|
|
Etnoëngjujt rebelët
e censururar
NgaTeuta Meçi
Ne iu këndojmë ngjarjeve të vërteta. Nuk është
se përgjithësojmë të gjitha vajzat me moral të
dyshimtë. Kjo është ajo që besojnë shoqatat e
grave. Ky nuk është faji ynë. Ne kemi namin e atyre që
realizojmë këngë provokative, si një grup shumë
i guximshëm, që nuk i përfill limitet konservative.
Kanë
një emër paksa të veçantë, Etnoëngjujt,
e megjithëse quhen kështu, kundër tyre janë vënë
shoqatat për të drejtat e grave. Protesta e tyre e ka bllokuar
momentalisht spotin e albumit më të fundit të Etnoëngjuj-
ve. Djemtë 17-vjeçarë thonë se me këngët
e tyre, Ti je Bitch dhe E shtuna kanë goditur
prostitucionin, por duket që ndryshe dëgjohet muzika e tyre
nga veshët e këtyre organizmave, që u kanë hapur jo
pak probleme adoleshentëve rebelë.
I krijuar si grup më 1997, albumi i parë i prezantimit shënon
vitin 2000, me titullin "Dua të jetoj më mirë",
i cili është pasuar me albumin "The dynasty", i dalë
në treg më dhjetor të vitit 2001. Videoja e tyre, E
shtuna, me të cilën konkurruan në Netët
e Klipit Shqiptar, është bllokuar prej mediave kosovare
për shkak të ngarkesës së theksuar erotike që
kishte në shumë skena të saj.
Në Festivalin e organizuar nga Radio +2 ata janë
prezantuar me dy materiale, i pari, Ti je bitch si grup dhe
i dyti, si bashkëpunim me këngëtaren mjaft të preferuar
të këtyre kohëve në Kosovë, Arta Bajramin, Vera,
me të cilën fituan dhe çmimin Radio+2 hit
.
Ju pëlqen pjesëmarrja në koncertet shqiptare?
Çdo festival në Shqipëri e cilësojmë me një
rëndësi shumë të madhe, kështu që u detyruam
që edhe turnetë tremujore që kemi planifikuar në Europë,
ti shtyjmë për të marrë pjesë në Festivalin
e Mikrofonit të Artë dhe mendoj se kemi bërë
një hap të duhur sepse ka një vlerë fantastike për
ne.
Pse e vlerësoni kaq shumë?
Sepse festivale nuk është se ka shumë. Unë nuk di
të flas shumë për Shqipërinë dhe nëse këtu
ka shumë festivale, në Kosovë është një
punë shumë e begatshme përsa u përket koncerteve.
Atje ne kemi çdo fundjavë koncert, plus faktit që shkojmë
edhe nëpër vende të ndryshme të Europës për
të organizuar koncerte, thuajse një herë në dy javë.
Nëse marrim të krahasojmë një Festival me një
koncert, ky i fundit është prezantim përpara një publiku
lokal, ndërsa Festivali transmetohet edhe nga TV-të dhe ka një
propagandë dhe organizim shumë më të madh se koncertet
e thjeshta. Duke e marrë në të gjitha këndvështrimet,
si skenë dhe pjesëmarrje, nuk këndojmë vetëm
ne, pra me një fjalë, ka një peshë të rëndësishme
që nuk kemi ndërmend ta humbasim.
Cili është ndryshimi midis publikut kosovar dhe atij shqiptar?
Publiku i Kosovës është shumë i madh në masë.
Për këtë mund të përmend dhe koncertin e fundit
recital që organizuam së bashku me grupin Minatori
ku kishte më shumë se pesëdhjetë mijë njerëz
dhe as stadiumi nuk do të kishte mundur ti nxinte, por e realizuam
në qendër të Prishtinës. Por ka një karakteristikë
tjetër që e ndan publikun kosovar nga ai i Shqipërisë.
Së pari, në Kosovë depërton shumë lehtë
kënga që vjen nga Shqipëria, ka shumë këngë
të prodhuara në Shqipëri që janë bërë
hite në Kosovë, duke arritur dhe një sukses të jashtëzakonshëm.
Atje është hapur koncerti dhe këngëtarët shqiptarë
janë gjithmonë të pranishëm nëpër aktivitetet
e organizuara vitet e fundit. Ndërsa këtu në Tiranë,
ka një varfëri të tregut kosovar, i cili thuajse mungon
në Radiot dhe TV-të shqiptare. Përsa i përket publikut,
nuk mund të them asgjë me siguri sepse nuk kemi pasur asnjë
koncert recital këtu, përveç festivaleve. Por dihet,
se në festival, publiku është i përzier dhe nuk vjen
vetëm për këtë apo atë këngëtar, grup
apo rrymë. Kur të mbajmë një koncert recital në
Tiranë mund të themi nëse publiku tiranas është
i ngrohtë apo jo.
Pse mendoni se ndodh fakti që këngëtarët shqiptarë
janë të mirëpritur në Kosovë, ndërsa nuk
ndodh e njëjta gjë me ata kosovarë në Shqipëri?
Nuk e di, ndoshta sepse është një gjendje e vështirë,
anarkike, që mbijeton nga të dyja anët. Mirëpo, për
shembull, mendoj se faktin e ka edhe pirateria dhe kjo ka një ndikim
të madh. Por unë them se kjo ndodh edhe për faktin se TV
e Kosovës i jep një rëndësi shumë të madhe
programeve dhe emisioneve të Shqipërisë. Çdo festival
i organizuar këtu është transmetuar edhe në Kosovë.
Por këtu kjo nuk di që të ndodhë. Në kosovë,
artistët shqiptarë i kanë dyert e hapura. Ndoshta gaboj
kur them se kjo ndodh sepse në Shqipëri, nuk realizohen dhe
aq koncerte të thjeshta, gjë që në Kosovë ndodhin
shumë shpesh. Unë kam pasur ftesa edhe për koncerte të
thjeshta në Shqipëri, megjithatë, fakt është
që muzika kosovare në Shqipëri është në
nivel më të ulët sesa ajo që muzika e Shqipërisë
ka arritur në Kosovë.
Mendoni të realizoni një koncert recital në Shqipëri?
Deri në janar jemi të zënë me një turne koncertesh
në Europë, të cilat janë programuar që më
parë. Unë për momentin, nuk mund të premtoj asgjë,
sepse nuk mund të organizojmë ndonjë gjë dhe nuk mendoj
se këtë mund ta bëjë edhe kompania jonë diskografike.
Ajo që mund të bëjmë, është të presim
ndonjë ftesë nga organizatorët e këtushëm, nëse
nuk mungojnë.
Mendoni se muzika juaj pëlqehet në Shqipëri?
Në bazë të e-maileve që më kanë ardhur nga
fansa shqiptarë, mendoj se e kemi një publik. Por kam hall se
nëse mungojmë gjatë këtu, nëpër aktivitetet
e ndryshme, edhe këtë publik mund ta humbasim. Për këtë
po mundohemi që këtë publik ta mbajmë. Një nga
anëtarët e grupit tonë, këtë vit ishte me pushime
në Sarandë dhe më ka treguar se nëpër diskoteka
dëgjoheshin shpesh këngët tona. Domethënë, gjërat
po ecin për mirë, dhe shpresojmë të vazhdojnë
kështu.
Si i keni marrëdhëniet me kolegët tuaj këtu në
Shqipëri?
Është hera e 12-të që vijmë në Shqipëri,
ndoshta dhe e 13-ta. Me kolegët këtu kemi raporte shumë
të mira. Kemi ardhur edhe në Festivale e aktivitete të
tjera të organizuara në Shqipëri
Gjithmonë kemi
pasur një ngrohtësi mes kolegëve. Thonë se kudo në
botë mes artistëve ka shumë xhelozi , por këtu nuk
kam parë asnjë fije xhelozie. Më kanë pritur gjithnjë
me respekt shumë të madh, por unë them se edhe e kam kthyer
respektin kur kanë ardhur në Kosovë. Kështu një
marrëdhënie shumë të mirë kemi krijuar edhe me
grupin The Dreams>. Kam dëgjuar se grupi është
ndarë dhe kjo nuk është një gjë aspak e mirë.
Megjithatë, ne kemi raporte shumë të mira me pjesën
më të madhe të këngëtarëve që marrin
pjesë nëpër festivale të ndryshme.
Juve si ia keni dalë mbanë të qëndroni bashkë
edhe pas 6 vitesh jetë si grup?
Ne jemi lidhur shumë herët me njëri-tjetrin, por na mban
lidhur dhe suksesi. Dy albumet tona të para kanë pasur shitje
fantastike dhe radhiten në 10 këngët më të mira
në Kosovë, përfshirë këtu edhe diasporën
apo publikun shqiptar të Maqedonisë. Për këtu nuk
kam informacione, por besoj se kur të dalë albumi i tretë
do të jemi më të informuar. Pra suksesi na bën më
të fortë. Asnjëherë nuk kemi pasur konflikt mes njëri-tjetrit.
Pse etnoëngjëjt?
Gencin dhe Milotin i lidh diçka shumë e fortë, nacionalizmi.
Ne jemi nacionalistë dhe e duam etnikën tonë, atë
pjesë autoktone që na përket neve. ëngjëjt
është një propozim i producentit tonë. Megjithatë,
nuk është se i kemi dhënë rëndësi dhe aq
këtij emri.
Tematika e këngëve tuaja nga merret?
Është tematikë sociale, edukative, diskriminuese. ..(qesh).
Akuzohemi shumë që me këngën që prezantuam edhe
në Festivalin Mikrofoni i Artë, Ti je Bitch
dhe me E shtuna kemi goditur vajzat që prostituohen etj.
Janë ngritur kundër këtyre këngëve edhe shoqatat
për të drejtat e grave, të cilat e kanë bllokuar momentalisht
spotin. Kemi pasur shumë probleme.
Pse i sulmoni vajzat?
Unë e tregoj një ngjarje të vërtetë ashtu siç
është. Unë nuk është se e përgjithësoj
problemin e vajzave me moral të dyshimtë, kjo është
ajo që besojnë shoqatat e grave. Epo ky nuk është
faji im. Por ne jemi një grup i censuruar.
Megjithatë, kjo nuk do të thotë se ju nuk keni mendim
të mirë për vajzat shqiptare?
Po, normal, kush nuk e ka një mendim të mirë për vajzat
shqiptare. Megjithatë, ne kemi namin e atyre që realizojmë
këngë provokative, por cilësohemi edhe në Kosovë,
si një grup shumë i guximshëm, që nuk i përfill
limitet konservative.
Pse keni zgjedhur të jeni të guximshëm?
Sepse duhet të jesh i guximshëm për të pasur sukses.
Dhe sepse brezat dhe rinia duhet të dinë nga duhet të drejtohen.
Por mendoj se në art nuk duhet të ketë tabu që duhen
ndaluar. Unë jam i bindur se çdo njeri ku përballet me
një problem, e kritikon. Duhet të jesh banal që të
japësh kuptimin e duhur të disa problemeve. Për ne artistët
e hip-hopit, mllefi është i paevitueshëm.
Do të merrni pjesë nëpër festivalet e ardhshme
këtu në Tiranë, si Kënga Magjike, Festivali i madh
i dimrit?
Tek Kënga Magjike, nuk kemi ndonjë kontakt me Ardit Gjebrenë,
por edhe jemi shumë të zënë. Kështu, besoj se
do të marrim pjesë në Festivalet e viteve të ardhshme.
Por unë do të kisha dashur që më përpara të
kishin realizuar një koncert në Tiranë, një koncert
në të cilin të thuhej që në fillim se është
një koncert hip-hop, në mënyrë që të afrojmë
të gjithë fansat e kësaj muzike dhe jo edhe njerëzit
që preferojnë të dëgjojnë një muzikë
tjetër.
(marre nga Spekter)
|
|
|