së harrimit por për të ruajtur figurën e tij, mbi
të gjitha. Kur pranoi të punonte si drejtor artistik i Telesportit,
nisi të kapërcente të parat faza të këtij lloj
rikthimi në botën televizive. Nisi, ndërkaq, të shfaqej
në emisionet e të tjerëve (si i ftuar i tyre). Ndërsa
tani ndihet i gatshëm për të marrë vetë në
duar një spektakël televiziv. Për t'u shfaqur i tëri
në ekran, ashtu siç ka qenë një herë e një
kohë (kur ende nuk kishte ikur drejt Londrës për të
punuar në BBC). Kështuqë prej ditësh e ditësh
të tëra, Adi Krasta së bashku me regjisorin Pali Kuke,
ngritën pak e nga pak themelet e një spektakli, të cilin
së shpejti (ndoshta këtë javë) do ta shfaqin në
tre ekrane televizive
në Telesport, në Televizionin Shqiptar
dhe në TV 21 në Kosovë. "Ethet e së premtes mbrëma
& Krasta Shoë" e kanë titulluar këtë spektakël
i cili do të vijojë për 19 javë në syrin e spektatorit.
E ndërsa Pali Kuke ruan si gjithmonë qetësinë e tij,
Adi Krasta nuk mundet ta fshehë entuziazmin që e ka pushtuar
që në ditën e parë të nisjes së kësaj
pune. E gjithë kjo shënon rikthimin i tij në botën
e munguar të spektaklit televiziv, ndaj dhe emocioni është
krejt ndryshe nga ai i regjisorit i cili nuk ka pasur asnjë ndarje
kohore me spektaklin.
* * *
"Ethet e së premtes mbrëma & Krasta Shoë"
do të jetë një cikël i tërë që do të
realizohet nga bashkëpunimi i tre televizioneve (Telesport, RTSH
,TV 21 në Kosovë) dhe Teatrit të Operas dhe Baletit.
Krasta shpjegon se i gjithë ky cikël që ata po ndërtojnë
është i ngjashëm -me serialin televiziv "Pop Idol"
që u transmetua vitin e shkuar edhe në Britani me një sukses
të madh. Boshti i këtij spektakli janë talentet e reja.
Kemi si synim që të bashkojmë të gjithë ata të
rinj që në një kohë prej 19 javësh do të
transformohen nga të panjohur në artistë të kompletuar."
Kërkimi për këta të rinj ka nisur prej kohësh
në qytete të ndryshme të Shqipërisë. Një
grup pune është ngritur enkas për këtë gjetje.
Pas tyre shkon dhe vetë Krasta- "Nuk mundem të rri e të
pres. Nuk është aspak puna ime për të përzgjedhur
këta të rinj por kam një dëshirë të jashtëzakonshme
për të parë gjithçka e për të prekur gjithçka
vetë me duart e mia". Tregon se nuk është aspak e
lehtë "gërmimi" në këto qytete, aq më
pak lëvizja me një trupë të tërë televizive.
"Kemi kërkuar në të gjitha klasat e gjimnazeve e universiteteve
që ndodhen në qytete të ndryshme. Një komision ekspertësh
do të merret me përzgjedhjen e tyre në formë kapilare
për t'i çuar më pas më të mirët në
Tiranë ku do të "ndihmohen" prej një shpure të
specializuar skenaristësh, koreografësh, stilistësh e aranzhuesish
muzikorë. Ky penel përzgjedhës do të jetë dhe
elementi kyç në këtë spektakël. Ky komision
përbëhet nga Alfred Kaçinari, Zhani Ciko, Shpëtim
Saraçi, Zerina Kuke dhe Kristi. Të ndryshëm nga njëri
tjetri ata do të sjellin një pamje krejt të re të
një jurie nga e cila priten reagime dhe vlerësime të pa
shfaqura ndonjëherë më parë përballë konkurruesve
dhe publikut.",-sqaron Krasta, duke shtuar se destinacioni ku do
të mblidhen më të mirët, do të jetë skena
e Teatrit të Operas dhe Baletit. Rrëfimi i tij zaptohet nga
entuziazmi ndërsa pohon se- "Ç'është e vërteta,
gjithnjë e kam menduar kthimin tim në Televizionin Shqiptar.
Dhe ja ku po realizohet kjo dëshirë e imja e heshtur për
kaq kohë. Veç kësaj, më gëzon dhe fakti se
do të dal edhe në ekranin e Telesport-it njëherazi ".
Ndërsa edhe ekrani i televizioni 21 në Kosovë do ta transmetojë
këtë program në satelit për shikuesit në SHBA
dhe Kanada.
* * *
Për Krastën ky- "Është një cikël tejet
impenjativ i cili ka në qendër jo vetëm mënyrën
e të kënduarit, e cila gjithsesi është interesante,
por edhe shprehjen e personalitetit, prirjet karakteriale, marrëdhënien
me publikun, fokusin e përgjithshëm, pamjen, vetëpërmbajtjen,
batutën". U është dashur shumë kohë të
ngrenë në këmbë skeletin e gjithë këtij
spektakli. Herë- herë, Krasta e ka ndier rrezikun e ndonjë
shprishjeje
por nuk ndodhi ashtu. Tashmë regjisori Pali Kuke
i ka përcaktuar të qarta linjat kryesore regjisoriale, si gjithmonë
duke u tërhequr drejt marrëdhënies njerëzore (elemente
televizive që ai e parapëlqen)-Krasta ishte i bindur se nuk
kishte se si të ndodhte ndryshe. Ato çaste hezitimi që
ka ndier brenda vetes, gjatë ditëve të gjata të punës,
kanë qenë të pakta, shumë të pakta-"Kam
punuar dhe më parë me Pali Kuken. Ishte viti 1996 kur ai konceptoi
një spektakël ku për herë të parë Gjebrea
dhe Krasta kënduan së bashku në televizion. Kështuqë
e di mirë se si i ndërton ai spektaklet dhe ndihesha i sigurt
krah tij në këtë sipërmarrje." Kujton më
pas se për një vit me radhë ka drejtuar spektaklin - lojë
"Telebingo"
po sipas ideve regjisoriale të Pali Kukes-"Pra
janë lidhje të vjetra me Palin. Si bazë për këtë
afrim professional ka shërbyer miqësia e gjatë dhe e ngushtë
e imja me bashkëshorten e njohur të regjisorit Kuke, prezentatoren
e mirënjohur Zerina Kuke." Kjo treshja, rinisi bashkëpunimin
pas kthimit të Krastës në Tiranë me ciklin prej 25
pjesësh "Globi sa një top futbolli" që u transmetua
gjatë kampionatit botëror të futbollit në Telesport.
* * *
Ky është vetëm fillimi. Kuke dhe Krasta sapo e kanë
rinisur punën e tyre të përbashkët. Kështuqë
me "Ethet e së premtes mbrëma & Krasta Shoë"
do të shënojnë jo vetëm rikthimin e Krastës në
ekran por dhe të vazhdimësisë së bashkëpunimit
të tyre. Nuk do të jetë aspak çudi nëse në
festivalin e muzikës së lehtë shqiptare, në të
cilin Kuke do të jetë regjisor, të shfaqet në atë
skenë edhe Adi Krasta, si prezantuesi i vetëm i netëve
të këtij festivali. Fjalët janë pëshpëritur
nëpër korridoret e Televizionit shqiptar, ndërsa vetë
Krasta nuk dëshiron të shpjegohet. Ka në mendje tani për
tani, hapjen e spektaklit të madh, të cilit jo pa qëllim
i ka vënë emrin e tij (asnjëherë më parë
nuk ka ndodhur kështu, që një spektakël të marrë
emrin e atij që e drejton). Nën atë emërtim, rikthimi
në ekran do t'i duket edhe më i bujshëm. Pse jo, përderisa
spektaklit i ka munguar vërtet një emër i tillë. Ndoshta
ky emër do të rikthehet jo vetëm në këtë
spektakël por edhe në netët e Festivalit të 41-të
të Këngës në Radio-Televizion.
Kush janë më të mirët
Dy kampet e kundërta në fushën e spektaklit
Ata e njohin shumë mirë njëri- tjetrin. Adi Krasta ka
punuar tre vjet me radhë me Vera Grabockën, atëherë
kur Ardit Gjebrea kishte ikur nga ky vend (ishte në itali). Grabocka
i nisi me Krastën të parat spektakle të saj në vitin
1992
"12 Vallëzime pa një të shtunë",
"Rreth fatit për 12 javë", "12 në Hollivud",
në të cilat Krasta ka prezantuar herë me Valbona Selimllarin
e herë me Ema Troplinin. Pastaj lidhjet mes tyre u shkëputën.
Për tre vite të tjera Krasta punoi me regjisorin tjetër,
Pali Kuken
derisa vendosi të ikte për ca kohë nga
Tirana (shkoi të Londër për të punuar në BBC).
E ndërsa Krasta iku, Ardit Gjebrea kthehet nga mërgimi i tij
në Itali. Dhe merr menjëherë në duar botën e
spektaklit. Krah Pali Kukes e nisi këtë përpjekje derisa
ia mori mirë dorën prezantimit të një spektakli (me
Telebingon Kombëtare). Bashkë me Pali Kuken realizoi dhe festivalin
e tij "Kënga magjike". Ndërkohë kthehet nga Amerika
edhe regjisorja Vera Grabocka. Pas kësaj, Gjerbrea do t'i largohej
Kukes, për të nisur më tej punën e tij me Grabockën.
Ndodhi, çuditërisht që në këto kohë Adi
Krasta rikthehet në Shqipëri. Një dyshe tjetër u krijua
Kuke-Krasta.
Lidhjet u ngatërruan. Ai që në fillim kishte bashkëpunuar
me Grabockën u lidh në fund me Kuken, ndërsa ai që
në fillim kishte punuar me Kuken, u lidh në fund me Grabockën.
Ata që e njohin shumë mirë shoku-shokun, tani janë
pashmangshmërisht përballë njëri -tjetrit. Gjebrea
-Grabocka dhe Kuke-Krasta kanë në duar projektet e tyre të
mëdha, të cilat me sa duket, do të realizohen në të
njëjtën kohë përpara syrit të spektatorit. Të
parët (pra Grabocka-Gjebrea) po përgatiten për festivalin
"Kënga Magjike", të dytët (pra Kuke-Krasta) po
punojnë për Festivalin e madh të fundvitit. Të parët
po punojnë për një shfaqje të sopranos Inva Mula,
të dytët do të dalin në transmetim me spektaklin "Ethet
"
Lufta mes tyre ndihet, edhe pse nuk duket e hapur.
Marrë nga Gazeta shekulli
|
|
|