|
|
Jugu i Shqipërisë takon Jugun e Italisë
Vizitë e kryetarëve të
komunave dhe bizesmenëve të Vlorës, Fierit, Beratit e Gjirokastrës
në rajonin e Pulias.
Itali- Shqipëri, hapësira të
reja bashkëpunimi
Nga Eva Kushova
Shqipëria
ka ndryshuar.. nuk është më një vend emigrantësh,
nuk është më një shtet që shtrin dorën për
ndihmë, por një vend me të cilin duhet të bashkëpunohet
ekonomikisht, të firmosen projekte të mëdha dhe të
vihen në zbatim. Kjo ishte ideja që përshkoi takimet e
ngjeshura mes përfaqësuesve zyrtarë dhe biznesmenëve
të Jugut të Shqipërisë dhe homologëve të
tyre në Jugun e Italisë, në rajonin e Pulias. Në këtë
vizitë të organizuar nga Shoqata e Investitorëve Italianë
në Shqipëri (AIIOA) merrnin pjesë kryetarët e bashkive
të Vlorës, z. Niko Veizaj, i bashkisë së Fierit, z.
Nikollaq Koshovari, i bashkisë së Gjirokastrës, z. Murat
Kaçi, dhe kryetari i bashkisë së Beratit,z. Nikollaq
Mata. Gjithashtu, në përbërjen e delegacionit shqiptar
merrnin pjesë kryetarët e dhomave të tregtisë së
katër bashkive si dhe biznesmenë shqiptarë, që kanë
investuar dhe operojnë në Jugun e vendit. Synimi i këtij
takimi ishte të krijohej një binjakëzim mes bizneseve të
Jugut të Italisë dhe Jugut të Shqipërisë, të
bëhej e njohur për biznesmenët italianë që duan
të investojnë në Shqipëri situata aktuale e këtij
vendi, të prezantoheshin ndryshimet që kanë ndodhur, por
të paraqiteshin nevojat e planet për të ardhmen. Tashmë
ekziston një numër i madh projektesh që kanë filluar
dhe po vihen në jetë në bashkëpunim me investitorët
italianë. Kryesisht programi Intereg 3, që synon zhvillimin
e Jugut të Shqipërisë do të zbatohet në katër
drejtime: telekomunikacioni, transporti, turizmi dhe agrokultura. Përveç
kësaj, korridori 8 që do të lidhë Evropën Juglindore
me Azinë do të kalojë në katër pikat kryesore
të Vlorës, Barit, Brindisit e Durrësit dhe projekti i transporteve
do të realizohet në bashkëpunim mes dy vendeve. Vetë
bashkia e Vlorës ka nisur një sërë projektesh lokale
në bashkëpunim me zonën e Pulias.
Takimet më të rëndësishme u zhvilluan me përfaqësuesit
zyrtarë të komunës së Brindisit dhe me kryetaren e
bashkisë së Leçes, znj.Adriana Poli Bartole. Në
këto takime, kryetarët e katër komunave kryesore të
Jugut të Shqipërisë, pasi prezantuan situatën ekonomike
në zonat që ata qeverisin, ftuan sipërmarrësit italianë
të investojnë në Shqipëri. "Erdhi momenti që,
në nivel bashkie, Italia dhe Shqipëria të punojnë
së bashku
", - kështu u shpreh kryetari i bashkisë
së Vlorës, z. Niko Veizaj, gjatë takimit me përfaqësuesit
e bashkisë së Brindisit. "Hapat e fundit, përfshirë
vizitën e kryeministrit italian Silvio Berluskoni në Shqipëri,
tregojnë interesin e madh të Italisë për ta integruar
Shqipërinë
. Rruga drejt Evropës ka një portë
dhe kjo është Italia. Ndërsa qyteti i Vlorës është
pika më e afërt e Ballkanit me Italinë",- tha z. Veizaj
duke theksuar nevojën e madhe për investime e projekte që
duhet të nisin pikërisht në këtë qytet bregdetar.
Në lidhje me projektet e korridorit 8 dhe të Intereg 3, z. Veizaj
theksoi: "Ne po bëjmë të pamundurën për
t'i merituar këto projekte". Ai ftoi dhomat e tregtisë
të Leçes e të Brindisit të jenë të pranishme
në qytetin e Vlorës me investimet e tyre.
Kryetari i bashkisë së Fierit, z. Koshovari, prezantoi numrin
e madh të bizneseve që zhvillohen në këtë zonë.
"Bëhet fjalë për rreth 2500 aktivitete private, rreth
40 firma të huaja, kryesisht italiane e greke. Fieri renditet pas
Tiranës përsa u përket bizneseve",- pohoi z. Koshovari.
Gjithashtu, duke qenë një zonë e pasur arkeologjike (Apolonia),
kreu i bashkisë së Fierit ftoi investitorët italianë
të investojnë në këtë fushë. Sipas tij,
problematike për komunën e Fierit është ndotja e mjedisit,
për shkak të mbeturinave të naftës që hidhen
në lumë.
Kryetari i bashkisë së Gjirokastrës e të Beratit,
duke prezantuar, gjithashtu, situatën në zonat që ata drejtojnë,
ftuan investitorët italianë të ndihmohet bashkëpunimi
tregtar dhe të investohet kryesisht në turizëm. Të
dyja qytetet kanë vlera të mëdha turistike, fusha ku ia
vlen të investohet.
Stabiliteti politik- një arritje
Kryetarja e bashkisë së Leçes, Adriana Poli Bartole,
në fjalën e saj gjatë takimit me delegacionin shqiptar,
shprehu kënaqësinë për ndryshimet e mëdha dhe
veçanërisht për stabilitetin politik të arritur
kohët e fundit në Shqipëri. "Shqipëria po bën
përpjekje për stabilitetin politik, që është
shumë i rëndësishëm. Jo vetëm si deputete e Parlamentit
evropian, por edhe si pjesëtare e OSBE-së kam vënë
re se diçka ka ndryshuar dhe nuk është më ajo shija
që ka lënë më parë Shqipëria para disa viteve.
Vihet re një përpjekje në qeverisje, si nga ana e pozitës
dhe nga ana e opozitës për stabilitet politik dhe kohët
e fundit po tregohet qartë që edhe zoti Berisha, kryetar i opozitës
është dakord për ulje në tryezë dhe për
stabilitet politik. Shpresojmë që ky nuk do të jetë
vetëm një imazh". Për sa u përket bashkëpunimeve
ekonomike, kryetarja e bashkisë së Leçes konfirmoi përpjekjet
e mëdha që po bëhen: "Kam qenë në Tiranë
javën e kaluar dhe kemi diskutuar për qarkullimin e lirë
të njerëzve dhe mallrave. Është e dukshme që
Shqipëria po këmbëngul të hyjë në Evropë,
por kjo është e vështirë dhe kërkon një
rrugë të gjatë", - theksoi kryetarja e bashkisë
së Leçes, e cila, nga vizitat që ka bërë në
vendin tonë, është tepër e mrekulluar nga bregdeti
shqiptar. "Kam parë që keni një det të mrekullueshëm,
brigje të bukura, që duhet patjetër të vlerësohen
si turizëm. Uroj që të jeni ju shqiptarët dhe jo t'jua
dorëzoni të tjerëve që të shfrytëzojnë
brigjet tuaja".
Ndërsa konsulli i Vlorës, z. Marcelo Fonti, gjithashtu një
nga organizatorët e këtij takimi, shprehu shqetësimin për
gjendjen aktuale të portit të Vlorës. "Ne vend që
të jetë një faktor bashkëpunimi, aktualisht ky port
është një faktor depresiv",- tha z.Fonti, i cili,
me këtë rast, u kërkoi autoriteteve lokale shqiptare të
shfrytëzojnë paketën 170 milionë euro të qeverisë
shqiptare (për vitet 2002-2004), ku përfshihen restaurimi dhe
zgjerimi i porteve. Vetëm porti i Vlorës duhet të marrë
25 milionë euro nga kjo paketë. "Përzgjedhja e bashkive
në këtë takim nuk është e rastit, por, si Fieri,
Berati e Gjirokastra, kanë bashkëpunime ekonomike me Vlorën
dhe gjithë bizneset e tyre kalojnë nëpërmjet këtij
porti",- theksoi konsulli Fonti. Ndërsa drejtori i portit të
Brindisit, z. Ganini, u shpreh se po bëhen shumë përpjekje
për të përmirësuar situatën e pritjes së
pasagjerëve në Brindisi, ku do të krijohet një strukturë
e re për të përmirësuar lëvizjen e pasagjerëve,
projekt që do të përfundojë në verën e 2003-së.
Delegacioni shqiptar zhvilloi edhe takime me sipërmarrës italianë
dhe bëri vizita në disa nga ndërmarrjet e suksesshme në
rajonin e Pulias.
(marre nga Gazeta Shekull)
|
|
|