Vendimi i të ardhmes së stolit të Re alit të Madridit është shtyrë pas finales së Champions-it. Do të jetë apo jo Zinedin Zidan në "Santiago Bernabeu" edhe pas finales së të shtunës kundër Atletikos së Madridit, do të konfirmohet pasi të jetë luajtur ndeshja në "San Siro".
Madrilenia "As" ka zbuluar se, në rast se "galaktikët" do të ngrenë trofeun e 11-të të kontinentit në qiellin e Milanos, atëherë tekniku francez do vijojë të jetë në stolin e skuadrës edhe në dy vitet e mbetura të kontratës së tij. Por, në rast se do të jetë Atletiko ajo që do të hakmerret për finalen e humbur të Lisbonës (2014), do të kemi një "adieu Zizu".
Emisar tek Emeri "Sky Sports Italia" ka zbuluar se presidenti i Realit, Florentino Perez, ka dërguar një të besuarin e tij te trajneri i Sevijes, Unai Emeri.
"Mbretërorët" i kanë bërë me dije fituesit të Ligës së Europës që të ngrijë çdo plan që ka gati për të ardhmen e tij deri pas finales së Champions- it, sepse në rast të një lajmi të keq nga "San Siro", atëherë Zidan do të shkarkohej dhe tekniku bask do të marrë telefonatën, e cila do ta ftonte në "Bernabeu".
Emeri është ende nën kontratë me ekipin andaluzian (deri në vitin 2017), por kredencialet e tij janë rritur ndjeshëm pas triumfit kundër Liverpulit në finalen e Bazelit. Perez nxiton, sepse nuk është vetëm Reali i Madridit klubi i interesuar për shërbimet e tij.
Valencia është klubi më i njohur që ka drejtuar 44-vjeçari, i cili e nisi karrierën në vitin 2004 te Lorka Deportiva. Pas dy vitesh, ai u transferua tek Almeria dhe përsëri pas dy sezonesh u largua drejt "Mestajës", atje ku qëndroi deri në vitin 2012 përpara se të merrte edhe drejtimin e Spartakut të Moskës.
Timonin e Sevijes, Emeri e mori në vitin 2013. Kështu që Ronaldo me shokë nesër nuk do të luajnë vetëm një trofe, por edhe fatin e trajnerit të tyre, për të cilin ndryshe nga pasardhësi i tij, Rafael Benitez, ata janë shprehur gjithnjë me superlativa.
Përgatiti: ANDROKLI DRALO