Teatri i Komedise shfaq Familja ne shi

Teatri i Komedise shfaq 'Familja ne shi'
Në datat 21 dhe 22 prill, ora 19:00, në Teatrin Kombëtar të Komedisë, do të vazhdojë të shfaqet "Familja në shi" me autor dhe regjisor Ilir Bezhanin. Në qendër të veprës ndodhet familja e një shkrimtari, të cilit, me gjithë problemet ekonomike, i duhet të bëjë një operacion. Për të shpëtuar jetën e tij ai merr hua një shumë parash, por të cilat më pas do t'i duhet t'i shlyejë.

I shtyrë nga rrethanat, mendja e këtij artisti inskenon rrëmbimin e fëmijës së doktorit, i cili e operoi. Ai mendon se gjithçka do kalojë me mirëkuptim dhe humor, pas kthimit të fëmijës në familjen e prindërve të tij. Por gjërat nuk shkojnë ashtu siç i kishte parashikuar ai, pasi djali i vogël i doktorit zhduket.

Në këtë moment publiku do të njihet edhe me një tjetër familje të varfër shqiptare, fqinje të shkrimtarit. Të detyruar nga kushtet ekonomike, ata bien dakord të birësojnë djalin e tyre më të vogël tek një familje e pasur italiane. Luajnë aktorët Xhevahir Zeneli, Xhemil Tagani, Andon Qesari, Genc Fuga, Eliona Thomaraj, Esmeralda Kame, Arjeta Dhima, Klodiana Keco, etj.

Artikujt e fundit


Reklama

Reklama