|
|
include ("http://www.shqiperia.com/reklama460.php");
?>
Në librin “Legjenda dhe portrete” nga
Stefan Cvajg edhe një portret lamtumire për aktorin me origjinë
shqiptare, Aleksandër Moisiu
Cvajgu, një portret Aleksandër
Moisiut
Belina Budini
“Shekulli ynë ishte në të hyrë, kur në
skenën gjermane për herë të parë u dëgjua
zëri i aktorit të panjohur. Ishim në pritje të diçkaje
të madhe, sepse ai zë nuk ishte si zërat e tjerë,
në të kumbonin nota të reja, magjepsëse, origjinale,
të tilla që mbeteshin të paharruara në kujtesë,
po t’i dëgjoje qoftë edhe një herë të vetme...”.
Është fjala për Aleksandër Moisiun, aktorin e skenave
të mëdha të teatrit të Vjenës e Berlinit në
fillim të viteve ‘900. Janë fjalët e Stefan Cvajg
për aktorin që interpretoi Hamletin, Romeon, Fedian, role nga
Pirandelo, Tolstoi, Shekspiri... Fjalë lamtumire, shkruar nga Cvajg
fill pasi aktori Moisiu u nda nga jeta, në 22 mars të 1935 dhe
u varros në varrezat “Morcote” duke vështruar liqenin
Lugano në Zvicër. Stefan Cvajg, gjahtar i personazheve më
interesante të kohës së vet dhe kohëve para tij, skalitës
i shquar i portreteve njerëzore nga më të ndërlikuarit,
ka përvijuar edhe një portret lamtumire të aktorit, Aleksandër
Moisiu. Megjithëse e ka njohur atë gabimisht për italian,
Cvajg duket se e njeh Moisiun më së shumti si aktor. “Zëri
i tij ishte më harmonik, më depërtues, më melodioz,
më i butë se zërat gjermanë, në të spikaste
një melodiozitet i ngrohtë, plot diell, të dukej sikur
ishte juga ajo që e kishte sjellë në flatrat e saj, duke
kapërcyer male”. Superlativat për të nuk mungojnë.
Kjo lamtumirë e shkrimtarit të famshëm Stefan Cvajg është
pjesë e librit “Legjenda dhe portrete”, i cili sapo është
botuar në gjuhën shqipe nga shtëpia botuese “Uegen”,
përkthyer nga Jorgji Doksani. Cvajg shkruan se shikimi filozofik
dhe thellësisht njerëzor i problemeve njerëzore e interesonte
shumë aktorin. “Kush ka patur fatin e lumtur ta njihte nga
afër, e di se gjëja që bënte më me pasion Aleksandër
Moisiu ishin diskutimet dhe debatet në tema filozofiko-morale. Debatet
e nxehta në këto tema më janë të paharruara.
Ku jeni o net të gjata, kur rrinim tok me të, me mikun tim të
shpirtit, me më të shtrenjtin e miqve, dhe ai merrte zjarr,
jepte e merrte si dinte ai për çështje të filozofisë
dhe të moralit....”, - shkruan Cvajg duke shtuar: “Kurse
unë vetë do të kujtoj dhe mbrëmjet e kaluara me të
në rini, çastet kur rrija me sy të mbyllur për të
shijuar dhe për të depërtuar sa më thellë në
muzikën mahnitëse të zërit të tij magjepsës,
që përsëri i hapja për të mos lënë
të më shpëtonte asnjë lëvizje e tij; do t’i
gjallëroj në kujtesë takimet pas shfaqjeve, kur suleshim
ta përqafonte kush e kush më i pari, në mos, të paktën,
t’i preknim pak dorën...”. Moisiu lindi në Durrës
nga një baba shqiptar (nga Kavaja) dhe një nënë arbëreshe.
Mbas një fëmijërie në Durrës, Trieste dhe Graz,
Aleksandri 20 -vjeçar u vendos përfundimisht me nënën
e tij dhe dy motrat në Vjenë. Pikërisht aty, me inkurajimin
dhe mbështetjen e aktorit austriak, Josef Kainz (1858-1910), nisi
karriera e Moisiut si një ndër aktorët e mëdhenj europianë
të skenës në vitet e para të shekullit XX. Gjatë
viteve në vazhdim e gjen atë në Pragë dhe pastaj në
Berlin, ku ai u bë aktori i favorizuar i Max Reinhardit (1873-1943).
Bëri një turne shfaqjesh me trupën teatrale të Reinhardit
dhe 100 trupa ndërkombëtare të tjera në vende të
ndryshme të Europës dhe të Amerikës Jugore dhe Veriore.
Akoma i pakrahasueshëm me askënd tjetër mbetet roli i Fedias
në "Kufoma e gjallë" e Leon Tolstoit, interpretuar
1400 herë prej tij dhe i shikuar nga më shumë se gjysmë
milion spektatorë në botë. Moisiu ndoqi Ansamblin “Reinhard”
në Rusi në 1911 dhe u duartrokit shumë në Shën
Petërburg nga kritiku dhe dramaturgu Anatoliy Lunacharsky (1875-1933)
për interpretimin e Edipit. Duke u bërë një aktor
universal, repertori i tij i interpretimeve përfshinte krijimtarinë
e dramaturgjisë europiane që nga tragjedianët e lashtë
të Greqisë e deri tek shkrimtarët modernë të
shek. XX. Ai ishte i pari në Evropë që interpretoi karaktere
nga Strindberg, Tolstoi, Çehov, Pirandelo, Hofmanstal etj. Midis
roleve të tjerë për të cilët Aleksandër
Moisiu mbahet mend në veçanti janë Hamleti, Fausti, "Trupi
i gjallë" i Tolstoit dhe Dubedati në "Dilema e Doktorit"
të George Bernard Shaw. Megjithëse ishte kryesisht aktor teatri,
Aleksandër Moisiu u shfaq në 10 filma nga viti 1910 deri në
vitin 1935, nga të cilët 7 filma pa zë dhe 3 me zë.
Në vitin 1934, me kërkesë të tij, autoritetet shqiptare
të asaj kohe i dhanë atij pasaportën shqiptare. Aleksandër
Moisiu vdiq në 22 mars të 1935. Për nder të tij Shkolla
e Lartë e Dramës në Tiranë dhe Teatri Profesional
në Durrës kanë marrë emrin "Aleksandër Moisiu".
Përvjetori i 60-të i vdekjes së tij u përkujtua në
Shqipëri në vitin 1995 me Vitin Artistik dedikuar Aleksandër
Moisiut, sponsorizuar nga fondacioni “Aleksandër Moisiu”
në Durrës.
Kanë thënë për Moisiun
"Unë gjeta te Moisiu aktorin e vërtetë që kërkoja"
nga Max Reinhard-Reformator i skenës gjermane
"Hamleti është shkruar për Moisiun dhe Moisiu është
lindur për të interpretuar Hamletin dhe vetëm Hamletin,
vetëm ai"
nga Max Brod, shkrimtar dhe mik i ngushtë i Franc Kafkës
"Zëri, mimika dhe gjestet e Moisiut shfaqin diçka unike,
diçka e cila nuk ishte parë më parë asnjëherë
në skenën botërore të artit"
nga Franc Kafka, shkrimtar gjenial
"Nëpërmjet interpretimit të rolit të Hamletit,
Moisiu fitoi dashurinë e spektatorit francez"
nga Andre Antuan, reformist i teatrit francez
Stefan Cvajg dhe bota e portreteve njerëzore
Stefan Cvajg lindi në Vjenë, më 1881 dhe u nda nga jeta
( pas një vetëvrasje në çift) më 1942. Në
Shqipëri ndër librat e tij më të lexuar është
një përmbledhje novelash, botim i hershëm (të ribotuara
veçmas më vonë). Autor i një morie biografish, një
nga esetë biografike të tij më të lexuara në
shqip (por edhe në botë) është ajo kushtuar një
prej personazheve më të diskutuara të historisë franceze,
Zhosef Fushesë. Kolana e librave të tij vitet e fundit është
pasuruar shumë dhe një nga një po vijnë në shqip
të gjithë librat që ai ka shkruar, madje edhe ato që
ka lënë pa përfunduar. Stefan Cvajg është autor
i një sërë monografish letrare për personazhe të
shumtë si Dostojevski, Dikens dhe Balzak në librin "Tre
mjeshtërit (Drei Meister)" në 1928 ose ato kushtuar Kazanovës,
Tolstoit dhe Stendalit. Në 1935 boton biografinë për “Maria
Stjuart”. Në 1928 pati botuar edhe esenë biografike për
Zhozef Fushenë ndërsa qysh në 1925 publikoi esetë
për Kleist, Hölderin dhe Nietzsche-n. Është e pamundur
të hartosh një listë ku të përfshihen të
gjithë personazhet që Cvajgut i janë dukur interesantë
e ka shkruar për ta. Në këtë listë përfshihet
edhe emri i aktorit të madh shqiptar, bashkëkohës i Cvajgut,
Aleksandër Moisiut. Cvajg ka lënë edhe një biografi
të papërfunduar të Balzakut, një tjetër të
Montenjit krahas dy romaneve të papërfunduar.
Shekulli
include ("http://www.shqiperia.com/reklama460.php");
?>
|
|
|