|
|
Katër vjet më parë,
kishin vendosur të mos prezantoheshin më nëpër festivale
pasi ishin zhgënjyer nga loja e interesave. Vendosën të
riktheheshin me "Mikrofoni i Artë" sepse kuptuan se brenda
tij nuk ishin emrat që kanë abuzuar me vlerat e artistëve.
Rikthimi i suksesshëm i "Djemve
të detit"
Zefina Hasani
Kishin vendosur të mos shfaqeshin më në skenat e festivaleve
të muzikës
që nga koha kur pësuan zhgënjimin
e tyre më të madh. Kaluan plot katër vjet që nga ajo
ditë. Në gjithë këtë harrim ishin mbërthyer
nga frika se publiku i kishte harruar. Gjithsesi nuk guxonin t'i ngjiteshin
sërish skenave të festivaleve, të pësonin sërish
zhgënjimet e dikurshme, edhe pse ndiheshin borxhli ndaj publikut
që i kërkonte herë pas here. Me këtë mendje ishin
edhe kur dikush u foli për një festival radiofonik që quhej
"Mikrofoni i Artë". Nuk kishin dashur të ishin brenda
tij, në fillim. Pastaj kur panë se në këtë festival
nuk ishin përfshirë emrat e atyre që kanë luajtur
në çdo kohë me muzikën, me vlerat e artistëve
(për interesat e tyre)
kur panë se ky ishte një festival
i pastër, që organizohej nga njerëz që nuk kishin
pse të luanin me muzikën
menduan se nuk do të kishte
më vend për zhgënjime si ato të një herë
e një kohe. Dhe vendosën që të riktheheshin edhe një
herë në festival, pas katër viteve të "arratisjes".
* * *
Dolën të fituar nga ky rikthim. Morën "Mikrofonin
e Artë" të festivalit të parë të muzikës
moderne shqiptare. Por nuk ishte thjesht ky çmim që i bëri
të ndiheshin të lumtur-"Unë e pohova edhe në
skenë, në çastin kur mora në duar çmimin.
"Djemtë e detit" u gëzuan më së shumti sepse
më në fund u ndiem të vlerësuar dhe të pacënuar
nga loja e interesave që bëhen në kësi rastesh. U
respektua vota e lirë e teleshikuesve. Kështu që morëm
atë që kishim kohë që e pretendonim",-pohon solisti
i grupit Genti Demaliaj. Tregon se në shumë herë të
tjera nuk ka ndodhur kjo mrekulli. Historia e zhgënjime nga kjo "lojë
e ndyrë" interesash, djemve u ka nisur shumë kohë
më parë. Ishte viti 1991 kur ata u shfaqën për herë
të parë në festivalin që prezantoi së pari grupet
e reja që ishin krijuar në ato kohë. "Djemtë
e detit" u vlerësuan me çmimin e dytë për këngën
"Ëndrrat që për ty i thura". Por kishin shpresuar
për më shumë, bazuar mbi vlerësimet që u kishin
dhënë publiku mbarë. Më pas, suksesi i tyre (gjithnjë
përsa i përket publikut) u shtua me "Lamtumirë",
me baladën "Jakup Ferri" (me këtë të fundit
morën çmimin për përpunimin e këngës popullore
në fest 1995). Pas kësaj, djemtë lezhianë do të
pësonin goditjen më të madhe-"Ishte festivali i vitit
1997 kur problemet u shfaqën hapur. U ndiem të lënë
pas dore sepse ishim një grup modest që nuk kishim para të
jepnim, për të fituar një çmim. Zhgënjimi ishte
shumë i madh kur kuptuam që publiku kishte votuar për ne,
por juria nuk na e dha atë çmim",-tregon i qetë
Genti. Por kjo ishte vetëm goditja e parë. Një vit më
pas, djemtë do të gjendeshin sërish në një situatë
jo të favorshme për ta-"U prezantuam në festivalin
e vitit 1998 me këngën "Kohë pa ty" të cilën
ne si grup e vlerësojmë si më të mirën që
kemi bërë. Por çuditërisht ajo nuk mori asnjë
vend nderi në këtë festival ndërsa këto vende
i fituan ca këngë që ishin shumë më poshtë."
Ky ishte zhgënjimi tjetër që i shtyu të merrnim vendimin
e prerë, për të mos u shfaqur më në festivale.
* * *
Nuk ishte një zemërim që shkaktohej nga mos marrja e një
çmimi. Jo. Djemtë nuk hynin në festivale vetëm me
qëllimin për të fituar. Veçse kur shikonim se këngët
e tyre priteshin shumë mirë nga publiku dhe nuk vlerësoheshin
nga juritë, atëherë acaroheshin dhe kuptonin se nuk e përballonin
dot këtë situatë. Ndërsa tani, Gentit i duket disi
e largët ajo kohë edhe pse shijen e keqe të zhgënjimit
nuk e ka zhdukur dot prej vetes, as ai e as djemtë e tjerë-"Por
të paktën tani që u rikthyem pas katër vitesh nuk
e pësuam më. Publiku e ktheu të drejtën me ne dhe
kjo ndodhi vetëm në festivalin e "Radio+2"-shit",-thotë
i entuziazmuar. Më duket se me këtë rishfaqje të suksesshme
kemi larë deri diku dhe borxhin që kemi ndaj këtij publiku".
Shpjegon se në fakt, kur kishte dëgjuar këngët e tjera
konkurrente nuk kishte besuar shumë në marrjen e një çmimi.
Ndaj dhe kishte vendosur të luftonte për të qenë më
i miri, pa e ndier frikën e hiles që mund të bëhej
pas kuintave. Dhe këtë herë, nuk u zhgënjye, as ai
e as djemtë e tjerë të grupit.
Mes dy kohëve
Djemtë u mblodhën rastësisht në grupin e tyre. Ishte
viti 1989 kur bënin prova në Pallatin e Kulturës në
Lezhë, ende të paformuar si grup, pa pasur ende një emër.
Më pas puna e orëve të zgjatura në ato studio të
vjetra u shkëput nga eksodi i 1990. Djemtë ikën drejt Italisë.
Në këtë kohë ai që sot është kompozitori
i grupit, u ngjizi djemve emrin "Djemtë e detit". Nuk kaloi
shumë kohë dhe ata do të ktheheshin për ta nisur nga
e para punën e lënë në mes. Krijuan së pari këngën
"Ëndrrat që për ty i thura" e me të u shfaqën
në sytë e publikut të gjerë. Vitet ikën dhe ata
nuk u ndanë më. Ndërsa tani diçka ka ndryshuar.
Tre prej djemve janë në Zvicër, ndërsa kompozitori
është në Australi. Genti ka mbetur këtu në Tiranë
me pjesën tjetër të grupit për ta vijuar më tej
krijimtarinë e tyre. Së fundmi Genti ka nisur një bashkëpunim
me kompozitorin e grupit "Elita 5", i cili njihet me emrin "Virusi".
"Do të realizojmë me të një album të ri
brenda të cilit do ketë jo vetëm kompozime të tij
por dhe të kompozitorëve të tjerë sepse kështu
i krijojmë mundësi vetes të kemi materiale për të
përzgjedhur, për të qenë sa më të pranueshëm
për adhuruesit tanë",-shpjegon Genti. E ndërsa flet
vetëm për muzikën, zbulon më pas një tjetër
detaj. Sapo ka mbaruar Akademinë e Arteve për dramë. Jo
pa qëllim zgjodhi këtë degë, sepse prej saj ka mësuar
të interpretojë ashtu si duhet këngët e tij. "Nuk
mund të vazhdoja për kanto sepse nuk e gjeja veten aty. Unë
jam për muzikën e lehtë. Për këtë nuk ka
degë në akademinë tonë ndaj bëra zgjedhjen tjetër"-Nuk
ka veçse pak ditë që ka interpretuar rolin e tij të
parë, në filmin e Mevlan Shanajt "Lule të kuqe lule
të bardha".
(marre nga Gazeta Shekull)
|
|
|