|
|
Edhe këtë herë Bleona Qereti kishte
menduar të shfaqej brenda stilit të saj "jo serioz",
për të qenë në skenë krejt ndryshe nga e përditshmja.
Ndërsa komentet e gjykimet për atë natë nuk kanë
pushuar ende, këngëtarja shpjegon se e tillë ka për
të qenë gjithmonë
të thonë ç'të
dojë njerëzia
Bleona Qereti : "Pse u zhvesha në
skenë"
Zhurma,
fishkëllimat, ulërimat që zaptuan sheshin "Skënderbej"
në koncertin e madh të "Elita 5" dhe Bleona Qeretit
janë shuar që nga ajo natë. Vendin e tyre e kanë zënë
pëshpërimat, gjykimet që thuhen herë me zë të
lartë e herë pa zë fare. Në vorbullën e tyre
vërtitet (pa dyshim) Bleona Qereti, veshja e saj ekstravagante, e
trasparente deri në guxim të tepruar. Atë natë kur
këngëtarja u shfaq e tillë në skenën e madhe,
një pjesë e njerëzisë shqiptare fishkëllente
dhe kërcente nën tingujt e këngëve të saj. Një
pjesë tjetër qeshte nën buzë. E një tjetër
belbëzonte-"Ç'bëhet kështu more zot".
Ndërsa atje mbi skenë, Qereti këndonte për qejfin
e saj e bindur se ia kishte arritur qëllimit
se e kishte realizuar
çudinë e radhës, ashtu si gjithmonë.
* * *
Të nesërmen e asaj nate, edhe ata njerëz që nuk e
panë "live" zhveshjen e Qeretit në skenë, diçka
panë në publikimin e fotografive të koncertit. Diçka
dëgjuan në komentet e njerëzve. Dhe nisën të
ngrenë edhe ata botën e tyre të gjykimit ndaj ndodhisë
së radhës. Kështu që nga ajo natë (10 tetori)
veshja tejet transparente e Bleona Qeretit nuk u ka dalë nga mendja
dhe goja njerëzisë shqiptare. Dikush thotë se ajo po përpiqet
të imitojë ekstravagancën dhe mënyrën e zhveshjes
skenike të Madonës dhe Adelina Ismajlit. Dikush thotë se
ajo ç'është e vërteta kështu e çuditshme
është shfaqur që në herën e saj të parë
me
një pelerinë të rëndë të cilën e hoqi
në skenë për të mbetur me një palë kominoshe
(pantallona) shumë të shkurta. Ishte një festival i muzikës
së lehtë të fundvitit ku ajo u prezantua si këngëtare
e re me këngën "Lërmëni
unë s'ju përkas
juve". Që nga ajo herë, çudirat "ala bleonë"
kanë qenë të shumta. Më e madhja ishte pak kohë
më parë, në po atë shesh "Skënderbej".
Veçse në një koncert të disa djemve të tjerë.
Ishte nata e grupit "DJ Bobo" kur Qereti çoroditi publikun
me veshjen e saj "të çarë" anekënd trupit.
Edhe atëherë gjykimet zgjatën ditë e netë me
radhë. Por për Qeretin pak rëndësi kishte se ç'thoshin
të tjerët. Ajo vetë ndihej e arrirë.
* * *
Kështu ndihet edhe këtë herë. Prej 40 ditësh,
që nga mbarimi i turneut të saj kishte menduar e punuar për
këtë natë. "Përderisa publiku do të vinte
në shesh për të më parë mua, detyra ime ishte
të mendoja që të bëja maksimumin në të gjitha
elementet e koncertit. E mes këtyre elementëve ishte dhe veshja
sigurisht"-Ende e raskapitur nga e gjithë ajo që ka kaluar,
Qereti tregon hapur se nuk i bëjnë aspak përshtypje se
çfarë thonë të tjerët- "Edhe Krishti ka
pasur njerëz pro dhe kundër tij, kështu që edhe ndaj
meje sigurisht që do ketë njerëz që më gjykojnë
për keq. Unë kam hulumtuar në treg para se të dilja
atë natë ashtu dhe 90 për qind e njerëzve ishin pro
idesë sime"-Pra ishin të mendimit që Bleona të
shfaqej sërish ashtu sipas mënyrës së saj. "Në
fillim dola e mbuluar me veshjen e murgeshës për të përcjellë
drejpërdrejti mesazhin tim në këngën "S'më
bëhet vonë". Ishte ky një mesazh që u drejtohet
gjithë vajzave që janë të censuruara, që edhe
pse në fakt nuk e kanë mbi vete pelerinën e murgeshës
në shpirt ndihen të tilla. Unë duke e hequr në skenë
atë pelerinë u thashë vajzave që ta zhdukin cenzurën
që po i mbyt". Më pas pantallonat e shkurtra u zëvendësuan
me një veshje të tejdukshme të cilën bleona e kishte
zgjedhur jo pa qëllim-"Doja të tregoja Bleonën, personalitetin
tim në skenë. Unë kjo kam qenë gjithmonë në
skenë dhe nuk kam pse të ndryshoj e të shfaqem serioze.
Më mjafton të jem e tillë në jetën time të
përditshme". Ishte pikërisht kjo veshja që e futi
Qeretin edhe një herë në vorbullën e gjykimit. Por
asaj aq i bën. Tregon se këto veshje i ka zgjedhur enkas për
këtë koncert në Gjermani. "Ndërsa dy veshjet
e para ishin studiur me kujdes, e treta ishte thjesht në përshtatje
me muzikën dhe tekstin e këngës së "Elita 5".
Por gjithsesi ishte brenda stilit tim".
* * *
I
ka dëgjuar dhe thëniet se po mundohet të imitojë Madonën
dhe Adelina Ismajlin ndaj dhe mundohet të shpjegojë se -"Madonën
sigurisht që e shoh me kujdes sepse ajo është një
artiste e madhe që ka vite që i reziston skenës dhe ke
se çfarë të mësosh prej saj. Ndërsa përsa
i përket Adelina Ismajlit, profili im dhe muzika ime janë shumë
larg saj. Fakti që ne ngjasojmë disi në flokë dhe
në portret nuk do të thotë aspak që unë përpiqem
të imitoj atë". Këmbëngul që është
vetvetja dhe askush tjetër, që ka ndërtuar tashmë
stilin e saj skenik të cilin as që ka ndërmend ta ndryshojë.
S'i bëhet vonë se ç'thotë njerëzia, dëgjon
veç mendjen se çfarë i thotë. Kështuqë
edhe në të tjera shfaqje, Bleona Qereti e tillë do të
jetë
tejet trasparente në feminitetin e saj.
Pas koncertit
Dhembja e këngëtares
Askush nuk e ka kuptuar se në shfaqjen e saj të tretë me
djemtë tetovarë, Qereti ka qenë shumë e sëmurë.
E megjithatë ajo ka kënduar. "Aty pas kuintave ndërsa
prisja radhën ndihesha shumë keq dhe nuk merrja dot frymë.
Ndieja një dhimbje të tmerrshme në stomak. Por nuk mundesha
të anulloja daljen me djemtë e "Elita 5" dhe durova
nuk e di se si"-Vetëm kur koncerti kishte mbaruar, Qereti ishte
lëshuar e tëra në dhimbjen e saj. E kishte lënë
gjithçka edhe festimin e mbarimit të koncertit, edhe darkën
që do të hante me djemtë tetovarë dhe ishte mbyllur
në shtëpinë e saj-"Për orë të tëra
kam uluritur nga dhembja e stomakut. Ishte gjithë stresi i atyre
ditëve që po më çlirohej ndaj dhe ndihesha shumë
keq. Kishin kaluar shumë ditë të ngarkuara jo vetëm
me lodhjen fizike për të vënë në vijë gjithçka
por dhe me emocionin e të qenurit ashtu si duhet në syrin e
fansave të tu"-Pohon se është e bindur se pas gjithë
kësaj e ka shlyer borxhin që kishte ndaj adhuruesve të
saj
me të gjithë elementët e menduara me kujdes për
atë koncert, mes të cilave ishte dhe "look"-u i jashtëm.
(marre nga shekull)
|
|
|