|
|
Futboll, Sot fillon kampionati
i 64-t
"Start
të mbarë dhe fat në fitimin e titullit të 64-t kampion
për të gjitha skuadrat pjesëmarrës në këtë
aktivitet kombëtar!". Ky ka qenë urimi i dalë dje
nga institucioni qëndror i futbollit shqiptar. Presidenti i FSHF-së,
Armando Duka, dhe sekretari i përgjithshëm, Sulejman Starova,
me rastin e fillimit të kampionatit të ri të futbollit,
dhanë dje në orën 11.00 një konferencë për
shtyp, e cila është shoqëruar më pas edhe me një
koktej për të gjithë të pranishmit. Pasi u ka uruar
suksese të gjitha klubeve pjesëmarrëse në këtë
aktivitet kombëtar, presidenti Duka është ndalur edhe në
punën e bërë deri tani nga institucioni që ai drejton.
"Është hera e parë për mua që më qëllon
të bëj një urim të tillë në prag të
fillimit të një aktiviteti kaq të madh, siç është
kampionati i ri i futbollit. Federata Shqiptare e Futbollit ka bërë
një punë intensive që gjithçka të fillojë
mbarë. Në funksion të kësaj, kemi miratuar strukturën
e re të FSHF-së, duke ngarkuar një sektor të tërë
garash për t'u marrë direkt me këtë aktivitet. Nga
ana tjetër, përmirësimi i rregulloreve të aktivitetit
në fjalë, riorganizimi i komisioneve disiplinore, miratimi i
skemës së re të kampionatit të ardhshëm të
futbollit etj., janë dëshmia më e mirë e përpjekjeve
tona për zhvillimin e një kampionati normal e të qetë."
Më tej, presidenti i FSHF-së, në prani të përfaqësuesve
të të gjitha klubeve të futbollit të kategorisë
së parë dhe të dytë, ka zbuluar marrëveshjet
e lidhura mes Federatës së Futbollit dhe Ministrisë së
Rendit dhe INSIG-ut për sigurimin e futbollistëve, trajnerëve,
gjyqtarëve dhe të gjithë atyre që merren me këtë
sport në vendin tonë. "Është hera e parë
që futbollistët, trajnerët dhe gjyqtarët tanë
janë të siguruar për gjithçka që mund t'u ndodhë.
Këtë e kemi arritur falë një marrëveshjeje mes
Federatës së Futbollit dhe kompanisë së sigurimeve,
INSIG. Po kështu, kemi marrë të gjitha garancitë edhe
nga Ministria e Rendit Publik që rendi dhe qetësia në stadiume
dhe fushat e futbollit të jetë maksimale. Prandaj, shpresoj
që dhuna në këtë kampionat, jo vetëm në
stadium, por edhe në fushën e lojës, të minimizohet,
pasi vitin që shkoi u vunë re shumë gjeste të tilla.
Dua t'u kujtoj të gjithë drejtuesve të klubeve dhe futbollistëve
se ndëshkimet për ata që shkelin rregulloret e aktivitetit
do të jenë tejet të rënda. Në këtë
shtrëngim masash, nuk do të shpëtojnë as gjyqtarët
që verifikohen se kanë abuzuar. Ne, si Federatë, kërkojmë
mirëkuptimin dhe bashkëpunimin e klubeve, për të zhvilluar
një kampionat të ndershëm dhe "fair-play", -
e ka përfunduar fjalën e tij përshëndetëse me
rastin e fillimit të Kampionatit të 64-t Kombëtar të
Futbollit, presidenti i FSHF-së, Armando Duka.
1. Vllaznia-Teuta
Për të katërtën herë me radhë, shkodranët
do ta nisin sezonin në "Loro Boriçi" ku në
tre të kaluarat nuk kanë fituar asnjë takim. Sot, ata do
të synojnë një të tillë, aq më tepër
kur këtë ndeshje do ta luajnë nën efektin e projektorëve,
për të parën herë në "Loro Boriçi"
në një takim zyrtar. Ndërsa Teuta, javën e parë,
për të tretin sezon radhazi, do të luajë larg "Niko
Dovanës". Në pesë sezonet e fundit, pavarësisht
ku është ndeshur, Teuta asnjëherë nuk i ka ndarë
pikët me kundërshtarët. Pas 11 vjetësh, sportdashësit
shkodranë do të shohin në ditën e parë të
kampionatit sfidën Vllaznia-Teuta.
2. Elbasani-Dinamo
Në rikthimin mes më të mirave kampionia e kategorisë
së dytë, do të përballet me kampionen e vendit, skuadrën
e Dinamos. Për herë të fundit, Elbasani e ka zhvilluar
takimin e hapjes në qytetin e vet në sezonin '98-'99, ku pati
fituar 3-1 kundër Burrelit. Ndërkaq, Dinamo, në 6 sezonet
e fundit, katër herë ka qenë mysafire në javën
e parë. Interesant është fakti se asnjëherë në
këto takime dinamovitët nuk kanë dalë të mundur.
Dinamo rikthehet në Elbasan pas 17 vitesh, kur kampionatin e atij
viti do ta niste me fitore në "Ruzhdi Bizhuta", 2-0, me
dy gola të E. Abazit në pjesën e dytë.
3. Apolonia-Tirana
Përsëri si dy sezone më parë, fierakët do ta
nisin sezonin në stadiumin e tyre. Vjet ata u mundën nga Teuta,
ndërkohë që sivjet do të presin nënkampionët
bardheblu. Ndërsa Tirana, për të katërtin sezon me
radhë, i ka takuar të udhëtojë. Ashtu si edhe simotra
e saj, Dinamo, edhe Tirana, në 6 sezonet e fundit, fillimin e ka
pasur premtues, sepse asnjëherë nuk ka dalë e mundur nga
fusha. Asnjëherë më parë, në 50 sezonet e fundit,
shorti nuk i ka ballafaquar në javën e parë Apoloninë
me Tiranën.
4. Besëlidhja-Erzeni
Lezhjanët do të tentojnë përsëri, si në
dy sezonet e kaluara, kur e kanë nisur kampionatin në stadiumin
e tyre me rezultate pozitive, duke barazuar me Dinamon vjet e duke fituar
me Teutën 1-0 dy sezone më parë. Ndërkohë, Erzeni,
ashtu si edhe vjet, do të udhëtojë nga Jugu (Vlorë),
në Veri sivjet. Humbjen e vjetshme shijakasit do të mundohen
të mos e pësojnë sërish. Besëlidhja dhe Erzeni
takohen për të parën herë në vigjiljen e një
kampionati.
5. Bylis-Besa
Ballshiotët, pas 1 sezoni, rikthehen në fushën e tyre për
të hapur kampionatin. Megjithatë, fusha ballshiote këtë
herë do të jetë ajo gjirokastrite. Në tre kampionate,
kur Bylisi ka luajtur në ditën e parë në "Adush
Muça", i ka fituar të tre takimet, ndërkohë
që dy të tjerat (jashtë) i ka humbur, duke mos nënshkruar
asnjë barazim në takimet e hapjes. Për Besën, kjo
është hera e 5-të me radhë që i takon të
jetë mysafire në javën e parë.
6. Lushnja-Flamurtari
Edhe lushnjarët do të jenë mikpritës për të
4-ën herë me radhë, ku në bilanc shënohet 1 fitore
dhe 2 barazime, duke mos pësuar asnjë gol. Në total, myzeqarët
kanë 5 sezone me radhë që kampionatin e kanë filluar
pa humbje. Flamurtari do të nisë sezonin jashtë Vlorës.
Në takimin e fundit, gjatë ditës së parë, ka
humbur kundër Bylisit 2-1 në sezonin 2000-2001.
7. Partizani-Shkumbini
Partizani do ta nisë "aventurën" duke pasur Shkumbinin
përballë. Një gjë e tillë ka ndodhur edhe në
javën e parë të sezonit 1999-2000. Atëherë të
kuqtë barazuan golin e peqinasit Gjoni, që pati realizuar në
minutën e 48-të, me anë të Mulletit në minutën
e 89-të. Për peqinasit, ky është kampionati i 6-të
radhazi që takimin e parë do ta luajnë jashtë Peqinit.
Bashkim Biraçi
Trajnerët: Synime, dëshira,
vlerësime...
Apolonia - Tirana
Vangjel Capo, trajner i Apolonisë: "Do të jetë një
ndeshje e hapur për të dy ekipet. Shpresoj që sportdashësit
tanë do t'i kënaqim me lojën që do të zhvillojmë.
Edhe pse do të kemi një kundërshtar të fortë,
do të përpiqemi të japim maksimumin tonë."
Enver Haxhiabdiç, trajner i Tiranës: "Duke qenë
se është ndeshje e parë e kampionatit, kërkojmë
që të arrijmë një rezultat sa më pozitiv. Të
gjithë lojtarët i kam në dispozicion dhe shpresojmë
të zhvillojmë një ndeshje me sa më pak gabime. Nuk
na falet asnjë rezultat tjetër, përveç fitores,
sepse të njëjtën gjë na ka kërkuar edhe presidenti
ynë, El Sajed, dy ditë më parë."
Lushnja - Flamurtari
Agim Mone, trajner i Lushnjes: "Ndodhemi në bangon e provës
në këtë sfidë të parë ndaj Flamurtarit dhe
ndihem pak i mëdyshur në mendimin nëse djemtë e mi
do të japin më të mirën për të arritur fitoren
ndaj Flamurtarit. Jam i bindur se i kemi të gjitha letrat në
duar për të arritur një rezultat pozitiv në këtë
ndeshje."
Leonidha Çurri, trajner i Flamurtarit: "Pak njohuri kam për
ekipin e Lushnjës. Megjithatë, çdo gjë do të
zgjidhet gjatë ecurisë së lojës. Përfundimi i
ndeshjes, besoj se do të jetë pozitiv për Flamurtarin."
Vllaznia - Teuta
Hysen Dedja, trajner i Vllaznisë: "Eshtë një ndeshje
e rëndësishme për ne, ku nuk lejohet as barazimi. Jemi
përgatitur për t'i bërë një nisje të mirë
këtij kampionati dhe besoj se e tillë do të jetë."
Edmond Zalla, trajner i Teutës: "Do të luajmë në
fushën e Vllaznisë me të njëjtin mentalitet, me të
cilin do të luajmë çdo ndeshje në "Niko Dovana".
Është një ndeshje ku rezultati është i hapur
dhe ku do të fitojë më i miri. Siç e kam thënë
edhe herë të tjera, është kënaqësi ta nisësh
kampionatin në Shkodrën e traditave të futbollit, përballë
një publiku të kulturuar. Shpresoj që sportëdashësit
e të dy ekipeve do të shikojnë një spektakël
në këtë ndeshje, ku ndeshen dy emra të mëdhenj
të futbollit tonë."
Elbasani - Dinamo
Luan Deliu, trajner i Elbasanit: "Edhe pse skuadra vjen nga kategoria
e dytë, ekipi është i përgatitur mirë për
ta kaluar me sukses provën e vështirë që ka në
javën e parë me Dinamon. Kundërshtari, me gjithë problemet
që kaloi, mbetet tepër i fortë për t'u mposhtur. Do
të luajmë për fitore, për t'u treguar të gjithëve
se Elbasani i përket elitës."
Faruk Sejdini, trajner i Dinamos: "Do të udhëtojmë
në Elbasan, për t'u ndeshur me këtë ekip, me statusin
e kampionit. Do ta vlerësojmë maksimalisht ndeshjen dhe do të
synojmë tripikëshin, për ta filluar mbarë kampionatin.
Elbasani është ekip i fortë dhe ambicioz, por ne do të
përqendrohemi për të arritur një fitore, e cila do
të na rehabilitonte pas problemeve që kaluam."
Besëlidhja - Erzeni
Vasil Bici, trajner i Besëlidhjes: "Edhe pse është
ndeshja e parë e kampionatit, skuadra është e mobilizuar
që të arrijë një rezultat të kënaqshëm.
Sidomos sepse ndeshja do të luhet para sportdashësve lezhjanë,
na del për detyrë që t'i kënaqim ata me një rezultat
sa më të mirë."
Dervish Haxhiosmanoviç, trajner i Erzenit: "I kemi kushtuar
rëndësi të veçantë kësaj ndeshjeje të
parë të kampionatit. I gjithë ekipi është në
kondicion të mirë fizik dhe shpresojmë që ky takim
të shprehë vlerat e "fair-play"-t, gjykimi të
drejtë dhe spektakël të vërtetë. E vlerësoj
ekipin e Besëlidhjes dhe sportëdashësit lezhjanë,
të cilët do të ndjekin një ndeshje ku, natyrisht,
do të fitojë më i miri."
Partizani - Shkumbini
Neptun Bajko, trajner i Partizanit: "Sot, ndaj Shkumbinit, do të
luajmë me kujdes dhe do të kërkojmë fitoren tonë
të parë. Kemi 3 muaj që po përgatitemi për sezonin
e ri, prandaj ekipit peqinas s'do të tolerojmë. Do ta vlerësojmë
këtë ndeshje, sepse duam t'i kënaqim edhe sportdashësit
tanë që na mbeshtesin gjithnjë fuqimisht."
Gjergji Poloska, zv.trajner i Shkumbinit: "Vlerësimi për
këtë ndeshje, pa dyshim, është i madh, sepse është
ndeshja e parë e kampionatit, por edhe sepse kemi përballë
Partizanin. Të luash me këtë ekip është në
radhë të parë kënaqësi. Ne do të kërkojmë
që të luajmë përballë tyre si të barabartë,
sepse ekipi ynë është përgatitur për këtë."
Bylis - Besa
Andrea Marko, trajner i Bylisit: "Thonë se fillimi i mbarë
është gjysma e punës. Ekipi është i mobilizuar
dhe të gjithë shpresojmë te një rezultat i kënaqshëm."
Abdyl Kuriu, trajner i Besës: "Do të luajmë në
një fushë asnjanëse, por do të shkojmë për
fitore. Skuadra është e karikuar 200 për qind dhe sulmi
do të jetë ai që do të zgjidhë fatin e 3 pikëve
të para për ne."
(marre nga Gazeta Shekull)
|
|
|